ޕޯސްޓުގެ ޒަރިއްޔާއިން ރާއްޖެ އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސް ސަރވިސުން އަތުލައިގެންފިއެވެ.
ކަސްޓަމްސްއިން ބުނީ މިދިޔަ ބުރާސްފަތިދުވަހު މަސްތުވާތަކެތި އަތުލައިގަތީ ބެލްޖިޔަމްއިން ރާއްޖެއަށް އެތެރެކުރަން އުޅުނު ޕާރުސަލެއްގެ ތެރެއިންކަމަށެވެ. އަދި މިތަކެތި ކަސްޓަމްސްއިން އޭގެ ވެރިފަރާތުގެ ޚާޒިރުގައި ކެނޑިއިރު މަސްތުވާ ތަކެއްޗަށް ޝައްކުކުރެވޭ ނަވާރަ ސަތޭކައަށްވުރެ ގިނަ ގުޅަ ފެނިފައިވާކަމަށް ފުލުހުން ބުނެއެވެ. އަދި މިތަކެތި ޓެސްޓްކުރިއިރު މަސްތުވާތަކެތީގެ ބާވަތެއްކަމުގައިވާ އެމް.ޑީ.އެމް.އޭ އަށް ވަނީ ޕޮޒިޓިވް ވެފައިވާއިރު، މީގެ ބަރުދަނުގައި ކިލޯއެއް ހުރިކަމަށް ކަސްޓަމްސްއިން ބުނެއެވެ.
އަތުލައިގަނެވުނު މަސްތުވާތަކެތި މިހާރު މޯލްޑިވްސް ޕޮލިސް ސަރވިސްއާ ވަނީ ޙަވާލުކޮށްފައެވެ. އަދި ފުލުހުން މިހާރުދަނީ މި މައްސަލަތައް އިތުރަށް ތަޙްޤީގްކުރަމުންނެވެ.