ރާއްޖޭގައި ހުރި އެންމެ ބޮޑު ސްކޫލް ކަމުގައިވާ ހުރަވީ ސްކޫލް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހުޅުއްވައިދެއްވައިފިއެވެ.
ހުރަވީ ސްކޫލް ރަސްމީކޮށް ހުޅުވައި ކިޔަވައިދޭން ފެށުމަށް އެސްކޫލްގައި މިއަދު ބޭއްވި ޚާއްޞަ ރަސްމިއްޔާތެއްގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞޯލިޙްވަނީ އެ ސްކޫލްގެ ނަން ބޯޑުގެ ފަރުދާ ކައްސަވައިދެއްވައި، ސްކޫލް ރަސްމީކޮށް ހުޅުއްވައިދެއްވާފައެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ ނާއިބު ފައިޞަލް ނަސީމާއި، އެޑިއުކޭޝަން މިނިސްޓަރ ޑރ. ޢާއިޝަތު ޢަލީއާއި ސަރުކާރުގެ އިސް ބައެއް ވެރިން ބައިވެރިވެވަޑައިގެންފައިވެއެވެ.
ހުޅުމާލޭ ނޭބަރހުޑް އެކެއްގައި ތަރައްޤީކޮށްފައިވާ ހުރަވީ ސްކޫލަކީ 50 ކުލާސްރޫމްގެ ސްކޫލެއެކެވެ. 2019 ވަނަ އަހަަރުގެ ދިރާސީ އައު އަހަރާއިއެކު ހުރަވީ ސްކޫލްގެ ކިޔެވުން ފަށާފައިވާއިރު، އެ ސްކޫލްގައި 700 ދަރިވަރުން ކިޔަވާނެއެވެ. މި ސްކޫލަކީ 1400 ކުދިންގެ ޖާގައިގެ ސްކޫލެކެވެ. މި ސްކޫލް ތަރައްޤީކޮށްފައިވަނީ އެންމެ ޒަމާނީ ފެންވަރުގެ ވަސީލަތްތަކާއެކުއެވެ. ހުރަވީ ސްކޫލުގައި އެލްކޭޖީން ފެށިގެން ގްރޭޑް 9 އަކާ ހަމައަށް ކިޔަވައިދޭނެއެވެ. އަދި އަންނަ އަހަރު އެ ސްކޫލްގައި ގްރޭޑް 10 އަކަށް ކިޔަވައިދޭން ފެށުމަށް ހަމަޖެހިފަިއވާއިރު، އަންނަ މަހު އޭލެވެލްއަށް ވަނުމުގެ ފުރުސަތުވެސް ހުޅުވާލުމަށްވަނީ ހަމަޖެހިފައެވެ.
ހުރަވީ ސްކޫލް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވީ ސަރުކާރުގެ ސިޔާސަތަކީ ރާއްޖޭގެ ހުރިހާ ސްކޫލެގެ ކިޔެވުން އެއްދަންފަޅިއަކަށް ބަދަލުކުރުންކަމަށާއި، ހުޅުމާލެއާއި މާލޭގެ އާބާދީއަށް އަންނަ ބަދަލުތަކާއެކު މިގޮތަށް ކިޔަވައިދިނުމަށް އިތުރު ސްކޫލްތަކެއް އަޅަން ޖެހޭކަމަށެވެ. މިނިސްޓަރ ވިދާޅުވީ ކުރިއަށް އޮތް ތަނުގައި އާބާދީއަށް ބަލައި މާލެ ސަރަހައްދުގައި އިތުރު ސްކޫލްތަކެއް އަޅާނެކަން ފާހަގަކުރައްވައި މިނިސްޓަރ ވިދާޅުވީ މި ސްކޫލްތައް އަޅާނީ އައު ފަރުމާއަކަށް، ކުރިއަށްވުރެ ޖާގަ ތަނަވަސްކޮށްކަމަށެވެ.
""އަލަށް އެޅޭ ސްކޫލްތައް ވާނީ އާ ފަރުމާއަކަށް ބިނާކުރާ ސްކޫލްތަކަށް. އާ ސްކޫލްގެ ހަގީގީ މަޤާމް ކަނޑައަޅާނީ ދަރިވަރުންނާއި މުދައްރިސުން. ހުރަވީ ސްކޫލްއަކީ ރާއްޖޭގެ ހުރިހާ ސްކޫލްތަކުގެ ތެރެއިން އެންމެ ރަނގަޅު ސްކޫލަކަށް ވާނެކަމަށް އުއްމީދުކުރަން."އެޑިއުކޭޝަން މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ހުރަވީ ސްކޫލްގެ ޕްރިންސްޕަލް އަބްދުﷲ ރަޝީދު ވިދާޅުވީ ސްކޫލަގައި ތަޢުލީމް ހާސިލް ކުރާ ދަރިވަރުންވާންވާނީ ދޮންބަންޑާރައިންފަދަ ޤައުމުދެކެ ލޯބިވާ ތަޢުލީމީ ދަރިންތަކަކަށްކަމަށެވެ. އަދި ސްކޫލްގެ އަމާޒަކީ ސްކޫލްއިން ނުކުންނަ ކޮންމެ ދަރިވަރަކީވެސް ޤައުމަށާއި ދީނަށް ލޯބިކުރާ ޚިދުމަތްތެރި ދަރިންތަކަކަށް ހެދުންކަމަށް އޭނާ ވިދާޅުވިއެވެ.
ހުރަވީ ސްކޫލުގައި ނުކުޅެދުންތެރިކަން ހުންނަ ކުދިންނަށްވެސް ކިޔަވައިދެއެވެ. 7 ފަންގިފިލާގެ މި ސްކޫލް ފަރުމާކޮށްފައިވަނީވެސް އެފަދަ ކުދިންނަށް ފަސޭހައިން ބޭނުންކުރެވޭގޮތަށެވެ.
ހުރަވީ ސްކޫލްގެ ކިޔެވުން މިއަދު ފަށާފައިވާއިރު ސުކޫލްކުދިންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮޖެކްޓް އެސްކޫލްގައިވަނީ ފަށާފައެވެ. އަދި ހުރަވީ ސްކޫލްގައި ކިޔަވައިދޭނީ އެއް ދަންފަޅިއަށެވެ. ހުރަވީ ސްކޫލަށް "ހުރަވީ" ގެ ނަމުން ނަން ދީފައިވަނީ ހޮޅިންގެ އަށްދަށުން ރާއްޖެ ސަލާމަތްކުރެއްވި ހުރާގެ އައްސުލްޠާން ޣާޒީ ޙަސަން ޢިއްޒުއްދީން، ދޮންބަންޑާރައިންނަށް ނިސްބަތްކޮށެވެ. ރާއްޖޭގައި މިހާތަނަށް ހެދި އެންމެ ބޮޑު ސްކޫލް ޢިމާރާތް ކޮށްފައިވަނީ އަމީން ކޮންސްޓްރަކްޝަނާ ޙަވާލުކޮށްގެންނެވެ.