ކުރީގެ ރައީސް މައުމޫން ޢަބްދުލްޤައްޔޫމް އިސްވެ ހުންނަވައިގެން ސިޔާސީ ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށަހަޅުއްވައިފިއެވެ.
ޕާޓީއެއް އުފެއްދުމަށްޓަކައި ރައީސް މައުމޫނުގެ ފަރާތްޕުޅުން އިލެކްޝަންސް ކޮމިޝަނަށް ފޯމް ހުށަހަޅުއްވާފައިވަނީ މިއަދުކަމަށް އެމަނިކުފާނުގެ ސިޔާސީ ޙަރަކާތް (އެމްއާރުއެމް)އިން ބުނެއެވެ. މިޕާޓީ އުފެއްދުމުގެ ހުއްދައަށް އެދިވަޑައިގަތީ މިހާރުގެ ހަޔަރއެޑިއުކޭޝަން މިނިސްޓަރ ޑރ.އިބްރާހީމް ޙަސަނެވެ.
ރައީސް މައުމޫން އިސްވެ ސިޔާސީ ޕާޓީއެއް އުފެއްދުމަށް ނިންމަވާފައި މިވަނީ، އެމަނިކުފާނު ކުރިން އުފެއްދެވި ޕީއެމްގެ ހިންގުން ރައީސް މައުމޫނާ ޙަވާލުކުރުމަށް އެދި ސިވިލް ކޯޓަށް ހުށަހަޅާފައިވާ މައްސަލައިގެ ދަޢުވާ ސުޕްރީމް ކޯޓުން ބާޠިލްކުރުމާއި ގުޅިގެންނެވެ.
އެމްއާރުއެމް ސިޔާސީ ޕާޓީއަކަށް ބަދަލުކުރުމަށް މަސައްކަތް ފެށިނަމަވެސް ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ރައީސް މައުމޫންގެ ފަރާތްޕުޅުން ކެނޑިޑޭޓުން ވާދަކުރާނީ މިނިވަން ކެނޑިޑޭޓުންގެ ގޮތުގައިކަމަށް އެޙަރަކާތުން ވަނީ ބުނެފައެވެ.
ރައީސް މައުމޫނުގެ ތާޢީދާއެކު މަޖިލިސް އިންތުޚާބުގައި، 45 ދާއިރާއަކަށް ވާދަކުރުމަށް ކެނޑިޑޭޓުން ޝައުޤުވެރިކަން ފާޅުކޮށްފައިވެއެވެ.