މިފެށި ދިރާސީ އައު އަހަރަކީ ތަފާތު އައު ކަންތައްތަކެއް ދަސްކުރާނެ އަހަރަކަށް ވާނެކަމަށް އުއްމީދުކުރައްވަކަމަށް ވިދާޅުވެ ދިރާސީ އައު އަހަރަށް ހުރިހާ ދަރިވަރުންނަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މަރުހަބާ ވިދާޅުވެއްޖެއެވެ.
ދިރާސީ އައު އަހަރަށް މަރުޙަބާ ވިދާޅުވެ ރައީސް ކުރެއްވި ޓްވީޓެއްގައި ވަނީ ހުރިހާ ދަރިވަރުންނަށްވެސް ކާމިޔާބު އަހަރަކަށް އެދިވަޑައިގެންފައެވެ. އަދި ދިރާސީ އަހަރަކީ ތަފާތު އައު ތަޖުރިބާތަކެއްކޮށް އިތުރު ކަންކަން ދަސްކުރާނެ އަހަރަކަށް ވާނެކަމަށް އުއްމީދުކުރައްވާކަމަށާ، ހުރިހާ ދަރިވަރުންނަކީވެސް އެއްކުއްޖަކު އަނެއްކުއްޖަކަށް އިޙްތިރާމްކޮށް އަޅާލާ ބަޔަކަށްވުމަށް ރައީސް ވަނީ އިލްތިމާސްކުރައްވާފައެވެ.
ދިރާސީ އައު އަހަރުގެ ކިޔެވުން ހަތްދިހަ ތިން ހާސް ތިރީސް ފަސް ދަރިވަރުންނާއެކު މިއަދު ފަށާފައިވާއިރު، ރައީސް ޞާލިޙްގެ ސަރުކާރުން ވަނީ ދިރާސީ އައު އަހަރު ތަޢުލީމީ ދާއިރާގައި ގިނަ ކަންތައްތަކެއް ކުރިއަށް ގެންދިޔުމަށް ނިންމަވާފައެވެ. އެގޮތުން އެންމެ ތަފާތު ކަމެއްގެ ގޮތުގައި ވަނީ ރާއްޖޭގެ ސްކޫލްތަކަށް މުޅިން އަލަށް ހެނދުނުގެ ނާސްތާ ޕްރޮގްރާމް ފަށްޓަވާފައެވެ.
މިއަހަރު ރާއްޖޭގެ 213 ސްކޫލެއްގައި ކިޔަވައިދެއެވެ.