އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީގެ ދާއިރާ ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރުމަށް ހަމަޖެހިފައިވާކަމަށް އިކޮނޮމިކް މިނިސްޓަރ ފައްޔާޞު އިސްމާޢިލް ވިދާޅުވެއްޖެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓަރ ފައްޔާޞު ވިދާޅުވީ، އައިސީޓީ ދާއިރާ ކުރިއެރުވުމަކީ މި ސަރުކާރުން ވަރަށް އިސްކަންދޭކަމެއްކަމަށެވެ. އެގޮތުން ރާއްޖޭގައި އައިސީޓީ ދާއިރާގެ ހުނަރުވެރި ކުދިން އުޅޭކަން ފާހަގަކުރައްވަމުން މިނިސްޓަރ ވިދާޅުވީ، ރާއްޖޭން ބޭރުގެ ކުންފުނިތަކުގައި މަސައްކަތްކޮށް ދިވެހިން ކުދިން އެޕްލިކޭޝަންތައްވެސް ތައްޔާރުކުރާކަމަށެވެ.
މިދާއިރާ ކުރިއެރުވުމަށް މުޅި އައިސީޓީ ދާއިރާ ހިމެނޭގޮތުން ދާއިރާގައި މަސައްކަތްކުރާ ފަރާތްތަކުގެ ޕްލެޓްފޯމެއް ހެދުމުގެ މަސައްކަތް މިހާރު ފަށާފައިވާކަމަށް މިނިސްޓަރ ވިދާޅުވިއެވެ. މީގެ ސަބަބުން އެފަރާތްތަކަށް ސަރުކާރާއި ވާހަކަދެއްކޭނެ ފަސޭހަ ގޮތްތަކެއް ފަހިވެގެންދާނެކަން މިނިސްޓަރ ފާހަގަކުރެއްވިއެވެ. އައިސީޓީ ދާއިރާ ކުރިއެރުވުމަށް ގިނަ ޤައުމުތަކުގެ އެހީތެރިކަން ހޯދާނެކަމަށް މިނިސްޓަރ ވަނީ ވިދާޅުވެފައެވެ. އެގޮތުން ރާއްޖޭން ބޭރުގެ ޤައުމުތައް މެދުވެރިކޮށް ފަންނީ އެހީ ހޯދުމާއި، މާކެޓް ހޯދުމުގެ މަސައްކަތް މިހާރު ކުރަމުންދާކަމަށް މިނިސްޓަރ ވިދާޅުވިއެވެ.
"އަޅުގަނޑުމެން މިހާރު އައިސީޓީ ދާއިރާގައި އުޅުއްވާ ކުދިންގެ ޕްލެޓްފޯމެއް ހެދޭތޯ މި މަސައްކަތްކުރަނީ. އެއިރުން އެކުދިންނަށް ސަރުކާރާ ވާހަކަދެއްކޭނެ ފަސޭހަގޮތެއް ހެދޭނެ. އޭގެއިތުރުން ޤައުމުތަށް މެދުވެރިކޮށް ފަންނީ އެހީތެރިކަމާއި، ޕްރޮޑަކްޓް އުފެދިއްޖެނަމަ މާކެޓްކުރެވޭނެ ގޮތްތައް ބަލަމުން މިދަނީ." އިކޮނޮމިކް މިނިސްޓަރ ފައްޔާޞު އިސްމާޢިލް ވިދާޅުވިއެވެ.
އެސްއެމްއީ ބޭންކްގެ ދަށުންވެސް މިދާއިރާ ކުރިއަރުވާނެކަމަށް ސަރުކާރުން ބުނޭ. އަދި ސަރުކާރު ހިންގުންވެސް ބޮޑަށް އީ ގަވަނަންސްއަށް ގެންދެވޭތޯ ސަރުކާރުން އަންނަނީ މަސައްކަތްކުރަމުންނެވެ.