ޖިނާއީ މައްސަލަތަކުގައި ޕްރޮސިކިއުޓަރ ޖެނެރަލް ޢަމަލުކުރައްވާނެ އައު ސިޔާސަތުތައް ބަންޑާރަ ނާއިބު ކަނޑައަޅުއްވައިފިއެވެ.
ޖިނާއީ މައްސަލަތަކުގައި ޕްރޮސިކިއުޓަރ ޖެނެރަލް ޢަމަލުކުރައްވާނެ މައިގަނޑު ސިޔާސަތުތައް، ބަންޑާރަނައިބު އިބްރާހީމް ރިފްޢަތު މިއަދު ކަނޑައަޅުއްވައި، ޕްރޮސިކިއުޓަރ ޖެނެރަލަށް ވަނީ އަންގަވާފައެވެ.
މި ސިޔާސަތުތައް ކަނޑައެޅުއްވުމުގެ ބޭނުންމަކީ، ޖިނާޢީ ޢަދުލުގެ ނިޒާމު ބައްޓަންކުރެވިފައިވަނީ، ކުށްކުރުން ހުއްޓުވުމާއި ކުށްކުރާ ފަރާތްތައް ޒިންމާދާރުކުރެވި، އެފަރާތްތަކުގެ ކިބައިން މުޖުތަމަޢު ރައްކާތެރިކޮށްދިނުމުގެ މަޤްޞަދު ޙާޞިލުކުރެވިގެންދާއިރު، އެކަން ކުރެވެނީ ކުށުގެ ތުހުމަތުކުރެވޭ ފަރާތަށް ޤާނޫނުން ލިބިދޭ ރައްކާތެރިކަން އެފަރާތަށް ލިބިދިނުމާއެކު، ޤާނޫނުގައި ބަޔާންކޮށްފައިވާ އުޞޫލުތަކާ އެއްގޮތްވާ ގޮތުގެމަތިންކަން ކަށަވަރުކުރުމަށް ބާރުއެޅުންކަމަށް ބަންޑަރަ ނާއިބުގެ އޮފީހުން މަޢުލޫމާތުދެއެވެ.
ބަންޑާރަ ނާއިބުގެ އޮފީހުން ނެރުނު ބަޔާނެއްގައި ވަނީ، 2008 ވަނަ އަހަރު ޤާނޫނުއަސާސީއަށް ޢަމަލުކުރަން ފެށުމަށްފަހު އެ އަހަރު ޢާންމުކުރި ސިޔާސަތުތައް މައިގަނޑު ގޮތެއްގައި ބިނާވެފައިއޮތީ، ކުށުގެ ބާވަތަށް ބިނާކޮށް، ޢާންމު އުސޫލެއްގެ ގޮތުން ދަޢުވާކުރެވެންވާނެ ބާވަތުގެ މައްސަލަތަކެއް ފާހަގަކުރެއްވުމަށްކަމަށެވެ.
ނަމަވެސް މިއަދު ބަންޑާރަނައިބު ޢާންމުކުރެއްވި ޖިނާއީ މައްސަލަތަކުގައި ޢަމަލުކުރާނެ މައިގަނޑު ސިޔާސަތުތަކަކީ، ޖިނާއީ ކުށްކުށުގެ ދަޢުވާ ކުރެއްވުމަށް ޕްރޮސިކިއުޓަރ ޖެނެރަލަށް ލިބިދޭ ބާރުތައް އޭނާ ބޭނުންކުރެއްވުމުގައި އިސްކަންދެއްވަންވީ ބާވަތުގެ މައްސަލަތަކެއް ކަނޑައެޅުއްވުމަށް ބުރަވެވަޑައިގަތުމުގެ ބަދަލުގައި، އެމަސްއޫލިއްޔަތު ޕީޖީ އަދާކުރައްވަނީ އަދި އެކަން ކުރެއްވުމުގައި ޕީޖީއަށް ލިބިދޭ ބާރުތައް ބޭނުންކުރައްވަނީ، ވަކި ފަރާތަކަށް ބުރަވުމެއްނެތި، މިނިވަންކަމާއެކު، ތަޢައްޞުބުން އެއްކިބާވެ، ޤާނޫނުގައި ކަނޑައެޅިފައިވާ އުޞޫލުތަކާ އެއްގޮތްވާ ގޮތުގެމަތިންކަމަށް ކަށަވަރުކުރުމަށްޓަކައި ޕީޖީ ޢަމަލުކުރައްވަންވީ ނުވަތަ ރިޢާޔަތްކުރައްވަންވީ ޢާންމު އުޞޫލުތަކެއް ބަޔާންކުރެއްވުމަށް އިސްކަންދެއްވައިގެން ކަނޑައަޅުއްވާފައިވާ ސިޔާސަތުތަކެއްކަމަށެވެ.
