ބޭނުންވަނީ ޗެލްސީގެ ކޯޗުކަމުގައި ގިނަ ދުވަހު ހުންނަން ކަމަށް ޗެލްސީގެ ކޯޗު މައުރީސިއޯ ސަރީ ބުނެފިއެވެ.
ސަރީ މިހެން ބުނީ ނަތީޖާތައް ގޯސްވެ މަގާމުން ވަކިކޮށްފާނެ ކަމުގެ ބިރު ބޮޑުވެފައި ވަނިކޮށެވެ.
ސަރީ ބުނީ ކުލަބުގެ ވެރިޔާ ރޯމަން އަބްރޮމޮވިޗާ ވެސް އޭނާ އަދި ވާހަކަ ނުދައްކާ ކަމަށާއި މަގާމު ސަލާމަތްވާނީ ޓީމު މޮޅުވެގެން ކަމަށެވެ. ސަރީ ބުނީ ޗެލްސީ މިހާރު އޮތީ އަލުން ރޫހު ރަނގަޅުކޮށް އިތުބާރު ގާއިމް ކުރަންވެފައި ކަމަށާއި އެކަން ކުރެވޭނީ ތިން ހަތަރު މެޗުން ޖެހިޖެހިގެން މޮޅުވެގެން ކަމަށެވެ.
މެންޗެސްޓާ ސިޓީ އަތުން 6-0އިން އަދި އެފްއޭކަޕުގައި ޔުނައިޓެޑް އަތުން ބަލިވެ މުބާރާތުން ކަޓާފައިވާއިރު ޗެލްސީ މިވަގުތު އޮތީ ގަދަ ހަތަރަކުން ވެއްޓިފައެވެ.
ސަރީ ބުނީ ކުޅުންތެރިންނާއި އޭނާ ވެސް މަސައްކަތް ކުރަނީ ހާލަތު ބަދަލު ކުރަން ކަމަށާއި މިފަދަ ވަގުތުތަކުގައި ސަޕޯޓަރުން ކެތްތެރިވާން ޖެހޭ ކަމަށެވެ.