ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިއްގުމުގެ ޤާނޫނަށް ކުރީގެ ސަރުކާރުން ގެނެސްފައިވާ އިޞްލާޙުތަކަކީ ލާމަރުކަޒީ ނިޒާމެއްގެ ތަޞައްވުރާ ދެކޮޅު އިޞްލާޙުތަކެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ. ލާމަރުކަޒީ ނިޒާމް އިޞްލާޙުކުރުމަށް ޚިޔާލު ހޯދުމަށް ސަރުކާރުން ވަނީ އެއްދުވަހުގެ މަހާސިންތައެއް ފަށްޓަވާފައެވެ.
ދިވެހިރާއްޖޭގެ އިދާރީ ދާއިރާތައް ލާމަރުޔކަޒީ އުސޫލުން ހިންގުމުގެ ޤާނޫނަށް 2017 ވަނަ އަހަރު ގެނައި، އިޞްލާޙުގައި ލޯކަލް ގަވަރންމަންޓް އޮތޯރިޓީގެ ބޯޑަށް ކައުންސިލްތަކުން އިންތިޚާބުކުރާ މަޤާމުތައް އުނިކޮށް، މުޅި ބޯޑަކީ ރައްޔިތުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ޢައްޔަނުކުރާ މަޤާމުތަކެއްގެ ގޮތުގައި ވަނީ ބަދަލުކޮށްފައެވެ.
ސިޓީ އަދި އަތޮޅު ކައުންސިލްތަކުގެ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ އެލްޖީއޭ ބޯޑަކީ ކައުންސިލްތަކަށް ކުރިމަތިވާ ގޮންޖެހުންތަކަށް ޙައްލު ހޯދައިދެވޭނެ، އަދި މުޅި ނިޒާމުގެ މުސްތަޤްބަލްވެސް ބައްޓަން ކުރެވޭނެ ބޯޑަކަށް ވާންޖެހޭކަމަށެވެ. ސިޔާސީ މަޤްޞަދުގައި ކައުންސިލަރުން ވަކިކޮށް، ސަސްޕެންޑް ކުރުންފަދަ ކަންކަމުން އެލްޖީއޭ ބޯޑު ދުރުވާންޖެހޭކަމަށް ވިދާޅުވިއެވެ.
"ލާމަރުކަޒީ ޤާނޫނަށް ގެނައި ތިންވަނަ އިޞްލާޙަކީވެސް، ފުރިހަމަ ލާމަރުކަޒީ ނިޒާމެއްގެ ތަޞައްވުރާ މުޅީން އިދިކީލި އިޞްލާޙެއް. އެ އިޞްލާޙުގައި މި ބުނަނީ، ސިޓީ ކައުންސިލްގެ ބާރުތަކާއި، ސިޓީ ކައުންސިލުން ދޭނެ ޚިދުމަތްތައް ކަނޑައަޅާނީ، ވަޒީރުންގެ މަޖިލީހުގެ މަޝްވަރާއާއެކު، ރައީސުލްޖުމްހޫރިއްޔާ ކަމަށް. އަދި އެޚިދުމަތްތައް ފޯރުކޮށްދޭނީ، ސަރުކާރުގެ ކަމާބެހޭ ވުޒާރާތަކުން ކަނޑައަޅާ ގޮތެއްގެ މަތިންކަމަށް. މީގައި ކޮބައިތޯ ކައުންސިލްތަކަށް އޮތް ބާރަކީ؟ ކޮބައިތޯ ކައުންސިލްތަކަށް އޮތް އިޚްތިޔާރަކީ؟ މިގޮތަށް ކައުންސިލްތަކުގެ ބާރުތައް، މަރުކަޒީ ސަރުކާރަށް ނެގުމުން، ކައުންސިލްތަކުގެ ދައުރަކަށް ވަނީ އެއްވެސް މާނައެއް ނެތް ދައުރަކަށް ނޫންތޯ! މިއީ ހަމަގައިމުވެސް އަޅުގަނޑު ދަންނަ ލާމަރުކަޒީ ނިޒާމެއްގައި، ކަންކަން ހުންނަ ގޮތެއް ނޫން." ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ދައުރުގެ މެދުތެރެއިން ރަށެއް ސިޓީއަކަށް ބަދަލުވާ ޙާލަތުގައި، އަތޮޅުގެ ވެރިކަން ކުރާނެ ރަށެއް ކަނޑައަޅާނެ މިންގަނޑެއް މިހާރު ޤާނޫނުގައި ނެތްކަމަށެވެ. އެމަނިކުފާނު މިހެން ވިދާޅުވެފައި މިވަނީ ސިޓީއެއްގެ ދަރަޖަ ކަނޑައެޅުމަށް ކުޅުދުއްފުށީ އާބާދީ ހަމަވިނަމަވެސް ސިޓީއެއްގެ ދަރަޖަ ދިނުމަށް ޤާނޫނީ ހުރަސްތަކެއް ކުރިމަތިވެފައިވާ ދަނޑިވަޅެއްގައެވެެ. ރައީސް ވިދާޅުވީ، ލާމަރުކަޒީ ޤާނޫނު އިޞްލާޙުކުރާއިރު، މުޅި ނިޒާމު އެކުގައި އިޞްލާޙުވެގެންދާން ބޭނުންފުޅުވާކަމަށެވެ.