އެގޮތުން، ޖިނާއީ މައްސަލަތަކުގައި ދަޢުވާކުރެއްވުމުގައާއި، ދަޢުވާތައް މުރާޖަޢާ ކުރެއްވުމުގައާއި، އަދި ދަޢުވާ ނުކޮށް ދޫކޮށްލުމަށް ނިންމާ ނިންމުންތައް ނިންމަނީ، ހަމަހަމަކަމާއެކު، ހާމަކަންބޮޑު ގޮތެއްގައި، އަދި ޤާނޫނީ ހަމަތަކާއެއްގޮތްވާ ގޮތުގެމަތިންކަން ކަށަވަރުކުރެއްވުމަށްޓަކައި ޕްރޮސިކިއުޓަރ ޖެނެރަލް ރިޢާޔަތްކުރައްވަންވާނެ ޢާންމު ސިޔާސަތުތަކެއްކަމަށް ބަންޑާރަ ނާއިބު އޮފީހުން ބުނެއެވެ.
މީގެ އިތުރުން، ބަންދުކުރެވޭ މީހުން ބަންދުކުރެވޭ ޙާލަތްތަކާއި ބަންދުގައި ބޭތިއްބޭނެ ޝަރުޠުތައް މުރާޖަޢާކުރެއްވުމުގެ މަސްއޫލިއްޔަތާއި، ތަޙްޤީޤީ އިދާރާތަކުން ހިންގަންޖެހޭ ތަޙްޤީޤުތައް ހިންގާތޯ ބެއްލެވުމަށް ޤާނޫނުއަސާސީން ޕްރޮސިކިއުޓަރ ޖެނެރަލާ މަތިކޮށްފައިވާ ޒިންމާތައް، ހާމަކަންބޮޑު ގޮތެއްގައި އަދާކުރެއްވުމަށް ބާރުއެޅުއްވުމަށްޓަކައިވެސް އުޞޫލުތަކެއް ހިމަނުއްވާފައިވެއެވެ. މީގެއިތުރުން، މި ސިޔާސަތުތަކަކީ، ކުޑަކުދިންގެ މައްޗަށް ޖިނާއީ ޢަދުލުގެ ނިޒާމު ހިންގޭއިރު، އެ ކުދިންގެ މަޞްލަޙަތަށް އެންމެ ފައިދާ ހުރިގޮތަށް އިސްކަންދެވޭނެ އުޞޫލަކުން، އަދި އެކުދިން ހެޔޮގޮތުގައި އަނބުރާ މުޖުތަމަޢަށް ގެނެވޭނެ ގޮތަށް ބައްޓަންކުރެވިފައިވާ ނިޒާމެއްގެ ތެރެއިން އެކުދިންނާމެދު ކަންކުރެވިގެންދިޔުމަށް ބާރުއަޅައިދޭ ސިޔާސަތުތަކެކެވެ.
ޖިނާއީ މައްސަލަތަކުގައި ޢަމަލުކުރާނެ ސިޔާސަތުތަކަށް ބަދަލުގެންނަވާފައި މިވަނީ، އެ ސިޔާސަތުތަކަށް އަމަލުކުރާތާ 10 އަހަރު ފަހުންނެވެ. އައު ސިޔާސަތުތަކާއެކު 2008 ވަނަ އަހަރު ޢާންމުކުރި ސިޔާސަތުތައް މިހާރު އުފައިވާކަމަށް ބަންޑާރަ ނާއިބުގެ އޮފީހުން ވިދާޅުވެއެވެ.