ރާއްޖޭގެ ލޯކަލް ޓޫރިޒަމް އިސްތިހާރުކުރުމުގެ ގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވަޑައިގަންނަވާ ޖެޓްސްކީ ދުއްވުމުގެ ޚާއްޞާ ޙަރަކާތެއް ބާއްވަން ނިންމައިފިއެވެ.
ޓޫރިޒަމް މިނިސްޓަރ އަދި ޔޫތު މިނިސްޓްރީ ވަގުތީ ގޮތުން ހިންގެވުމާއި ހަވާލުވެވަޑައިގެން ހުންނެވި ޢަލީ ވަޙީދު ވިދާޅުވީ، މިޚާއްޞަ ޙަރަކާތަކީ ރާއްޖޭގެ ލޯކަލް ޓޫރިޒަމް އިސްތިހާރުކޮށް ގެސްޓް ހައުސްއާއި ރާއްޖޭގެ ރީތިކަން ދައްކާލާ އިސްތިހާރުކުރުމުގެ މަޤްޞަދުގައި ބާއްވާ ޙަރަކާތެއްކަމަށެވެ. މިނިސްޓަރ މިކަން އިޢުލާންކުރެއްވީ ނޫސްވެރިންނާ ބައްދަލުކުރެއްވުމަށް ރޭ ބޭއްވި ޙަރަކާތެއްގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ ޖެޓްސްކީ ދުއްވުމުގެ މި ހަރަކާތަށް މިހާރު ތައްޔާރުވަމުން އަންނަކަމަށާ، މި ހަރަކާތް ޚާއްޞަވަނީ ރާއްޖޭގެ ރައީސަކު މިފަދަ ޙަރަކާތެއްގައި ބައިވެރިވާ މިއީ ފުރަތަމަ ފަހަރުކަމަށްވާތީކަމަށެވެ. މިހަރަކާތުގައި ރާއްޖޭގެ ދެއަތޮޅެއް ހުރަސްކޮށް މާ ކަނޑުގައި ޖެޓްސްކީ ދުއްވާނެކަމަށްވެސް މިނިސްޓަރ އަލީ ވަހީދު ވިދާޅުވިއެވެ.
މިހަރަކާތުގެ ތެރެއިން ރާއްޖޭގެ ލޯކަލް ޓޫރިޒަމް އިސްތިހާރުކުރުމަށް ގިނަ ކަންތައްތަކެއް ހިންގާނެކަމަށްވެސް މިނިސްޓަރ ވިދާޅުވިއެވެ. ޓޫރިޒަމް މިނިސްޓަރ ޢަލީ ވަހީދު ވަނީ ކުޅިވަރުގެ ގިނަ ހަރަކާތްތަކެއްގައި ރައީސް ޞާލިހް ބައިވެރިވެވަޑައިގަންނަވާކަން ފާހަގަކުރައްވާފައެވެ.
ސަރުކާރުން އަންނަނީ ރާއްޖޭގެ ފަތުރުވެރިކަން އިސްތިހާރުކުރުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން ރާއްޖެއިން ބޭރުގެ ގިނަ ފެއަރތަކުގައާއި، ބައިނަލްއަޤްވާމީ އެކި މުބާރާތްތަކާއި ޓީވީ ޗެނަލް ތަކުގައި ރާއްޖެ އިސްތިހާރިކުރުމުގެ މަސައްކަތް ސަރުކާރުން އަންނަނީ ކުރައްވަމުންނެވެ.
މީގެ އިތުރުން ސްޕޯޓްސް ޓޫރިޒަމް ރާއްޖެއަށް ތަޢާރަފްކޮށް ކުރިއެރުވުމަށް ދުނިޔޭގެ މަޝްހޫރު ފުޓްބޯޅަ ކުޅުންތެރިން ރާއްޖެ ގެނައުމަށް ނިންމާފައިވާއިރު، އިނގިރޭސި ޕްރިމިއަ ލީގުގެ ޓީމެއްވެސް ރާއްޖެ އިސްތިހާރުކުރުމުގެ މަޤްޞަދުގައި ރާއްޖެގެނައުމަށް މަސައްކަތްކުރައްވަމުން ގެންދަވާކަމަށް ޓޫރިޒަމް މިނިސްޓަރ ޢަލީ ވަހީދު ވިދާޅުވިއެވެ.