ޑިންގީއެއް ބަންޑުން ޖަހާލުމާގުޅިގެން ގެއްލުނު ޒުވާނާ ހޯދުމުގެ މަސައްކަތް ހެލިކޮޕްޓަރު ބޭނުންކޮށްގެން، މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ފަށައިފިއެވެ.
ލ. ކައްދޫއިން ފުރައިގެން އެއަތޮޅު މާމެންދޫއަށް ދެ މީހުންނާއެކު ދަތުރުކުރަމުންދިޔަ ޑިންގީއެއް ބަންޑުން ޖަހާލުމާއި ގުޅިގެން ގެއްލިގެން ހޯދަމުންދަނީ 19 އަހަރުގެ އަންހެނެކެވެ. އެމް.އެން.ޑީ.އެފުން ބުނީ އޭނާ ހޯދުމުގެ މަސައްކަތް ކަނޑާއި ވައިގެ މަގުން ކުރަމުންދާކަމަށެވެ. މި ޑިންގީ ބަންޑުން ޖަހާލާފައިވަނީ ގާދޫ ކަނޑުއޮޅިއަށް ކަމަށް ފުލުހުން މަޢުލޫމާތުދެއްވައެވެ.
އެމްއެންޑީއެފުން ވިދާޅުވީ ޑިންގީ ބަންޑުން ޖަހާލި ސަރަޙައްދުގައި ކޯސްޓްގާޑުގެ ޑައިވިންގ ޓީމް މިހާރުވެސް ހަރަކާތްތެރިވަމުންދާކަމަށާއި، އޭނާ ހޯދުމަށް ހެލިކޮޕްޓަރުވެސް ބޭނުންކުރަމުންދާކަމަށެވެ. އަދި މިހާތަނަށް ބަންޑުން ޖަހާލި ޑިންގީއާއި އަންހެން މީހާގެވެސް ޚަބަރެއް ނުވާކަމަށް އެމް.އެން.ޑީ.އެފުން ވިދާޅުވެއެވެ.
ގެއްލިގެން ހޯދަމުންދާ ޒުވާނާއާއެކު ޑިންގީގައި ދަތުރުކުރަމުންދިޔަ ފިރިހެން މީހާ، ވަނީ މި ހާދިސާ ހިނގުމާއެކު ފަތާފައިގޮސް ސިކްސްތް ސެންސަސް ލާމު ރިސޯޓަށް އަރާފައެވެ. އެ ޒުވާނާއާ ހަވާލާދީ ފުލުހުން ވިދާޅުވީ އޭނާ އެހީތެރިކަމެއް ހޯދުމަށް ފަތާފައިގޮސް ރިސޯޓަށް އެރީ އޭނާއާއެކު ދަތުރުކުރި ޒުވާނާއަށް ކަނޑުމަތީގައި އޮވެވޭނެހެން ހަމަކާއި ފޯނެއް ދީފައި ކަމަށެވެ.
އެ ޒުވާނާއަށް މިހާރު ލ.ގަމު ރީޖަނަލް ހޮސްޕިޓަލުގައި ފަރުވާ ދެމުން އަންނަކަމަށްވެސް ފުލުހުން މަޢުލޫމާތުދެއްވައެވެ.
އިއްޔެ އިރުއޮއްސި 6 ޖެހިއިރު ލ.ފޮނަދޫއިން ފުރައިގެން މާމެންދޫއަށް ދަތުރުކުރަމުން ދިޔަ މި ޑިންގީ ބަންޑުންޖަހާލީ ސިކްސް ސެންސަސް ލާމު ރިސޯޓު ކައިރިން ޕެޓްރޯލް ހުސްވެ ޑިންގީ ހުއްޓިގެން ޕެޓްރޯލް އެޅުމުގެ މަސައްކަތްކުރަމުންދަނިކޮށް ޖެހި ރާޅަކާއި އެކީކަމަށް އެމްއެންޑީއެފުން މަޢުލޫމާތުދެއްވައެވެ.