މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަނުން ތަހްޤީޤުކުރާ މަސައްލައަކާއި ގުޅިގެން ދެމީހަކު ހޯދަން އާންމުކުރި ވީޑިއޯއިން ފެންނަ ދެމީހުންނާއި ގުޅޭ ވަރަށް ގިނަ މަޢުލޫމާތު ލިބިފައިވާ ކަމަށް އެ ކޮމިޝަނުން މިއަދު ބުނެފިއެވެ.
ރިޔާސީ ކޮމިޝަންގެ ރައީސް ހުސްނުއް ސުޢޫދު ވިދާޅުވީ، އެ ވީޑިއޯން ފެންނަ ދެމީހުންނާ ގުޅޭ ގިނަ މަޢޫލޫމާތުތަކެއް ގިނަ ބަޔަކު އެކޮމިޝަނާއި ޙިއްޞާކޮށްފައިވާ ކަމަށެވެ. އަދި ކަމާގުޅުންހުރި ފަރާތްތަކާއި ގުޅިގެން އެ މައްސަލަ އިތުރަށް ތަޙުޤޤީޤް ކުރަމުން އަންނަކަމަށް ސުޢޫދު ވިދާޅުވިއެވެ.
މަރުތަކުގެ މައްސަލަ ބަލާ ރިޔާސީ ކޮމިޝަނުން ޢާންމުކުރި ވީޑިއޯއަކީ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ އަވަހާރަކޮށްލި މައްސަލައާއި ގުޅިގެން ވީޑިއޯއެއްކަމަށް ބައެއް މީޑިއާ ބުނެއެވެ.
މިދިޔަ މަހުގެ 21 ވަނަ ދުވަހު ރިޔާސީ ކޮމިޝަނުން ޢާންމުކުރި ވީޑިއޯއިން ފެންނަނީ ސައިކަލެއްގައި މަޑުކޮށްލައިގެން ފޯނެއްގައި މީހަކު އިންނަތަނެވެ. އަދި ދެވަނަ މީހަކު އައިސް މަޑުކޮށްލުމުން ސައިކަލުގައި އިން މީހާ ސައިކަލުގައި ދުވާފައިދާ މަންޒަރު އެ ވީޑިއޯއިން ފެނެއެވެ. އަދި ފަހުން އައި މީހާ އެތަނުގައި ފޯނެއްގައި އިންނަ މަންޒަރު ވީޑިއޯ އިން ފެނެއެވެ.
މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރުމަށް ރައީސުލްޖުމްހޫރިއްޔާ އުފައްދަވާފައިވާ ކޮމިޝަނުން 25 މަރުގެ މައްސަލައެއް ބަލަމުން އަންނަކަމަށް ވަނީ ވިދާޅުވެފައެވެ.