މާލޭގެ ހުސްޖާގަ އިތުރުކުރުމަށް ސަރުކާރުގެ އިތުރު އެއްވެސް ޢިމާރާތެއް މާލޭގައި ނުހެދުމަށް ނިންމާފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސްކަމާއި ހަވާލުވެވަޑައިގަތުމަށްފަހު ދެއްވި ފުރަތަމަ ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، މާލޭގެ ހަލަބޮލިކަމާއި ދަތިތަކަމުގެ އަސަރު މުޅި ރާއްޖެއަށް ކުރާކަމަށެވެ. އެހެންކަމުން މާލޭގެ ތޮއްޖެހުން ނައްތާލައި، މާލެއަކީ މާލޭގައި ދިރިއުޅޭ މީހުންނަށާއި، މާލެއަށް ޒިޔާރަތްކުރާ މީހުންނަށްވެސް ހިތްފަސޭހަ އަމާން މާޙައުލަކަށް ހެދުމުގެ ގޮތުން ސަރުކާރުގެ ސިޔާސަތުތަކަށް ބޮޑެތި ބަދަލުތަކެއް ގެނެސްފައިވާކަން އެމަނިކުފާނު ފާހަގަކުރެއްވިއެވެ.
ރައީސް ޞާލިޙު ވިދާޅުވީ، މާލޭގައި ހުސްޖާގަ އިތުރުކުރުމަށް ސަރުކާރުގެ އިތުރު އެއްވެސް ޢިމާރާތެއް ނުހެދުމަށް ސަރުކާރުން ނިންމާފައިވާކަމަށެވެ. އަދި މާލޭގައި މިހާރު ހުރި ބައެއް ބިންތައް ހުސްކޮށް، އެތަންތަން ޖަޒީރާވަންތައް މާޙައުލަކަށް ބަދަލުކުރައްވާނެކަމަށްވެސް އެމަނިކުފާނު ވިދާޅުވިއެވެ.
""މާލޭގައި ހުސް ޖާގަ އިތުރުކުރުމަށް ސަރުކާރުގެ އިތުރު އެއްވެސް ޢިމާރާތެއް ނުހެދުމަށް މި ސަރުކާރުން ވަނީ ނިންމާފައި. އަދި މާލޭގައި މިހާރު ހުރި ބައެއް ބިންތައް ހުސްކޮށް، ހުރިހާ އުމުރުފުރައެއްގެ މީހުންނަށްވެސް އަމާންކަމާއެކީ އުޅެވޭ ފަދަ ޖަޒީރާ މާޙައުލަކަށް ބަދަލުކުރެވޭނެ"ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ތިލަފުށީގައި ތަރައްޤީކުރާ ޒަމާނީ ފެންވަރުގެ ބަނދަރާއެކު މާލޭގައި ހުރި ގުދަންތަކާއި ސިނާޢީ އެކި މަސައްކަތް ކުރާ ގިނަ ތަންތަން މާލެއިން ބޭރުވެ، މާލޭގެ ތޮއްޖެހުމަށް ބޮޑު ލުޔެއް ލިބިގެންދާނެކަމަށެވެ. ހަމައެހެންމެ މާލެއަކީ ހިނގާބިނގާވެއުޅޭ މީހުންނަށްވެސް އަމާން ތަނަކަށް ހެދުމުގެ ގޮތުން، މާލޭގައި މިނީ ބަހުގެ ޚިދުމަތް ދިނުމަށްޓަކައި ކުރަންޖެހޭ މަސައްކަތްތައް މިހާރު ފަށާފައިވާކަމަށާއި، އެކަމަށް ބޭނުންކުރުމަށް ނިންމާފައިވަނީ ތިމާވެށްޓާ ރައްޓެހި ބަސްތަކެއްކަމަށް ރައީސް ވިދާޅުވިއެވެ.