ޙައްޖަށް ދިއުމަށް ޕެންޝަން ފަންޑުގައި ހުރި ފައިސާ ބޭނުން ކުރެވޭ ގޮތަށް ޕެންޝަނާއި ބެހޭ ޤާނޫނަށް ހުށަހަޅާފައިވާ އިޞްލާޙު ރައްޔިތުންގެ މަޖިލީހުން މިއަދު ފާސްކޮށްފިއެވެ. މި އިޞްލާޙު ފާސްކުރެއްވީ ވޯޓުގައި ބައިވެރިވެވަޑައިގެންނެވި 69 މެންބަރުންގެ އިއްތިފާޤުންނެވެ.
ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ދިވެހިރާއްޖޭގެ ޕެންޝަނާ ބެހޭ ޤާނޫނަށް ހުށައެޅުއްވި އިޞްލާޙުގައި ބުނެފައިވަނީ ޕެންޝަން ސްކީމުގެ ބައިވެރިންގެ ތެރެއިން ޕެންޝަން ޤާނޫނުގައި ކަނޑައަޅައި ޝަރުތުތައް ފުރިހަމަވާ ބައިވެރިންގެ ރިޓަޔަރމަންޓް ސޭވިންގސް އެކައުންޓުގައި ޖަމާކުރެވިފައިވާ ފައިސާ ޙައްޖުގެ އަޅުކަން އަދާ ކުރުމަށް ދެއްކޭނެ އިންތިޒާމް ޤާނޫނާއި އެއްގޮތްވާ ގޮތުގެ މަތިން ހަމަޖައްސަންވާނެ ކަމަށެވެ.
މި އިޞްލާޙުގައި ޕެންޝަން ސްކީމްގައި ބައިވެރިވެފައި ތިބި މީހުންގެ ތެރެއިން ޙައްޖުގެ އަޅުކަން އަދާކުރަން ސޭވިންގ އެކައުންޓުން ފައިސާ ދޫކުރާނީ އަލަށް ޙައްޖަށް ދާ މީހުންނަށް އެކަނި ކަމަށެވެ އަދި ޕެންޝަން ފަންްޑުން ހައްޖަށް ދާން ފައިސާ ދޫކުރަނީ އެ އަހަރަކު ހައްޖަށް ދާން ދައްކަން ޖެހޭ ރަސްމީ އަގުގެ ގޮތުގައި ސަރުކާރުން ކަނޑައަޅާ ޢަދަދުގެ ދެބައިކުޅަ އެއްބާ ނުވަތަ ފަންސާސް އިންސައްތަައެވެ.
ފެންޝަން ފަންޑުގެ ފައިސާއިން ހައްޖަށް ދެވޭނީ، ޕެންޝަން ލިބޭ ޢުމުރު ހަމަވާއިރު، މަހަކު ދެހާސް ރުފިޔާ ދެވޭ މިންވަރުގެ ފައިސާ، ހައްޖުވުމަށް ހުށަހަޅާ ރިޓަޔަމެންޓް ސޭވިންގް އެކައުންޓުގައި ޖަމާވެފައި ހުރި ފަރާތަތަކަށެވެ.
މީގެ އިތުރުން ޕެންޝަން ފައިސާ ޚަރަދުކޮށްގެން އެ އަހަރަކު ޙައްޖަށް ފޮނުވާނެ ޢަދަދެއް ކަނޑައަޅާނީވެސް ޕެންޝަން އޮފީހުންނެވެ. މި އިޞްލާޙު ހުށަހެޅުއްވީ ގިނަބަޔަކަށް ޙައްޖުގެ މަތިވެރިކަން އަދާ ކުރުމުގެ މަގު ތަނަވަސް ކުރުމުގެ ގޮތުންނެވެ.
ޙައްޖަށް ދިއުމަށް ޕެންޝަން ފަންޑުގައި ހުރި ފައިސާ ބޭނުންކުރެވޭނެ ގޮތް ހަމަޖެއްސުމަކީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙުގެ ރިޔާސީ ވަޢުދެކެވެ.