ޤަވާއިދާއި ޚިލާފަށް އިންޑިއާގެ ކަނޑުގެ ސަރަހައްދަށް ވަތް ދިވެހި މަސްދޯނީގައި ތިބި ބިދޭސީން ފުފުވާލުމަށްޓަކައި މޯލްޑިވްސް އިމިގްރޭޝަންގެ ބެލުމުގެ ދަށަށް ގެނެސްފިއެވެ.
އިމިގްރޭޝަނުން ވިދާޅުވީ ޤަވާއިދާއި ޚިލާފަށް އިންޑިއާގެ ކަނޑުގެ ސަރަޙައްދަށް ވަތް ދިވެހި މަސް ދޯނީގައި ތިބި ބަންގްލަދޭޝްގެ 8 ރައްޔިތަކު ފުރުވާލުމަށްޓަކައި އެމް.އެން.ޑީ.އެފުން އިމިގްރޭޝަނާއި ހަވާލުކޮށްފައިވާކަމަށެވެ.
"ވީވަރު" ނަމަކަށް ކިޔާ ދިވެހި މަސްދޯންޏެއް އިންޑިއާގެ ކަނޑުގެ ސަރަޙައްދުން ހިފަހައްޓައި، އެޤައުމުގެ ނޭވީއިން އެމް.އެން.ޑީ.އެފާއި ހަވާލުކޮށްފައިވަނީ މިދިޔަ ހަފްތާގައެވެ. އެ ދޯނި އެމް.އެން.ޑީ.އެފާއި ހަވާލުކުރިއިރު ދޯނީގައި ބިދޭސީން ތިބުމާއި ގުޅިގެން، އެމް.އެން.ޑީ.އެފުން ވަނީ އެކަން އިމިގްރޭޝަނާއި ޙިއްސާކޮށްފައެވެ. އަދި އެމް.އެން.ޑީ.އެފްގެ އެހީތެރިކަމާއިއެކު އިމިގްރޭޝަންގެ ޓީމެއް އެދޯންޏަށް ގޮސް، ދޯނީގައި ތިބި ބިދޭސީންގެ މަޢުލޫމާތު ސާފުކުރިއިރު އެ ދޯނީގައި ތިބި 8 ބިދޭސީންގެ ތެރެއިން 2 މީހުންނަކީ ވަޒީފާ ދިން ފަރާތަށް ފިލައިގެން އުޅޭ ކަމަށް ރިޕޯޓްކޮށްފައިވާ މީހުންނެވެ. އަދި އަނެއް 6 މީހުންނަކީ އިމިގްރޭޝަނުގެ ޤާނޫނާއި ޚިލާފަށް ރާއްޖޭގައި މަސައްކަތް ކުރަމުންދިޔަ ބިދޭސީންނެވެ.
އިމިގްރޭޝަނުން މި މައްސަލަ ބަލަންފަށާފައިވާއިރު، މިމައްސަލައިގައި އިހުމާލުވާ ފަރާތްތައް ޒިންމާދާރުކުރުވާ، އެފަރާތްތަކާމެދު ޤާނޫނީ ފިޔަވަޅު އަޅާނެކަމަށް އެ އިދާރާއިން ބުނެއެވެ. އަދި ފަހަކަށް އައިސް ޤަވާއިދާއި ޙިލާފަށް އުޅޭ ގިނަ އަދަދެއްގެ ބިދޭސީން މަސް ދޯނި ތަކުގައި މަސައްކަތް ކުރަމުންދާކަން ފާހަގަކުރެވިފައިވާކަމަށާއި، މިއީ އިމިގްރޭޝަންގެ ޤާނޫނާއި ޚިލާފުކަމަކަށްވާތީ އެކަމުގައި ޝާމިލުވާ ފަރާތްތަކާމެދުވެސް ޤާނޫނީ ގޮތުން އަޅަންޖެހޭ ފިޔަވަޅުތައް އަޅާނެކަމަށް އިމިގްރޭޝަނުން ބުނެއެވެ.