ރާއްޖެއާއި އެހެން ޤައުމުތަކާއި އޮންނަ ވިޔަފާރީގެ ގުޅުން އިތުރަށް ބަދަހިކުރުމާއި ގުޅޭގޮތުން އިކޮނޮމިކް މިނިސްޓަރ ފައްޔާޟު އިސްމާޢިލް ރާއްޖެއިން 3 ޤައުމަކަށް ކަނޑައަޅާފައިވާ ސަފީރުންނާއެކު ބައްދަލުކުރައްވައިފިއެވެ.
އިކޮނޮމިކް މިނިސްޓަރ ބައްދަލުކުރައްވާފައި ވަނީ ރާއްޖެއިން އެމެރިކާއަށް ކަނޑައަޅާފައި ހުންނަވާ ސަފީރު ތިލްމީޒާ ހުސައިންއާއި، ރާއްޖެއިން ބަންގްލަދޭޝްއަށް ކަނޑައަޅާފައި ހުންނަވާ ސަފީރު އައިޝަތު ޝާން ޝާކިރުއާއި، ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އައިޝަތު މުޙައްމަދު ދީދީއާއެވެ.
މި ބައްދަލުވުންތައް ކުރިއަށްދިޔައީ އިކޮނޮމިކް މިނިސްޓްރީގައެވެ. މި ބައްދަލުވުންތަކުގައި މައިގަނޑުގޮތެއްގައި މަޝްވަރާކުރައްވާފައި ސަފީރުން ތިއްބަވާ ޤައުމުތަކާ ގުޅިގެން ވިޔަފާރީގެ ގުޅުން ކުރިއަށްގެންދެވިދާނެ ގޮތްތަކާއި ގުޅޭގޮތުންކަމަށް އިކޮނޮމިކް މިނިސްޓްރީން ބުނެއެވެ.
އިންޑިއާ، ބަންގްލަދޭޝް އަދި އެމެރިކާއަކީ ރާއްޖޭގެ އިޤްތިޞާދުގައި މުހިންމު 3 ޤައުމެވެ. އިންޑިއާ އަދި ބަންގްލަދޭޝްއިން ރާއްޖެއަށް މުދާ އިމްޕޯޓްކުރާއިރު، އެމެރިކާ ހިމެނެނީ ރާއްޖެއިން އެންމެ ގިނައިން މުދާ އެކްސްޕޯޓްކުރާ 5 ޤައުމުގެ ތެރޭގައެވެ. މިދިޔަ އަހަރުގެ ނޮވެމްބަރުމަހާއި ހަމައަށް ރާއްޖެއިން އެމެރިކާއަށް 18 މިލިއަން ރުފިޔާގެ މުދާ ވަނީ އެކްސްޕޯޓްކޮށްފައެވެ.
ރާއްޖޭގެ ވިޔަފާރީގެ ދާއިރާ ކުރިއެރުވުމަށް އިކޮނޮމިކް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ. އޭގެތެރޭގައި ޤައުމުތަކާއި އޮންނަ ގުޅުން ބަދަހިކުރުމާއި، ވިޔަފާރިތަކަށް އުނދަގޫވާގޮތަށް ހަދާފައިވާ ޤާނޫނޫތައް އިސްލާޙްކުރުމާއި، ކުދި އަދި މެދުފަންތީގެ ވިޔަފާރިތަކަށް ފަސޭހައިން ފައިނޭންސް ލިބޭނެ ބޭންކެއް އުފެއްދުން ހިމެނެއެވެ.