އަންނަ ފެބްރުއަރީ މަހުގެ ނިޔަލަށް ތަޢުލީމީ އައު މަންޙަޖުގެ ކީ ސްޓޭޖް ހަތަރަކަށް ސްކޫލްތަކުގެ ޓީޗަރުން ތަމްރީނުކޮށް ނިމޭނެކަމަށް އެޑިއުކޭޝަން މިނިސްޓްރީން ބުނެފިއެވެ.
ތަޢުލީމީ އައު މަންޙަޖުގެ ކީ ސްޓޭޖް ހަތަރަކަށް ސްކޫލްތަކުގެ ޓީޗަރުން ތަމްރީނުކުރުމަށް ނޭޝަނަލް އިންސްޓިޓިއުޓް އޮފް އެޑިއުކޭޝަންނުން ކުރިއަށްގެންދިޔަ މަސައްކަތު ބައްދަލުވުމުގައި މާލޭގެ ކޮންމެ ސްކޫލަކުން ދެ ޓީޗަރުންނާއި، ރާއްޖޭގެ ކޮންމެ އަތޮޅަކުން ތިން ތީޗަރުންނާ އެކު ޖުމްލަ 100 ޓީޗަރުން ތަމްރީނުކޮށްފައިވެއެވެ.
މި މަސައްކަތު ބައްދަލުވުމުގައި ކިޔަވައިދިނުމުގައި ސައިންސާއި ޓެކްނޮލޮޖީ އެންމެ ފުރިހަމައަށް ބޭނުންކުރުމާއި ޒަމާނީ ހުނަރުތަކާއި އުކުޅުތައް ބޭނުންކޮށްގެން ދަރިވަރުން ގަޔާވާގޮތަށް ކިޔަވައިދިނުން ބައްޓަން ކުރާނެ ގޮތްތައްވަނީ ކިޔައިދީފައެވެ. ތިން ދުވަހުގެ ވޯރކްޝޮޕް ނިންމުމަށް ބޭއްވި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޢަބްދުﷲ ރަޝީދު ވިދާޅުވީ އައު މަންހަޖުގެ ދަށުން ކުދިންނަށް އުނގަންނައިދެނީ ހަމައެކަނި އިމްތިނާހު ކަރުދާސް ހަދަން ނޫންކަމަށާއި، ދިރިއުޅުމުގެ ހުނަރާއި ޤާބިލުކަން ދަރިވަރުން ގައިގައި އަށަގެންނުވުމަކީ އައު މަންޙަޖުގެ މަޤްޞަދުކަމަށެވެ. ތައުލީމީ އައު މަންޙަޖުގެ ކީ ސްޓޭޖް 4 އަށް ޓީޗަރުން ތަމްރީނުކުރުމުގެ މަސައްކަތް ފެބްރުއަރީ މަހުގެ ނިޔަލަށް ނިންމާލެވޭނެކަމަށް އޭނާ ވިދާޅުވިއެވެ.
"މި ޓްރެއިނަރުން އަތޮޅުގެ އެހެން ސްކޫލްތަކުގެ ޓީޗަރުން ކީސްޓޭޖް 4 އަށް ތަމްރީންކުރާނެ. ފެބްރިއަރީ މަހުގެ މެދުތެރެއަށް ވާއިރާއަށް ހުރިހާ ޓީޗަރުންވެސް ތިބޭނީ ތަމްރީންވެފަ" ސްޓޭޓް މިނިސްޓަރ ޢަބްދުﷲ ރަޝީދް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ފާތިމަތު ނަސީރު ވިދާޅުވީ އައު ނިޒާމަކަށް ސްކޫލްތައް ބައްޓަން ކުރަމުންދާއިރު، ކުރީގައި ކިޔަވައިދިން ވައްޓަފާޅި މިހާރު ދޫކޮށްލަންޖެހޭކަމަށެވެ. އެނާ ވިދާޅުވީ އައު މަންހަޖަށް ކިޔަވައިދޭން ފަށާފައިވާއިރު، ސްކޫލްތަކުގައި ކިޔަވައިދިނުން ކުރިއަށް ގެންދާ ގޮތްތައް މިނިސްޓްރީން ވަރަށް ގާތުން މޮނިޓަރ ކުރާނެކަމަށެވެ.
"އެންމެ ދަށްކޮށް ދަނީ ކަރިކިއުލަމަށް އަހުލުވެރި ނޫން ސްކޫލްތައް. އެހެންކަމުން މިހާރު އަޒުމަކަށްވާންވީ އާ ކަރިކިއުލަމްގެ ކޮންސެޕްޓްތަކަށް ޢަމަލުކުރުން. އެން.އައި.އީ އިން އެހީތެރިކަން ދޭނަން" ސްޓޭޓް މިނިސްޓަރ ފާތިމަތު ނަސީރު ވިދާޅުވިއެވެ.
ޕީއެސްއެމް ނިއުސްއާ ވާހަކަދައްކަމުން ވޯރކްޝޮޕްގައި ބައިވެރިވި މުދައްރިސުން ބުނީ މި ވޯރކްޝޮޕްގެ ސަބަބުން މަންހަޖު ތަންފީޒްކުރާނެ ގޮތްތައް ދަސްވެ، ދަރިވަރުން ކުރިއެރުން ހޯދަމުން އަންނަ ގޮތް ދެނެގަންނާނެގޮތްތައް ދަސްވެފައިވާކަމަށެވެ.
ތައުލީމީ އައު މަންޙަޖުގެ ކީ ސްޓޭޖް ހަތަރެއްގައި ހިމެނެނީ ގްރޭޑް 9 އަދި 10 އެކެވެ. ކީ ސްޓޭޖް 4 އަށް ކިޔަވައިދޭން ފަށާފައިވަނީ މި ފެށި ދިރާސީ އައު އަހަރުއެވެ. އެގޮތުން މިއަހަރު ގްރޭޑް 9 އަކަށް އައު މަންޙަޖަށް ކިޔަވައިދޭން ފަށާފައިވާއިރު ގްރޭޑް 10 އަކަށް އައު މަންޙަޖަށް ކިޔަވައިދޭން ފަށާނީ އަންނަ އަހަރުއެވެ.