އިސްލާމް ދީނާއި، ދީނީ ޝިއާރުތަކަށް ފާޑުކިޔާ މީހުންގެ މައްސަތައް ބަލާ ފިޔަވަޅު އަޅާނަން - ފުލުހުން
އިސްލާމް ދީނާއި، ދީނީ ޝިއާރުތަކަށް ފާޑުކިޔާ އަދި މީހުންގެ ނަފްސަށާއި މުދަލަށް ގެއްލުންދިނުމަށް ގޮވާލާ މީހުންގެ މައްސަތައް ތަޙްޤީޤްކޮށް ފިޔަވަޅު އަޅުއްވާނެކަމުގެ އިންޒާރު ފުލުހުން ދެއްވައިފިއެވެ.
ފުލުހުން މިއަދު ނެރުނު ނޫސްބަޔާނެއްގައި ބުނެފައިވަނީ، ފަހަކަށް އައިސް ބައެއް ފަރާތްތަކުން ސޯޝަލް މީޑިއާގައި ހިންގާ ބައެއް މުޢާމަލާތްތަކުގައި ރައްޔިތުންގެ ތެރޭގައި އޮންނަ އެއްބައިވަންތަކަމާއި، މަޞްލަހަތަށް ބުރޫއަރާ ފަދަ ބަސްމަގު ބޭނުންކުރާކަން އެ މުޢައްސަސާއަށް ފާހަގަކުރެވިފައިވާ ކަމަށެވެ. އަދި އެފަދަ ބައެއް މުޢާމަލާތްތަކަށް ރައްދު ދިނުމުގެ ގޮތުން އަނިޔާވެރިކަމާއި، ނަފްރަތު އުފެއްދުމަށް ހިތްވަރު ލިބޭފަދަ ބަސްމަގު ބޭނުންކުރާކަން ފާހަގަކުރެވިފައިވާކަމަސް ފުލުހުންގެ ބަޔާނުގައިވެއެވެ.
އެފަދަ ކަންކަންކަމުގައި ސޯޝަލް މީޑިއާގައި ބަހުގެ ހަމަލާތައް ބަދަލުކުރުން އިތުރުވުމާއި ގުޅިގެން އެކަންކަން ކުރާކަމަށް ފާހަގަކުރެވޭ ފަރާތްތަކާއި ފުލުހުން ބައްދަލުކޮށް، އެފަދަ ޢަމަލުތައް ތަކުރާރު ނުކުރުމަށާއި، ދިވެހިރާއްޖޭގެ ދީނީ އެއްބައިވަންތަކަމާއި، ރައްޔިތުންގެ މަސްލަޙަތާއި، ފަރުދީ ރައްކާތެރިކަމަށް ހުރަސްއެޅޭފަދަ ކަންކަން ހިންގަން ގޮވާލާ ފަރާތްތަކާއި މެދު އަޅަންޖެހޭ ފިޔަވަޅުތައް އަޅާނެކަން ފުލުހުން ވަނީ ވިދާޅުވެފައެވެ.
ސޯޝަލް މީޑިއާ ބޭނުންކުރާ ފަރާތްތަކުންނާއި، އެނޫން ފަރާތްތަކުންވެސް ރައްޔިތުންގެ މަސްލަޙަތާއި، އަމަން އަމާންކަމާއި ޤައުމީ އެއްބައިވަންތަކަން ދެމެހެއްޓުމަށްޓަކައި އެހެންމީހުންގެ އިޙްސާސްތަކާއި މުޖުތަމަޢުގެ މަސްލަޙަތުތަކަށް އިޙުތިރާމްކުރުމުގެ ސަޤާފަތެއް ދެމެހެއްޓުމަށް ފުލުހުންވަނީ އިލްތިމާސްކުރައްވާފައެވެ.
އަދި އިސްލާމްދީނަށް ތައުހީންކުރުމުގެ ނިޔަތުގައި އިސްލާމްދީނަށް ފާޑުކިއުމާއި، ދީނީ ޝިއާރުތަކާއި އުސޫލުތަކަށް ފާޑުކިޔާ ފަރާތްތަކާއި އަދި އެދަފަ ޢަމަލުތަކާއި ގުޅިގެން ވަކިވަކި ފަރުދުންގެ މުދަލާއި ނަފްސަށް ގެއްލުންދިނުމަށް ގޮވާލާ ފަރާތްތަކުގެ މައްސަލަތައް ތަޙްޤީޤްކޮށް، އަޅަންޖެހޭ ފިޔަވަޅުތައްވެސް އަލަމުންދާނެކަމަށް ފުލުހުންގެ ބަޔާނުގައިވެއެވެ.
އެފަދަ މައްސަލަތަކާއި ގުޅިގެން ވަކި ފަރުދެއްގެ ނަފްސަށް ނުވަތަ މުދަލަށް ގެއްލުންވެދާނެކަމުގެ އިންޒާރު ސޯޝަލް މީޑިއާގެ ޒަރީއާއިންނާއި އެނޫން ގޮތަކަށް ލިބިފައިވާނަމަ އެކަން ފުލުހުންގެ އިދާރާއަށް ހުށައެޅުމަށް ފުލުހުން ވަނީ އެދިވަޑައިގެންފައެވެ.