އިންޑިއާގައި ކުރިއަށްދިޔަ "ރީޖަނަލް ވިމެން ލީޑަރސް ޑައިލޮގް"ގައި މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ބައިވެރިވެވަޑައިގެންފިއެވެ.
ކެނެޑާ ސަރުކާރުން އިންތިޒާމްކޮށްގެން މިމަހުގެ 21 އިން 22 އަށް އިންޑިއާގެ ވެރިރަށް ނިއުދިއްލީގައި ކުރިއަށްގެންދިޔަ މި ބައްދަލުވުމުގައި ޖެންޑަރ މިނިސްޓަރ ބައިވެރިވެވަޑައިގެންފައިވަނީ ކެނެޑާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ޑޭވިޑް މެކްކިނަން ދެއްވި ޚާއްޞަ ދަޢުވަތަކަށެވެ.
މި ޑައިލޮގްގައި މިނިސްޓަރ ޝިދާތާ ވަނީ އަންހެނުން ބާރުވެރިކުރުވުމަށް ސަރުކާރުން ކުރައްވަމުން ގެންދަވާ މަސައްކަތްތަކާއި ކުރިމަތިވާ ގޮންޖެހުންތައް ބައިވެރިންނާ ޙިއްޞާކުރައްވާފައެވެ. އެގޮތުން ޖެންޑަރ އިކުއަލިޓީގެ ޤާނޫނުގައި ލިބިދެވޭ ޙައްޤުތައް ތަންފީޛުކުރުމަށް ސަރުކާރުން އިސްނަންގަވައިގެން ކުރައްވަމުން ގެންދަވާ މަސައްކަތްތަކާއި، ސިޔާސީ ދާއިރާގެ އިސް މަޤާމުތަކާއި ނިންމުން ނިންމާ ފެންވަރުގައި އަންހެނުންގެ ބައިވެރިވުން އިތުރުކުރުމަށް ކުރައްވަމުން ގެންދަވާ މަސައްކަތްތައް ވެސް މިނިސްޓަރ ވަނީ ހިއްސާ ކުރައްވާފައެވެ.
މިނިސްޓަރ ޝިދާތާގެ މި ދަތުރުފުޅުގައި ކެނެޑާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރާވެސް ބައްދަލުކުރައްވާފައެވެ. މި ބައްދަލުކުރެއްވުމުގައި ދިވެހިރާއްޖޭގެ ސިޔާސީ މަސްރަޙު ބަޔާންކޮށްދެއްވައި، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އަންހެނުންނަށް އޮތް ފުރުޞަތުތަކާއި، އަންހެން ކެނޑިޑޭޓުންނަށް ކުރިމަތިވާ ގޮންޖެހުންތަކާއި، ހުރި ކަންބޮޑުވުންތައްވެސް މިނިސްޓަރ ވަނީ ޚިއްޞާކުރައްވާފައެވެ.
ރީޖަނަލް ވިމެން ލީޑަރސް ޑައިލޮގްގައި 14 ޤައުމަކުން 20 އަންހެން ލީޑަރުން ބައިވެރިވެފައިވާއިރު މި ސަރަޙައްދުގެ އަންހެނުންނަށް ބޭނުންވާ ލީޑަރޝިޕް ޓްރޭނިންގއާއި ކެޕޭސިޓީ ބިލްޑިންގ އަދި ނެޓްވޯކިންގއާ ގުޅޭ ބެސްޓް ޕްރެކްޓިސްތަކާ ގުޅޭ ގޮތުން ޚިޔާލު ބަދަލުކޮށްފައިވެއެވެ. އަދި މުޖުތަމަޢުގައި އަންހެނުންނަށް ކުރިމަތިވާ ގޮންޖެހުންތައް ނައްތައިލުމަށް ބޭނުންވާ ސިޔާސަތުތަކާ ގުޅޭ ގޮތުން ވެސް ބައިވެރިންގެ މެދުގައި މަޝްވަރާކޮށްފައިވެއެވެ.