ހުޅުމާލޭގައި އަމިއްލަ ކުންފުނިތަކުން ތަރައްޤީކުރާ ފްލެޓް އިމާރާތްތައް ވިއްކުމުގެ ކަންކަން ކުރިއަށްގެންދެވޭނީ ވަކި މިންވަރަކަށް އިމާރާތުގެ މަސައްކަތް ނިމުމުންކަމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ބުނެފިއެވެ.
އެޗްޑީސީން ބުނީ ހުޅުމާލޭގައި އަމިއްލަ ފަރާތްތަކުން ތަރައްޤީކުރާ ފްލެޓް ނުވަތަ ހައުސިންގ ޔުނިޓްތައް ތަރައްޤީކުރުމުގެ އެއްބަސްވުމުގައިވާ ގޮތުން، ވަކި މިންވަރަކަށް އިމާރަތުގެ މަސައްކަތް ނިމުމުން، އެޗްޑީސީގެ ހުއްދަ ލިބިގެން ނޫނީ އިމާރަތް ވިއްކުމުގެ އެއްވެސް މުޢާމަލާތެއް ނުހިންގޭނެކަމަށެވެ. އަދި ކަނޑައެޅިފައިވާ މިންވަރަށް އިމާރާތުގެ މަސައްކަތް ނިމުމުގެ ކުރިން ހައުސިންގ ޔުނިޓްތައް ވިކުމުގެ ކަންކަން ކުރިއަށް ގެންދިއުމާއި، ބުކިންގ ފީގެ ގޮތުގައި ހުއްދަ ކޮށްފައިވާ މިންވަރަށްވުރެ އިތުރަށް ފައިސާ ނެގުމަކީވެސް އެއްބަސްވުމާއި ހިލާފު ކަމެއްކަމަށް އެޗްޑީސީން ބުނެއެވެ.
އެޗްޑީސީން ބުނީ ފްލެޓް ނުވަތަ ހައުސިންގ ޔުނިޓް ގަންނަން ބޭނުންވާ ފަރާތްތަކުން، ފައިސާގެ މުޢާމަލާތެއް ހިންގުމުގެ ކުރިން، ފްލެޓް ވިއްކުމުގެ ހުއްދަ އެޗްޑީސީން ދީފައިވޭތޯ ބެލުމަށް އިލްތިމާސްކުރާކަމަށެވެ. އަދި މި މަޢުލޫމާތު އެޗްޑީސީއަށް ގުޅައިގެންނާއި ލިޔުމުންވެސް ހޯދޭނެކަމަށް އެޗްޑީސީން ބުނެއެވެ.
އަމިއްލަ ފަރާތްތަކުން ތަރައްޤީކުރާ ފްލެޓް ނުވަތަ ހައުސިންގ ޔުނިޓްތައް ގަތުމުގައި ސަމާލުވުމަށް އެޗްޑީސީން އިލްތިމާސްކޮށްފައި މިވަނީ، ފްލެޓް ގަތުމުގައި މައްސަލަތަކެއް ކުރިމަތިވެ، ބައެއް ފަރާތްތަކަށް މާލީ ގެއްލުންތަކެއް ކުރިމަތިވެފައިވަނިކޮށެވެ.