ޗެމްޕިއަންސް ލީގުގައި މިރޭ އަޔެކްސްއާ ދެކޮޅަށް ބްރެޒިލްގެ ޒުވާން ފޯވަޑް ވިނީޝިއަސް އަށް ފުރަތަމަ 11އިން ފުރުސަތުދޭން ރެއާލް މެޑްރިޑުގެ ލޯޗު ސެންތިއާގޯ ސޮލާރީ ނިންމައިފިއެވެ.
މިގޮތަށް ނިންމުމުން ތަޖުރިބާކާރު އަދި އަގުބޮޑު ފޯވަޑް ގެރެތް ބޭލް އިންނާނީ ބެންޗުގައެވެ. ސޮލާރީ ބުނީ ވަރަށް ކުރު މުއްދަތެއްގެ ތެރޭގައި ވިނީޝިއަސް ސްޕޭނާއި ރެއާލް މެޑްރިޑަށް ހޭނިއްޖެ ކަމަށާއި އެންމެ ވާދަވެރި ބާސެލޯނާއާ ދެކޮޅަށް އޭނާ މޮޅަށް ކުޅުނު ކަމަށެވެ.
މިހެންވެ ވަރުގަދަ އަދި ބޮޑެތި މެޗުތަކުގައި އޭނާގެ ފަރާތުން ޓީމަށް ގިނަ ފައިދާތަކެއް ލިބިގެންދާނެ ކަމަށް އުއްމީދު ކުރެވޭ ކަމަށެވެ. ބޭލްއާ ބެހޭ ގޮތުން ސޮލާރީ ބުނީ އެއްވެސް ކުޅުންތެރިއަކަށް ޓީމުން ޖާގަ ޔަގީންނުވާނެ ކަމަށާއި އެކަން ބިނާވާނީ ކުރާ މަސައްކަތުގެ މައްޗަށް ކަމަށެވެ.
މިރޭގެ މެޗަށް އަޔެކްސް ތައްޔާރުވާއިރު ބާސެލޯނާއަށް ސޮއިކޮށްފައިވާ އެ ޓީމުގެ އުއްމީދީ ތަރި ފްރޭންޑް ޑިޔޮގް ފެނުމާމެދު ވަނީ ސުވާލުއުފެދިފަ އެވެ. އެއީ އޭނާ މުޅިން ފިޓްނުވާތީއެވެ. މި ދެ ޓީމު އެންމެ ފަހުން ކުޅުނު ހަ މެޗު ވެސް ކާމިޔާބު ކުރީ އަޔެކްސްއެވެ.