ރާއްޖެއާއި ޔުނައިޓެޑް އަރަބް އެމިރޭޓްސް، ޔޫއޭއީއާ ދެމެދު ގުޅިގެން މަސައްކަތްކުރުމަށް ކޮމިޓީއެއް އެކުލަވާލުމާ ބެހޭ އެއްބަސްވުމެއްގައި ދެޤައުމުގެ ފަރާތުން ސޮއިކުރައްވައިފިއެވެ.
ދެ ޤައުމު ގުޅިގެން އެކި ދާއިރާތަކުން މަސައްކަތްކުރުމަށް ކޮމިޓީ އެކުލަވާލުމާ ގުޅޭ އެއްބަސްވުމުގައި ސޮއިކުރެއްވީ އަބޫދާބީ ގައި ހުންނަ އަބޫދާބީ ނެޝަނަލް އެގްޒިބިޝަން ސެންޓަރގައި ބޭއްވި ރަސްމިއްޔާތެއްގައެވެ. މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފޮރިންގ މިނިސްޓަރ ޢަބްދުﷲ ޝާހިދެވެ. ޔޫއޭއީގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ފޮރިންގ އެފއެއަރޒް އެންޑް އިންޓަރނޭޝަނަލް ކޯޕަރޭޝަން ޝެއިޚް ޢަބްދުﷲ ބިން ޒައިދު އަލް ނަޙްޔާނެވެ. ސޮއިކުރުމުގެ މިރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެވަޑައިގެންނެވިއެވެ.
މި އެއްބަސްވުމުގެ ސަބަބުން ދެޤައުމުގެ ދެމެދު އޮންނަ އަޚްވަންތަގުޅުން އިތުރަށް ބަދަހިވެ، ދެ ޤައުމުގެ ދެމެދުގައި ތަފާތު އެކިއެކި ދާއިރާތަކުން ފަންނީ އެހީތެރިކަން ފޯރުވައިދީ، ތަރައްޤީގެ ލަނޑުދަނޑިތަށް ހާޞިލްކުރުމުގައި ދެޤައުމުގެ ދެމެދުގައި އެއްބާރުލުންދިނުމަށް މަގުފަހިވެގެންދާނެކަމަށް ސަރުކާރުން ވިދާޅުވެއެވެ.
މިއަދު ސޮއިކުރެއްވި އެއްބަސްވުމަކީ ދިވެހިރާއްޖެއާ ޔުނައިޓެޑް އަރަބް އެމިރޭޓްސްއާއި ދެމެދު އޮތް ސިޔާސީ ގުޅުމުގައި ހާޞިލްކުރެވުނު ވަރަށް މުހިންމު އާމާޒެއްކަމަށްވެސް ސަރުކާރުން ބުނެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ޔޫއޭއީގެ އަބޫދާބީއަށް ކުރައްވާ މި ދަތުރުފުޅުގައި ރާއްޖޭގެ ތަރައްޤީއަށް އެހީތަކެއް ލިބޭނެކަމަށް އުއްމީދު ކުރައްވާކަމަށް ފޮރިންގ މިނިސްޓަރ ވަނީ ވިދާޅުވެފައެވެ. އަދި ވިޔަފާރީގެ ދާއިރާއިން ގުޅުން ބަދަހިކުރުމަށް ސޮއިކުރައްވާނެކަމަށް ރާއްޖޭގެ އިކޮނޮމިކް މިނިސްޓަރ ވަނީ ޕީއެސްއެމް ނިއުސްއަށް މަޢުލޫމާތު ދެއްވާފައެވެ.
ރައީސުލްޖުމްހޫރިއްޔާ ޔޫއޭއީއަށް ކުރައްވާ ދަތުރުފުޅަކީ ޔޫ.އޭ.އީގެ ޑެޕިއުޓީ ސުޕްރީމް ކޮމާންޑަރ އޮފް އާމްޑް ފޯސަސް، މުޙައްމަދު ބިން ޒައިދު އަލް ނަޙްޔާންގެ ދަޢުވަތަކަށް "ޒައިދު ސަސްޓެއިނަބިލިޓީ އެވޯޑްސް" އަދި "އިނޯގްރޭޝަން އޮފް ދަ އަބޫދާބީ ސަސްޓެއިނަބިލިޓީ ވީކް" ހަފްލާގައި ބައިވެރިވެވަޑައިގަތުމަށް ކުރަށްވާ ދަތުރުފުޅެކެވެ.
ޔޫއޭއީއަކީ، ރާއްޖެއަށް އެކި ގޮތްގޮތުން އެހީތެރިވަމުންދާ ޤައުމެކެވެ. ޔޫއޭއީއަށް ހިލޭ އޮން އެރައިވަލް ވިސާ ދިވެހިންނަށް ލިބޭނެގޮތް މިހާރު ވަނީ ހަމަޖެހިފައެވެ. ރާއްޖެ އާއި ޔޫއޭއީއާ ދެމެދު ސިޔާސީ ގުޅުން ގާއިމްކުރީ 1978ވަނަ އަހަރެވެ.