ކުރިއަށްއޮތް ރައްޔިތުންގެ މަޖިލީހުގެ އިންތިޚާބުގައި އޮބްޒާވަރެއްގެ ދައުރު އަދާކުރުމުގެ ޝައުޤުވެރިކަން ކޮމަންވެލްތުން ފާޅުކޮށްފިއެވެ. ފޮރިން މިނިސްޓަރު ޢަބްދުﷲ ޝާހިދު މިހާރު އިނގިރޭސިވިލާތަށް ކުރައްވަމުންގެންދަވާ ދަތުރުގައި ކޮމަންވެލްތުގެ ސެކެޓްރީ ޖެނެރަލް ޕެޓްރީޝިއާ ސްކޮޓްލޭންޑާ ވަނި ބައްދަލުކުރައްވައި ކޮމަންވެލްތުގައި ރާއްޖެއިން ބައިވެރިވުން އަވަސްކުރުމަށް މަޝްވަރާކުރައްވާފައެވެ.
މި ބައްދަލުކުރެއްވުމުގައި މިނިސްޓަރ ޝާހިދު ވަނީ، ކޮމަންވެލްތުގައި ރާއްޖެއިން ބައިވެރިވުން އަވަސްކުރުމަަށް މަޝްވަރާކުރެއްވިއެވެ. އެގޮތުން ކޮމަންވެލްތުގައި ބައިވެރިވުމަށް ރާއްޖެއިން މިވަގުތު އޮތީ ތައްޔާރަށްކަމަށާ، އެކަމަށް ރާއްޖެއިން ދޭންޖެހޭ ފުރުހަމަ އެއްބާރުލުން ދެއްވާނެކަމަށެވެ.
މި ބައްދަލުވުމުގައި ކޮމަންވެލްތުގެ ސެކެޓްރީ ޖެނެރަލް ޕެޓްރީޝިއާ ސްކޮޓްލޭންޑް ދެއްކެވި ވާހަކަފުޅުގައި ވަނީ ދިވެހިރާއްޖެއިން އަލުން ކޮމަންވެލތުގައި ބައިވެރިވުމަށް ނިންމުމާގުޅިގެން ރައީސް އިބްރާހީމް މުޙައްމަދު ޞާލިޙަށް މަރުޙަބާ ދަންނަވާފައެެވެ.
އަދި ވިހާވެސް އަވަހަށް ކޮމަންވެލްތުގެ މެންބަރެއްގެ ގޮތުގައި ރާއްޖެ ހެދުމަށް މަސައްކަތްކުރައްވަމުން ގެންދަވާކަމަށްވެސް ޕެޓްރީޝިއާ ސްކޮޓްލޭންޑް ވިދާޅުވިއެވެ. އެކަމަނާވަނީ ރާއްޖޭގައި ބާއްވާ ރައްޔިތުންގެ މަޖިލީހުގެ އިންތިޚާބުގައި އޮބްޒާވަރެއްގެ ދައުރު އަދާކުރުމުގެ ޝަޢުޤުވެރިކަންވެސް ފާޅުކުރައްވާފައެވެ.