އެންމެ ކުޑަ އުޖޫރަ ކަނޑައަޅާނީ ހުރިހާ ފަރާތްތަކުގެ މަޝްވަރާ ހޯދައިގެން - އިކޮނޮމިކް މިނިސްޓަރ
ރާއްޖޭގައި މަސައްކަތްކުރާ މަސައްކަތްތެރިންނަށް ދޭނެ އެންމެ ކުޑަ އުޖޫރައެއް ކަނޑައަޅާނީ ހުރިހާ ފަރާތްތައް ހިމެނޭގޮތުން މަޝްވަރާ ހޯދައިގެންކަމަށް އިކޮނޮމިކް މިނިސްޓަރ ފައްޔާޞު އިސްމާޢިލް ވިދާޅުވެއްޖެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓަރ ފައްޔާޞު އިސްމާޢިލް ވިދާޅުވީ، އެންމެ ކުޑަ އުޖޫރަ ކަނޑައެޅުމަށް އެކުލަވާލަންޖެހޭ ބޯޑު އެކުލަވާލުމަށް މިހާރު ރައީސް ހުއްދަ ދެއްވާފައިވާކަމަށެވެ. އަދި ވަރަށް އަވަހަށް މި ބޯޑު އެކުލެވިގެންދާނެކަމަށް މިނިސްޓަރ ވިދާޅުވިއެވެ.
މި ބޯޑު އެކުލެވިގެންދާއިރު ބޯޑުގައި ހިމެނޭނީ މުޅި ޖުމްލަ 5 މެންބަރުންނެވެ. މިނިސްޓަރ ފައްޔާޞު ވިދާޅުވީ، ބޯޑު އެކުލެވިގެންދާއިރު ބޯޑުގައި ހިމަނާނީ އިކޮނޮމިކް މިނިސްޓްރީގެ ބޭފުޅަކާއި، ވަޒީފާދޭ ފަރާތްތައް ތަމްސީލްކުރަން 2 ބޭފުޅުންގެ އިތުރުން ފަޒީފާ އަދާކުރާ ފަރާތްތައް ތަމްސީލްކުރަން 2 ބޭފުޅުންކަމަށެވެ.
ކޮމިޓީ ތެރެއިން އެންމެ ކުޑަ އުޖޫރަ ކަނޑައެޅުމަށް ދިރާސާކުރާނެކަމަށާއި، މިކަމަކީ ކުއްލިއަކަށް ކުރެވޭނެކަމެއް ނޫންކަމަށް މިނިސްޓަރ ވިދާޅުވިއެވެ. އެންމެ ކުޑަ އުޖޫރަ ކަނޑައެޅިގެންދާއިރު މިކަން ނިމިގެންދާނީ ހުރިހާ ފަރާތްތަކަށްވެސް ލުއި ފަސޭހަގޮތަކަށްކަމަށް މިނިސްޓަރ ވަނީ ފާހަގަކުރަށްވާފައެވެ.
"އަޅުގަނޑުމެނަކަށް ކުއްލިއަކަށް މިނިމަމް ވޭޖެކޭ ކިޔާފައި އަދަދެއް ކަނޑައެއް ނޭޅޭނެ. އެހެންވެއްޖިއްޔާ ވިޔަފާރިތައް ހަލާކުވެގެންދިޔައީމައި އަނެއްކާ އިތުރަށް ވަޒީފާ ގެއްލޭނީ، އެހެންވީމަ އަޅުގަނޑުމެން ވަޒީފާދޭ ފަރާތްތަކަށްވެސް ތަކްލީފަކަށްނުވާ ގޮތްތަކެއް އެބަ ބަލަންޖެހޭ. ހުރިހާ ދިރާސާތަކެއް ކުރެވިގެންގޮސް 2 ފަރާތްވެސް ތަމްސީލްކުރާ ފަރާތްތައް ތިއްބަވައިގެން ބުއްދިވެރި ސޮލިއުޝަނެއް އިރާދަކުރެއްވިއްޔާ އަޅުގަނޑުމެން އެކަމުގައި ނެރޭނަން." އިކޮނޮމިކް މިނިސްޓަރ ފައްޔާޞު އިސްމާޢިލް ވިދާޅުވިއެވެ.
ވަޒީފާއާ ބެހޭ ޤާނޫނުގެ ދަށުން މުސާރައާއި އުޖޫރައާ ގުޅޭގޮތުން މިނިސްޓަރަށް ލަފާދިނުމަށް އެކުލަވާ ބޯޑަކީ މުވައްޒަފުން މަސައްކަތް ކުރަމުންދާގޮތް ބަލައި، ދެނެގަނެ މަސައްކަތްކުރާ މީހުންނަށް މުސާރައިގެ ގޮތުން ދެވޭ އެންމެ ކުޑަ އަދަދާ ގުޅޭގޮތުން މިނިސްޓަރަށް ލަފާދިނުމަށްޓަކައި އެކުލަވާލާ ބޯޑެކެވެ.
ވަޒީފާއާބެހޭ ޤާނޫނު ބުނާގޮތުން މުސާރައާއި އުޖޫރައާ ގުޅޭގޮތުން މިނިސްޓަރަށް ލަފާދޭ ބޯޑު އެކުލެވިގެން ވަނީ ރައީސުލްޖުމްހޫރިއްޔާ ޢައްޔަނުކުރާ 5 މެންބަރުންގެ މައްޗަށެވެ. އަދި މި ބޯޑު ހިންގާނެ ގޮތާއި ބޯޑަށް ލިބިގެންވާ ބާރުތަކާއި، ބޯޑުގެ ވާޖިބުތައް، މި ޤާނޫނުގެ ދަށުން މިނިސްޓަރު ހަދާ ޤަވާއިދަކުން ކަނޑައަޅަންވާނެކަމަށްވެސް ވަޒީފާއާ ބެހޭ ޤާނޫނުގައި ބަޔާންކޮށްފައިވެއެވެ.
ވަޒީފާ އަދާކުރާ މީހުންނަށް އުޖޫރައިގެ ގޮތުގައި ދެވޭނެ އެންމެ ކުޑަ މިންވަރެއް ކަނޑައެޅުމަކީ ރައީސް އިބްރާހިމް މުޙައްމަދު ޞާލިޙުގެ ރިޔާސީ ވައުދުތަކުގެ ތެރޭގައި ހިމެނޭ މުހިއްމު ވަޢުދެކެވެ.