ޑިފެންސް މިނިސްޓަރ އަލްއުސްތާޛާ މާރިއާ އަޙްމަދު ދީދީގެ މިއަދު ހެނދުނު އިންޑިއާއަށް ފުރާވަޑައިގެންފިއެވެ. މިދަތުރުފުޅުގައި އެކަމަނާގެ އަރިހުގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވަޑައިގެންނެވިއެވެ.
ހަފުތާއެއްގެ މުއްދަތަށް އިންޑިއާގެ ދިއްލީއަށް ކުރައްވާ މިދަތުރުފުޅުގައި ދެ ޤައުމުގެ އަސްކަރިއްޔާގެ ދެމެދުގައި އޮތްގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރުމަށް ވަނީހަމަޖެހިފައެވެ.
ޑިފެންސް މިނިސްޓަރުގެ މިދަތުރުފުޅާ ގުޅޭގޮތުން އިންޑިއާގެ ބައެއް މީޑިއާގައިވަނީ، އިންޓަ-ކޯސްޓަލް ސަވައިލެންސް ރާޑަ ސިސްޓަމެއް ޤާއިމްކުރުމަށް އެކަމަނާގެ މިދަތުރުފުޅުގައި މަޝްވަރާކުރައްވާނެކަމަށެވެ.
އަދި ދެ ޤައުމުގެ ދެމެދު ދިފާއީ ގުޅުން ހަރުދަނާކުރުމަށްވެސް މަޝްވަރާކުރައްވާނެކަމަށް އިންޑިއާ މީޑިއާ ރިޕޯޓްތައްބުނެއެވެ. ނަމަވެސް ދިވެހި ސަރުކާރުން މިކަމާ ގުޅޭގޮތުން އެއްޗެއް ހާމަކޮށްފައެއްނުވެއެވެ.
ޑިފެންސް މިނިސްޓަރުގެ މި ދަތުރުފުޅުގައި، ޑިފެންސް މިނިސްޓްރީގެ ޑިޕާޓްމަންޓް އޮފް އިންޓަރނޭޝަނަލް ޑިފެންސް ކޯޕަރޭޝަން އެންޑް ޕޮލިސީގެ ޑެޕިޔުޓީ ޑައިރެކްޓަރ ޖެނެރަލް ކާނަލް ޢަބްދުލްމަތީން އަޙްމަދާއި، އެމްއެންޑީއެފް ކޯސްޓްގާޑުގެ ޕްރިންސިޕަލް ޑައިރެކްޓަރ ލެފްޓިނެންޓް ކާނަލް މުޙައްމަދު ސަލީމް ބައިވެރިވެރިވެވަޑައިގަންނަވައެވެ.