މިނިވަންކަން ގެއްލެން މަގުފަހިވާ އެއްކަމަކީ ވެރިމީހާ ރައްޔިތުންނަށް އަނިޔާވެރިވުން - ހޯމް މިނިސްޓަރ

ޤައުމުގެ މިނިވަންކަމާއި ސިޔާދަތު ގެއްލިގެން ދިޔުމަށް މަގުފަހިވާ އެއްކަމަކީ ވެރިކަމުގެފަރާތުން ރައްޔިތުންގެ މައްޗަށް އަނިޔާވެރިވުންކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ. މިނިސްޓަރ މިހެން ވިދާޅުވީ، 1440 ވަނަ އަހަރުގެ ހުރަވީ ދުވަހުގެ މުނާސަބަތުގައި ދެއްވި ޚިޠާބުގައެވެ.

ހޯމް މިނިސްޓަރ ވިދާޅުވީ، ޤައުމެއްގެ މިނިވަންކަމާއި ސިޔާދަތު ގެއްލި، އަޅުވެތިކަމުގެ އަނދިރިކަމުގެ ތެރެއަށް ގެނބިގެން ދިޔުމަށް މަގުފަހިވާ އެއްކަމަކީ ވެރިކަމުގެ ފަރާތުން ރައްޔިތުންގެ މައްޗަށް އަނިޔާވެރިކަން އިސްކުރުންކަމަށެވެ. އަދި ބޭއިންސާފާއި ފަސާދަ އާންމުކޮށް، ރައްޔިތުންނަށް ތަޙައްމަލުކުރަން ނުކުޅަދާނަ ޙާލަތު މެދުވެރިކުރުންކަމަށްވެސް މިނިސްޓަރ ވިދާޅުވިއެވެ. އެހެންކަމުން ޤައުމުގެ ސަލާމަތާއި ރައްކާތެރިކަމަށްވެސް އެންމެ މުހިންމު އެންމެ އަސާސީ ރުކުނަކީ ފަސާދައިން އެއްކިބާވެފައިވާ ދެފުށްފެންނަ ހެޔޮވެރިކަމެއްކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވިއެވެ.

"ދިވެހި ލޮބުވެތި ރައްޔިތުން! ދިވެހި ޤައުމުގެ ޒުވާނުން! މިރާއްޖޭގެ މިނިވަންކަމާއި އިސްތިޤުލާލު ގެއްލިގެންދިޔުމާއި އަދި އެ މިނިވަންކަން އަނބުރާ އިޔާދަކުރުމަށްޓަކައި ކާބަފައިން ކުރެއްވި މަތިވެރި ޖިހާދުގެ ޒިކުރާ އާކުރާ މިފަދަ ދަނޑިވަޅެއްގައި ކޮންމެހެން ވިސްނާފިކުރު ހިންގަންޖެހޭ ކަންކަން އެބަހުރި. ތަރައްޤީގެ މަގުގައި ފިޔަވަޅަކަށްފަހު ފިޔަވަޅެއް އަޅަމުން، ބަވަނަވެފައިވާ ދުނިޔޭގައި، ބައިނަލްއަޤުވާމީ މުޖުތަމަޢުގެ ބައިވެރިއެއްގެ ގޮތުގައި ކުރިޔަށްދާއިރު އަޅުގަނޑުމެންގެ މިނިވަންކަމާއި ސިޔާދަތަށް ބުރުއަރާފާނެ ކަންކަމާމެދު ހުޝިޔާރުވާންޖެހޭ! އެފަދަ ކަންކަމަކީ ކޮބައިކަން ދެނެގަނެ، އަޅަންވާ ފިޔަވަޅުތައް އަޅާ، ރައްކާތެރިވާން ޖެހޭ!". ހޯމް މިނިސްޓަރ ވިދާޅުވިއެވެ.

ހުރަވީދުވަހާއި، ހުރަވީދުވާހާ ގުޅިފައިވާ ޙާދިސާތަކުން އުނގަންނާދޭ ފިލާވަޅަކީ، ދިވެހި ޤައުމުގެ މިނިވަންކަމާ އިސްތިޤުލާލު ޙިމާޔަތްކޮށް ރައްކާތެރިކުރުމަށްޓަކައި ކޮންމެ ފަރުދަކީވެސް ދީނާއި ޤައުމުދެކެ ލޯބިވާ މީހަކަށްވުމަށް ހޯމް މިނިސްޓަރ ގޮވާލެއްވިއެވެ.

މިނިސްޓަރ ވިދާޅުވީ، ވެރިކަމުގެ ދަހިވެތިކަމުގައި އަމިއްލަ ދީނާއި ޤައުމާއި ރައްޔިތުން ޤުރުބާންކޮށް، އަމިއްލަވަންތަކަމާއި އިސްތިޤުލާލު ވެއްޔާ މޮޑެލަން ފަސްނުޖެހޭ ބަޔަކު މިރާއްޖޭގައި އުޅެފައިވާކަމަކީ ޙަޤީޤަތެއްކަމަށާއި، މާޒީއިން ޢިބުރަތްލިބިގަތުމަކީ މުސްތަޤުބަލް އުޖާލާކުރުމަށްޓަކައި އަޅަންއޮތް އެންމެ މުހިންމު ފިޔަވަޅުކަމަށެވެ. އެކަންކަމަށް ރިއާޔަތްކޮށްގެން ރާއްޖޭގެ ކުރިމަގު ބައްޓަންކުރުމަކީ ސިޔާސަތު ކަނޑައަޅާފަރާތްތަކާއި މުދައްރިސުންނާއި މައިންބަފައިންގެ ކޮނޑުގައި އެޅިފައިވާ މައްސޫލިއްޔަތެއްކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވިއެވެ.