ރާއްޖޭގެ އިޤްތިޞާދީ ދުވެލި ކުރިއަރަމުން އަންނައިރު، ތަރައްޤީގެ ދުވެލި ބަރުހެލިވެގެން އުޅެނީ، މަރުކަޒީ އުސޫލު ދޫކޮށްނުލުމުގެ ސަބަބުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ލާމަރުކަޒީ ޤާނޫނު އިޞްލާޙް ކުރަން ރައްޔިތުން މަޖިލީހަށް ހުށަހެޅުމުގެ ކުރިން އެކަމަށް ތައްޔާރުވުމަށްޓަކައި ސިޓީ އަދި އަތޮޅު ކައުންސިލްތަކުގެ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ސިޓީ އަދި އަތޮޅު ކައުންސިލްތަކުގެ މަހާސިންތާ ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވާހަކަފުޅު ފެށްޓެވީ، ރާއްޖޭގެ އިޤްތިޞާދީ ދުވެލި ހުރިގޮތާއި، ރާއްޖޭގެ އާބާދީ އިތުރުވަމުން އަންނަ މިންވަރަށް ބަލާ ތަރައްޤީގެ މިސްރާބު މިހާރުން މިހާރަށް ބަދަލުކުރާން ޖެހިފައިވާކަމަށް ވިދާޅުވަމުންނެވެ.
ރައީސް ވިދާޅުވީ، އެ ބަދަލު ނުގެނެސްފިނަމަ 2050ވަނަ އަހަރާ ހަމަޔަށް ދާއިރު، ރާއްޖޭގެ އާބާދީގެ %60 ދިރިއުޅޭނީ ތޮއްޖެހިފައިވާ މާލޭގައިކަމަށެވެ. އެއީ ކުރެވޭނެ ކަމެއް ނޫންކަން ފާހަގަކުރައްވަމުން ރައީސް ވިދާޅުވީ، އިޖްތިމާޢީ އެތައް މައްސަލަތަކެއްވެސް އެކަމުގެ ސަބަބުން ކުރިމަތިވާނެކަމަށެވެ. މާލެއަށް ދިމާވެފައިވާ ތޮއްޖެހުމާއި، އިޖްތިމާޢީ ގިނަ މައްސަލަތަކުގެ އަސްލަކީވެސް، ވެރިކަން ކުރުމުގައި ޒަމާނުއްސުރެ ގެންގުޅުނު މަރުކަޒީ ވިސްނުންކަމަށް ރައީސް ސިފަކުރެއްވިއެވެ.
ލާމަރުކަޒީ ނިޒާމަށް 10 އަހަރު ފުރިގެންދިޔައިރު، އެންމެ އެދެވޭގޮތުގައި ކައުންސިލްތައް ނުހިނގުމަށް ދިމާވި ސަބަބަކީ، ސިޔާސީގޮތުން ލާމަރުކަޒު ކުރިނަމަވެސް، ތަންފީޒީ މަރުޙަލާގައި، ގިނަ ކަންކަން އަދިވެސް ލާމަރުކަޒު ނުކުރެވޭތީކަމަށް ރައީސް ވިދާޅުވިއެވެ. ލާމަރުކަޒީ ކުރުމަކީ، ކައުންސިލްތަކެއް އުފައްދާ، ކައުންސިލަރުންތަކެއް އިންތިޚާބުކުރުން ނޫންކަމަށާއި، އެ ކައުންސިލްތަކަށް އިދާރީ ބާރުވެރިކަމާއި، މާލީ ބާރުވެރިކަން ދޭންޖެހޭކަމަށް ރައީސް ވިދާޅުވިއެވެ. ރައީސް ޞާލިޙް ވަނީ އަންހެނުން ބާރުވެރިކުރެވޭނެ ގޮތްތައް ނެތި، ގެނެވޭ ލާމަރުކަޒީ ނިޒާމަކީވެސް ޙަޤީޤީ ލާމަރުކަޒީ ނިޒާމެއް ނޫންކަމަށްވެސް ވިދާޅުވެފައެވެ.