"ޢާންމު ގޮތެއްގައި އަތޮޅުވެރިކަން މި އޮންނަނީ، އެ އަތޮޅެއްގެ އާބާދީ އެންމެ ބޮޑު ރަށުގައި. މި ދެންނެވި ރަށް، ދައުރުގެ މެދުތެރެއިން ސިޓީއަކަށް ބަދަލުވާ ޙާލަތުގައި، އަތޮޅުގެ ވެރިކަން ކުރާނެ ރަށެއް ކަނޑައަޅާނެ މިންގަނޑަކީ ކޮބައިކަން ދެނެގަންނާނީ ކޮންގޮތަކަށްތޯ؟ އެފަދަ ރަށެއްގައި ސިޓީ ކައުންސިލެއް ކަނޑައަޅާނީ ކިހިނެއްތޯ؟ ސިޓީ ކައުންސިލެއް އުފައްދާނެ ހަމައެކަނި މިންގަނޑަކީ އާބާދީތޯ؟" ރައީސް ވިދާޅުވިއެވެ.
ރައީސްވަނީ ލާމަރުކަޒީ ނިޒާމު ފުރިހަމަކުރުމަށްޓަކައި، ބޮޑެތި އިސްލާޙުތަކެއް ގެންނަވާނެކަމަށް ވިދާޅުވެފައެވެ. މިރަސްމިއްޔާތުގައި ވާހަކަފުޅު ދައްކަވަމުން އެލްޖީއޭގެ ރައީސް ހޯމް މިނިސްޓަރ އިމްރާން ޢަބްދުﷲ ވިދާޅުވީ، ރާއްޖޭގެ އާބާދީގެ ބޮޑު ބައެއް ދިރިއުޅޭނީ އަތޮޅުތަކުގައިކަމަށާއި، އެހެންކަމުން ރައްޔިތުންނާއި ވީހާވެސް ގާތުން ޚިދުމަތް ފޯރުކޮށްދޭންޖެހޭކަމަށެވެ. އެކަމަށް މިހާރުގެ ލާމަރުކަޒީ ޤާނޫނުގައި ގޮންޖެހުންތަކެއް އެބަހުރިކަމަށާއި، މަހާސިންތާއި ހޯދޭ ޚިޔާލާއެކު މި ނިޒާމް ފުރިހަމަވެގެންދާއިރު ސަރުކާރުގެ ވަޢުދާ އެއްގޮތަށް ވީހާވެސް ކައިރިން ޚިދުމަތް ދެވޭނެކަމަށް ޤަބޫލުކުރައްވާކަމަށެވެ.
"މިސަރުކާރުގެ އެންމެ މުހިންމު އެއްވަޢުދަކީ ރައްޔިތުންނާއި ފަސޭހައިން، ގާތުން ތަރައްޤީގެ ޚިދުމަތްތައް ފޯރުކޮށްދިނުން. މި އަމާޒށްވާސިލްވުމަށް ސަރުކާރުގެ 100ދުވަހުގެ ތެރޭގެ ވަޢުދުގައި ހިމެނޭ އެންމެ މުހިންމުކަމަކީ ލާމަރުކަޒީ ޤާނޫނަށް ހެޔޮވެގެންވާ ރަނގަޅު އިޞްލާހުތައް ގެނައުން. މިމަހާސިންތާ ނިމޭއިރު މިނިޒާމަށް ހަރުދަނާ ކަން ގެނައުމަށް މުހިންމު ބަދަލުތަކެއް ގެނެވޭނެކަމަށް." ރައީސް ވިދާޅުވިއެވެ.
ސިޓީ އަދި އަތޮޅު ކައުންސިލްތަކުގެ މަހާސިންތާގައި 18 އަތޮޅު ކައުންސިލްގެ ރައީސުންނާއި، ހުރިހާ ސިޓީ ކައުންސިލްތަކުންނާއި، ރަށު ކައުންސިލްތައް ތަމްސީލްކުރާ 8 އަންހެން ކައުންސިލަރުން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން 8 މެންބަރުން ބައިވެރިވިއެވެ.