ޑިންގީ ބަންޑުން ޖަހާލުމާގުޅިގެން ގެއްލިގެން ހޯދަމުންދާ ޝިމާ ނާފިޒް ހޯދުމުގެ މަސައްކަތް ހުއްޓުމެއްނެތި ކުރަމުންދާކަމަށާއި، މިހާތަނަށް އޭނާއާއި، ބަންޑުން ޖަހާލި ޑިންގީގެ އެއްވެސް ޚަބަރެއް ނުވާކަމަށް އެމް.އެން.ޑީ.އެފުން ވިދާޅުވެއްޖެއެވެ.
ގދ. ފިޔޯރީ އުމުރުން 19 އަހަރުގެ ޝިމާ ގެއްލިފައިވަނީ މިދިޔަ ހުކުރު ދުވަހުގެ ރޭ އޭނާއާއި އިތުރު މީހަކު ލ. ކައްދޫއިން ފުރައިގެން އެއަތޮޅު މާމެންދޫއަށް ދަތުރު ކުރަމުންދިޔަ ޑިންގީ ގާދޫ ކަނޑުއޮޅިއަށް ބަންޑުން ޖަހާލުމާ ގުޅިގެންނެވެ.
ޕީ.އެސް.އެމް ނިއުސްއަށް މަޢުލޫމާތު ދެއްވަމުން އެމް.އެން.ޑީ.އެފްގެ މީޑިއާ އޮފިޝަލް ކެޕްޓަން އިބްރާހީމް ޢާޒިމް ވިދާޅުވީ، ޝިމާ ހޯދުމުގެ މަސައްކަތުގައި ކޯސްޓްގާޑް ޝިޕް ޝަހީދު ޢަލީއާއި، ކޯސްޓްގާޑުގެ ޑައިވަރުންނާއި، އެމް.އެން.ޑީ.އެފް ސެންޓްރަލް އޭރިއާގެ ސިފައިން މިއަދުވެސް ހަރަކާތްތެރިވަމުންދާކަމަށެވެ. އަދި ޝިމާ ގެއްލުނު ކަމަށްބުނާ ސަރަޙައްދުގެ އޮއެވަރު ހުރިގޮތުން ކަނޑުއަޑީގައި ކޮންމެވެސް ވަރަކަށް ކިނލަބުކަމެއް ހުރިނަމަވެސް، ޑައިވިން ރޮބޯޓްގެ އެހީގައި އޭނާ ހޯދުމުގެ މަސައްކަތް މިހާރުވެސް ހުއްޓުމެއްނެތި ކުރަމުންދާކަމަށެވެ.
ޢާޒިމް ވިދާޅުވީ ޝިމާ ހޯދުމުގެ މަސައްކަތް ކުރިއަށްދާތާ 60 ގަޑިއިރުވެފައިވާއިރު، ޝިމާއާއި، އޭނާ ދަތުރުކުރި ޑިންގީ އަދި އޭނާ ފެނުމަތީގައި އޮތުމަށް ޑިންގީ ދުއްވަންއިން ފިރިހެން މީހާ ދިންކަމަށްބުނާ ހަމުގެ އެއްވެސް ނިޝާނެއް މިހާތަނަށް ފެނިފައިނުވާކަމަށެވެ.
މިދިޔަ ހުކުރު ދުވަހުގެ އިރުއޮއްސުނު ވަގުތު ހިނގި މި ޙާދިސާގައި ޑިންގީ ބަންޑުން ޖަހާލުމުން އޭގައި ހުރި ފިރިހެން މީހާ ފަތާފައި ގޮސް ސިކްސް ސެންސަސް ރިސޯޓަށް އަރައި އެހީތެރިކަމަށް އެދިފައިވާކަމަށް ފުލުހުން ބުނެއެވެ. އަދި ޑިންގީ ބަންޑުން ޖަހާލާފައިވަނީ ޕެޓްރޯލް ހުސްވެގެން ޕެޓްރޯލް އަޅަމުންދަނިކޮށް ޖެހި ރާޅަކާއެކުކަމަށް އެމީހާ ބުނެފައިވާކަމަށްވެސް ފުލުހުން ވިދާޅުވެއެވެ. ނަމަވެސް މި ޙާދިސާ ހިނގިގޮތާމެދު ސުވާލު އުފެދޭ އެތައްކަމެއް ހުރުމުން މި ޙާދިސާ ފުލުހުން މިހާރު އަންނަނީ ތަޙުޤީޤުވެސް ކުރަމުންނެވެ.
މިދިޔަ ހުކުރު ދުވަހުގެ ރޭ ހިނގި މި ޙާދިސާގައި ޑިންގީ ބަންޑުން ޖަހާލި ސަރަޙައްދުން ދަތުރުކުރާ އުޅަނދުތަކުންވެސް ޑިންގީއާއި ޝިމާގެ ޙަބަރެއްވޭތޯ ބަލައިދިނުމަށް ސިފައިން ވަނީ އިލްތިމާސްކޮށްފައެވެ.