ރިޔާސީ ކޮމިޝަންތަކުގެ ބިލް މަޖިލީހުގެ ތަޅުމަށް ފޮނުވާފައި ވަނީ ބިލު ދިރާސާކުރި ކޮމެޓީން ފާސްކޮށްފައި އޮތް ގޮތަށް ނޫން ކަމަށް ކޮމެޓީގެ މެންބަރުންތައް ވިދާޅުވުމާއި ގުޅިގެން ބިލު އެޖެންޑާއިން ނަގައިފިއެވެ.
މަޖިލީހުގެ ރައީސް ޤާސިމް އިބްރާހީމް ވިދާޅުވީ ރިޔާސީ ކޮމިޝަންތަކަށް ބާރުދޭ ބިލަށް ވޯޓަށް ނޭހީ އެ ބިލް މިނިވަން މުއައްސަސާތަކުގެ ކޮމީޓިން ފާސްކުރި ގޮތް ނޫން އެހެން ގޮތަކަށް އެ ބިލް ހުށަހަޅާފައިވާކަމަށް އެ ކޮމިޓީގައި ހިމެނިވަޑައިގަންނަވާ ހަ މެންބަރަކު ސޮއިކޮށް ފޮނުވި ސިޓީއެއް ލިބިވަޑައިގެންފައިވާ ކަމަށެވެ. އެހެންކަމުން އެކަން ތަޙުޤީޤްކުރުމަށްފަހު ނޫނީ އެ ބިލަށް ވޯޓަށް ނާހާނެ ކަމަށް ޤާސިމް އިބްރާހީމް ވިދާޅުވިއެވެ.
ރިޔާސީ ކޮމިޝަންތަކަށް ބާރުދޭ ބިލް މިއަދުގެ ޖަލްސާގައިވެސް ފާސްކޮށްފައި ނުވާއިރު، މިއީ އެ ބިލް ފާސްކުރުމަށް އެޖެންޑާކުރި ހަތަރުވަނަ ފަހަރުއެވެ. މީގެ ކުރިން އެ ބިލް ފާސްކުރަން އެޖެންޑާކުރި ތިން ފަހަރުވެސް ވަނީ މެމްބަރުން ހަމަނުވުމުގެ ސަބަބުން އެކަން ނުވެފައެވެ. އިއްޔެ ޖަލްސާއަށްވެސް ކޮމިޝަންތަކަށް ބާރުދޭ ބިލްތައް ފާސްކުރުމަށް އެޖެންޑާކޮށްފައިވަނިކޮށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ 10 މެމްބަރަކު ވޯޓު ގަޑީގައި މަޖިލިސް ތަޅުމުގައި ނެތެވެ.
މީގެކުރިން ޤާނޫނީ ޢަދަދަށް މެންބަރުން ހަމަނުވުމުގެ ސަބަބުން ބިލް ފާސް ނުވިނަމަވެސް މިއަދުގެ ޖަލްސާގައި ކޯރަމް ހަމަވެ ވޯޓަށް ނޭހުމުން ސަރުކާރުގެ މައި ޕާޓީ އެމްޑީޕީގެ މެމްބަރުންވަނީ މަޖޅިހުގެ ރައީސަށް ވަރަށް ބޮޑަށް ފާޑުވިދާޅުވެފައެވެ.
ރިޔާސީ ކޮމިޝަންތަކަށް ބާރުދޭ ބިލް ކޮމިޓީން ފާސްކޮށްފައިވަނީ އެ ބިލްގައި ހިމަނާފައިވާ ގިނަ ބާރުތަކެއް އުނިކުރުމަށްފަހުއެވެ. ރިޔާސީ ކޮމިޝަންތަކާ ގުޅޭ ބިލަކީ ކުރީ ސަރުކާރުތަކުގައި ހިންގާފައިވާ ކޮރަޕްޝަންގެ ޢަމަލުތައް ބެލުމަށާއި، ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައިސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން އުފައްދާފައިވާ ދެ ކޮމިޝަނަށް ޤާނޫނީ ބާރު ދިނުމަށް ހުށައެޅި ބިލެކެވެ.
މި ބިލް ފާސްކޮށް ގޮތް ނޭނގޭ މަރުތަކާއި ކޮރަޕްޝަންތަކުގެ ޢަމަލުތައް ބަލާ އިންސާފު ހޯދައިދިނުމަކީ ރައީސް ޞާލިޙްގެ ރިޔާސީ ވަޢުދެކެވެ.