"ޤާނޫނުގައި ބަޔާންކުރާ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ދައުރު އަދި ބާރުތައްވެސް، މިހާރަށްވުރެ ހަރުދަނާ ކުރަންޖެހޭ ކަމަށް އަޅުގަނޑު ގަބޫލުކުރަން. އެނޫން ގޮތަކަށް ތަރައްޤީގައި އަންހެނުންގެ ބައިވެރިވުމާއި ޙިއްޞާ އިތުރުކުރުމަކީ، ވަރަށް އުނދަގޫ ކަމަކަށް ވާނެ." ރައީސް ވިދާޅުވިއެވެ.
ރައީސް ޞާލިޙް ވިދާޅުވީ، މާލީގޮތުން ކައުންސިލްތައް ބާރުވެރިކޮށްގެން ނޫނީ، ލާމަރުކަޒީ ނިޒާމު ފުރިހަމައެއްނުވާނެކަމަށާއި، އެހެންކަމުން ރަށްރަށުގެ މުނިސިޕަލް ޚިދުމަތްތަކުން ނަގާ ފީތަކަކީ، އެރަށްރަށުގެ އެފަދަ ޚިދުމަތްތައް ތަރައްޤީކުރުމަށް ހޭދަކުރެވޭ އެއްޗަކަށް ވާންޖެހޭނެކަމަށެވެ.
"ރަށްރަށުގެ މުނިސިޕަލް ޚިދުމަތްތައް ފޯރުކޮށްދިނުމުގައި ދިމާވާ މައްސަލަތައް ޙައްލުކުރުމާމެދު ސަރުކާރުން މި އަންނަނީ މަޝްވަރާ ކުރަމުން. ކެމްޕެއިނުގައިވެސް އަޅުގަނޑު ވައުދުވީ ފަދައިން، ގްރީން ޓެކުހުން ލިބޭ އާމްދަނީ ޚަރަދުކުރާނީ، ތިމާވެށީގެ މައްސަލަތައް ޙައްލުކުރުމަށާއި، ސާފު ބޯފެނާއި ނަރުދަމާ، އަދި ރައްކާތެރިގޮތުގައި ކުނި ނައްތާލުމުގެ މަސައްކަތްތަކަށް." ރައީސް ވިދާޅުވިއެވެ.
ރައީސް ވިދާޅުވީ، ލާމަރުކަޒީ ކުރުމަކީ، ރަށު އޮފީހުގެ ނަން، ކައުންސިލް އިދާރާގެ ނަމަށް ބަދަލުކޮށްލުން ނޫންކަމަށާއި، އެމަނިކުފާނުގެ ތަޞައްވުރުގައި ލާމަރުކަޒީ ނިޒާމަކީ، މުޅި ރަށް ނުވަތަ މުޅި ސިޓީގެ ހުރިހާ ކަމެއް، އެ ތަނެއްގެ ރައްޔިތުން ބޭނުންވާގޮތަކަށް ރާވައި ހިންގުމުގެ ހުރިހާ ބާރަކާއި އިޚްތިޔާރެއް، އެތަނެއްގައި ދިރިއުޅޭ ބައެއްގެ އަތްމައްޗަށް ދޫކޮށްލުންކަމަށެވެ.
"އަޅުގަނޑުމެން ވެރިކަމަށް އިސްކުރީ، މި ރާއްޖޭގެ ރައްޔިތުން. އެއީ ރައްޔިތުން އެދޭފަދަ ވެރިކަމެއް ކޮށްދިނުމަށް. ރައްޔިތުން އެދެނީ ހަލުވި ދުވެލީގައި ތަރައްޤީގެ އައްސޭރި އަތުލަން. އިޤްތިޞާދީ ދުވެލި އަހަރުން އަހަރަށް މަތިވަމުންދާއިރުވެސް، ތަރައްޤީގެ ދުވެލި ބަރުހެލިވެގެން މިއުޅެނީ، މަރުކަޒީ އުސޫލު ދޫކޮށް، ލާމަރުކަޒީ ކުރަން ނުކެރިގެން." ރައީސް ވިދާޅުވިއެވެ.
ރައީސް ވިދާޅުވީ، ރައްޔިތުން އެދޭފަދަ އިސްލާޙުތަކާއެކު ފުރިހަމަ ލާމަރުކަޒީ އުސޫލުން ހިންގުމުގެ ހިތްވަރު އެމަނިކުފާނުގެ އެބަހުންނެވިކަމަށެވެ.