ޚިއްސާދާރުންނާއެކު އެންމެ ރަނގަޅު ގުޅުމެއް ބާއްވާ ރާއްޖޭގެ ކުންފުންޏަށް ދޭ އެވޯޑް އުރީދޫ މޯލްޑިވްސްއަށް ލިބިއްޖެއެވެ.
މިއެވޯޑަކީ އިނގިރޭސިވިލާތުގެ މާލީ ކަންކަމާއި ބެހޭ މަޖައްލާއަކުން 2011 ވަނަ އަހަރުން ފެށިގެން ދެމުންދާ ބައިނަލްއަޤްވާމީ އެވޯޑެކެވެ.
ބެސްޓް އިންވެސްޓަރ ރިލޭޝަން ކޮމްޕެނީގެ އެވޯޑް ލިބުމާއި ގުޅިގެން އުރީދޫ މޯލްޑިވްސްގެ ސީއީއޯ ނަޖީބް ޚާން ވިދާޅުވީ، މިއީ އެކުންފުންޏަށް ލިބުނު ވަރަށް ބޮޑު އުފަލެއްކަމަށެވެ. އަދި އުރީދޫ މޯލްޑިވްސްގެ ޙިއްޞާދާރުންގެ ފަރާތުން ލިބެމުންދާ ހިތްވަރާއި އިތުބާރުގެ އަގުވަޒަންކޮށް، މި ގުޅުން އިތުރަށް ބަދަހި ކުރުމަށް ކުރިއަށް އޮތްތަނުގައިވެސް މަސައްކަތް ކުރަމުންދާނެ ކަމުގެ ޔަގީންކަން ނަޖީބް ޚާން ވަނީ ދެއްވާފައެވެ.
އުރީދޫ މޯލްޑިވްސްގެ ޙިއްޞާތައް މޯލްޑިވްސް ސްޓޮކް އެކްސްޗޭންޖުގައި ރަސްމީކޮށް ލިސްޓުކޮށްފައިވަނީ 2017 ވަނަ އަހަރުގެ އޮގަސްޓު މަހުގެ ތެރޭގައެވެ. އުރީދޫއިން ބުނީ އެ ކުންފުނީގެ އައިޕީއޯގައި 8,257 ޙިއްޞާދާރުން ބައިވެރިވެފައިވާއިރު، އޭގެތެރެއިން 6،000 ޙިއްޞާދާރުންނަކީ ރާއްޖޭގެ ސްޓޮކް އެކްސްޗޭންޖުގައި އަލަށް ބައިވެރިވި ފަރާތްތައްކަމަށެވެ.
އިންވެސްޓަރ ރިލޭޝަންސްގެ ދާއިރާއިން އުރީދޫ މޯލްޑިވްސްއަށް ލިބިފައިވާ ކާމިޔާބީގެ އިތުރުން، 2018 ވަނަ އަހަރު މޯލްޑިވްސް ބިޒްނަސް އެވޯޑްސްގައި ވެސް އުރީދޫން ވަނީ އެވޯޑްތަކެއް ޙާސިލްކޮށްފައެވެ. މީގެ ތެރޭގައި، އެކްސެލަންސް އިން އިންފޯމޭޝަން އެންޑް ކޮމިއުނިކޭޝަން އަދި ފޮރިން ޑައިރެކްޓް އިންވެސްޓްމަންޓް އޮފް ދަ އިޔަރ ހިމެނެއެވެ.