ފެލިވަރުގައި ކާނާ ވިހަވެގެން އުޅޭކަމަށް ބުނާ މައްސަލަ މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ (މިފްކޯ) އިން ދޮގުކޮށްފިއެވެ.
މިފްކޯއިން ނެރެފައިވާ ނޫސްބަޔާނެއްގައި ބުނެފައިވަނީ ފެލިވަރު ކާރުހާނާއަކީ ރާއްޖޭގައި އެންމެ ފުޅާ ދާއިރާއެއްގައި ކާބޯތަކެތި އުފައްދާ ކާރުހާނާއަށްވީހިނދު އެތަނުގެ ސާފުތާހިރުކަން ބައިނަލްއަޤްވާމީ މިންގަނޑުތަކަށް ބަލަހައްޓަމުންއަންނަކަމަށެވެ.
އެހެންކަމުން، ފެލިވަރުގެ މުވައްޒަފުން ކެއިންބުއިމަށް ބޭނުންކުރާ ތަކެއްޗާއި، އެތަކެތި ތައްޔާރުކުރާ ތަނާއި، ބޭނުންކުރާ ވަޞީލަތްތަކުގެ ސަބަބުން މިފަދަ ކަމެއް ހިނގުމަކީ ނާދިރުކަމެއްކަމަށް މިފްކޯއިން ބުނެއެވެ. އަދި ފެލިވަރުގައި ކާނާ ވިހަވުމުގެ ސަބަބުން ގިނަ އަދަދެއްގެ ބަޔަކަށް ފަރުވާދެމުންދާކަމަށް ފެތުރެމުންދާ ވާހަކައަކީ ފުރިހަމަ މަޢުލޫމާތު ނުހޯދައި ފަތުރަމުންދާ ވާހަކަތަކެއް ކަމަށްވެސް އެ ކުންފުނިން ނެރެފައިވާ ނޫސްބަޔާނުގައި ބުނެފައިވެއެވެ.
ނަމަވެސް، މިއަދުގެ ވަގުތެއްގައި ހެލްތު މިނިސްޓްރީން ކޮށްފައިވާ ޓްވީޓެއްގައި ބުނެފައިވަނީ ފެލިވަރުގައި ކާނާ ވިހަވަގެން އުޅޭ ކަމަށް ތުހުމަތު ކުރެވޭ މައްސަލައެއް އެ މިނިސްޓްރީން ބަލަމުން އަންނަ ކަމަށެވެ.