ގޯލްކީޕަރު ކެޕާ އަރިޒަގަބަލާ ބާކީކޮށް ޗެލްސީގެ ކޯޗު މައުރީސިއޯ ސަރީ އާއި އޭނާގެ ޓީމު ރޭ 2-0އިން ޓޮޓެންހަމް ބަލިކޮށްފިއެވެ.
މެޗުގައި ޗެލްސީގެ ފުރަތަމަ ގޯލު ޖެހީ ޕެޑްރޯ ރޮޑްރިގޭޒްއެވެ. ފަހު ގޯލަކީ ޓްރިޕިއާ އަތުން ބައިކޮޅަށް ވަތް ގޯލެކެވެ.
މެޗަށް ފަހު ކޯޗު ސާރީ ބުނީ މި މެޗުގައި ކެޕާގެ ބަދަލުގައި ބަދަލު ކީޕަރު ކަބަޔޭރޯ ކުޅެން އެރުވީ އިނގިރޭސި ލީގު ކަޕް ފައިނަލްގައި ކެޕާގެ އަމަލުތައް ހުރި ގޮތުން ކަމަށެވެ. އެ މެޗުގައި ކެޕާ ބަދަލު ކުރަން އުޅުމުން އޭނާ ދަނޑުން ނުފޭބިއެވެ. މިކަމާހެދި ކުލަބުން ވަނީ އޭނާ ޖޫރިމަނާވެސްކޮށްފައެވެ.
ސަރީ ބުނީ މިއީ މުޅި ޓީމުގެ ހުރިހާ ކުޅުންތެރިންނަށް ދީފައިވާ މެސެޖެއް ކަމަށާއި ގޯސް ހަދައިފިނަމަ ވަކި މީހަކު އިސްތިސްނާ ނުކުރާނެ ކަމަށެވެ. ނަމަވެސް ކުޅުންތެރިންނާއި އޭނާއާއި ގުޅުން ރަނގަޅު ކަމަށް ވެސް ކޯޗު ބުންޏެވެ.
ޓޭބަލުގެ ހަވަނާގައި 53 ޕޮއިންޓާއެކު އޮތް ޗެލްސީގެ ކޯޗު ބުނީ މި މެޗުން އޭނާގެ ޓީމު މޮޅުވި ނަމަވެސް ކުޅުމާމެދު އެންމެ ހިތްހަމަ ނުޖެހޭ ކަމަށެވެ. ނަމަވެސް ކުޅުންތެރިންގެ މަސައްކަތާއި ނަތީޖާއާމެދު ހިތްހަމަ ޖެހޭ ކަމަށެވެ.
ޓޮޓެންހަމްގެ ކޯޗު މައުރީސިއޯ ޕޮޗެޓިނޯ ބުނީ ޗެލްސީން ގޯލަށް ޖެހީ އެންމެ ބޯޅައެއް ކަމަށާއި އޭނާގެ ޓީމު ބަލިވީ ހެދުނު މަދު މިސްޓޭކްތަކުގެ ސަބަބުން ކަމަށެވެ. އަދި އިނގިރޭސި ލީގަކީ ވަރުގަދަ ލީގަކަށްވުމުން އަބަދުވެސް މޮޅުވާނީ މެޗަށް އެންމެ ފުރިހަމަ އަށް ސަމާލުކަންދޭ ޓީމު ކަމަށެވެ. ޓޮޓެންހަމް މިވަގުތު އޮތީ 60 ޕޮއިންޓާއެކު ތިން ވަނާގައެވެ.