މޯލްޑިވްސް އިސްލާމިކް ބެންކުގެ ހުރިހާ ޙިދުމަތެއް އެބެންކުގެ ހެޑް އޮފީހުން ފޯރުކޮށްދިނުމަށް މަސައްކަތް ކުރަމުންދާކަމަށް އެ ބެންކުން ބުނެފިއެވެ.
މޯލްޑިވްސް އިސްލާމިކް ބެންކުގެ ޙިދުމަތް ކަސްޓަމަރުންނަށް 2 ޢިމާރާތަކުން ފޯރުކޮށްދެމުންދާއިރު، އެކަމުގެ ސަބަބުން ކަސްޓަމަރުންނަށް ދަތިތަކެއް ކުރިމަތިވަމުން އަންނަކަމަށް އިސްލާމިކް ބޭންކުން ބުނެއެވެ. އެހެންކަމުން މިމަސް ނިމުމުގެ ހެންވޭރު މެދުޒިޔާރަތްދޮށުގޭގައި ހުންނަ ބެންކުގެ އައު ހެޑް އޮފީހުން އިސްލާމިކް ބެންކުގެ ހުރިހާ ޚިދުމަތެއް ފޯރުކޮށްދޭން ފެށުމަށް މަސައްކަތްކުރަމުންދާކަމަށް އިސްލާމިކް ބެންކުން މަޢުލޫމާތުދެއެވެ.
އިސްލާމިކް ބެންކުން މިހާރު ފޯރުކޮށްދެމުން އަންނަ ޚިދުމަތްތަކުގެ ތެރެއިން އެކައުންޓް ހުޅުވުމާއި، ފައިސާ ޖަމާކުރުމުގެ ޙިދުމަތް ދެމުންއައީ ހ. ކޮކޮނަޓް ވިލާގައި ހުންނަ އިސްލާމިކް ބެންކުގެ އޮފީހުންނެވެ. އަދި ފައިނޭންސްއާއި ގުޅުންހުރި ޙިދުމަތްތައް ދެމުންއައީ ޕޯސްޓް ބިލްޑިންގ ގައި ހުންނަ އިސްލާމިކް ބެންކުގެ އޮފީހުންނެވެ. ޕޯސްޓް ބިލްޑިންގ ގައި ދެމުންދިޔަ އިސްލާމިކް ބެންކުގެ ހުރިހާ ޙިދުމަތެއް މިހާރު އިސްލާމިކް ބެންކުގެ އައު ހެޑްއޮފީހަށް ބަދަލުކޮށްފައިވާކަމަށް ބެންކުން ބުނެއެވެ.
ހުރިހާ ޚިދުމަތެއް އެއް އޮފީހަކުން ލިބޭނެ އިންތިޒާމް ހަމަޖައްސަނީ ކަސްޓަމަރުންނަށް ފަސޭހަވާނޭގޮތަށް އަވަސް ޙިދުމަތެއްދީ، ބެންކުގެ ޙިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިންކަމަށް މޯލްޑިވްސް އިސްލާމިކް ބެންކުން ބުނެއެވެ.