އަންނަ ފެބުރުއަރީ މަހުގެ ތެރޭގައި އެސްއެމްއީ ބޭންކު ހުޅުވުމުގެ ޢަމަލީ މަސައްކަތްފަށައި ވިޔަފާރިތަކަށާއި، ގެދޮރު ބިނާކުރުމަށް ލޯން ދޫކުރަންފަށާނެކަމަށް ރައީސުލްޖުމްހޫރިއްޔާ އިބްރަހީމް މުޙައްމަދު ޞާލިޙް ވިދަޅުވެއްޖެއެވެ. އެމަނިކުފާނު މިހެން ވިދާޅުވީ، ގެސްޓްހައުސް މަހާސިންތާ ނިންމުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ގެސްޓްހައުސް މަހާސިންތާ ނިންމުމަށް ދަރުބާރުގޭގައި ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްކެވި ވާހަކަފުޅުގައިވަނީ ލޯކަލް ޓޫރިޒަމް ފުޅާކުރުމަށް ސަރުކާރުން ގެންގުޅޭ ސިޔާސަތުތައް ހާމަކުރައްވާފައެވެ. އެގޮތުން އެންމެ މުހިންމު ކަމެއްގެ ގޮތުގައި ރައީސުލްޖުމްހޫރިއްޔާ ފާހަގަކުރެއްވީ އެމަނިކުފާނުގެ ރިޔާސީ ވަޢުދުފުޅުގައިވެސް ހިމެނޭ އެސްއެމްއީ ލޯން ދޫކުރަން އަންނަ އަހަރުގެ ފެބުރުއަރީ މަހު ފަށްޓަވާނެކަމަށެވެ.
އެގޮތުން އެންމެ ފުރަތަމަ ކަމެއްގެ ގޮތުގައި ފައިނޭންސްޝިއަލް އިންސްޓިޓިއުޓެއް ޤާއިމްކޮށް، ފެބުރުއަރީ މަސް ނިމުމުގެ ކުރިން ގެސްޓްހައުސް އެޅުމަށާއި، ގެދޮރު ޢިމާރާތްކުރުމަށް ލޯން ލިބޭނެގޮތް ހަމަޖެހިގެންދާނެކަމަށް އެމަނިކުފާނު ވިދާޅުވިއެވެ. ރައީސް ވަނީ ކޮންމެ ވިޔަފާރިއެއްގެ މައި ބަދައަކީ މާލީ ތަނަވަސްކަންކަމަށް ސިފަކުރައްވާފައެވެ.
އެގޮތުން ގެސްޓްހައުސް ވިޔަފާރިއަށް ފަހިކޮށްދިނުމަށްޓަކައި އެސްއެމްއީ ފައިނޭންސިންގ އެންޑް ޑިވެލޮޕްމަންޓް ކޯޕަރޭޝަން، އެސްއެންޑީޕީގެ ނަމުގައި ދިވެހި ސަރުކާރުގެ ޙިއްސާއޮންނަ ކުންފުންޏެއް އުފައްދަވާނެކަމަށް ވިދާޅުވިއެވެ. އަދި އެކުންފުނި ފުރަތަމަ ޤާއިމްކުރައްވާނީ ޑިޕޮސިޓް ނުނަގާ ފައިނޭންސްޝިއަލް އިންސްޓިޓިއުޓެއްގެ ގޮތުގައިކަމަށްވެސް ރައީސް ވިދާޅުވިއެވެ. އަދި މެދު ރާސްތާގައި އެސްއެމްއީ ބޭންކެއްގެ ގޮތުގައި ޑިޕޮސިޓްވެސް ނެގޭގޮތަށް އެބޭންކު ބަދަލުވެގެންދާނެކަމަށް ރައީސް ވިދާޅުވިއެވެ.
"އަޅުގަނޑުމެން މި އުފައްދާ އެސްއެމްއީ ބޭންކުގައި ލާމަރުކަޒީ ނިޒާމަށް ފުރުސަތު ދިނުމަށް މިވަގުތުއޮތް ތިން ސިޓީކަމަށްވާ މާލެ ސިޓީއާއި އައްޑޫސިޓީއާއި ފުވައްމުލަކު ސިޓީގެ ޙިއްސާއޮންނަގޮތަށް މިބޭންކު އުފެދިގެންދާނެ. ލޯކަލް ޓޫރިޒަމް ފޫޅާކުރުމަށް ސަރުކާރުން ގެންގުޅޭ ސިޔާސަތުގެ ދަށުން ގެސްޓްހައުސް ވިޔަފާރި ތަރައްޤީކުރުމަށް މިސަރުކާރުން ހޭދަކުރާނެރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ގެސްޓްހައުސް ހިންގުމަށް ހުރި މާލީ ދަތިތައް ފޫބެއްދުމަށް އެހީތެރިވެދިނުމަށް ގެސްޓްހައުސް ހިންގުމަށް ދިމާވާ ފަންނީ ދަތިތައް ޙައްލުކޮށްދިނުމަށްވެސް ސަރުކާރުގެ އެއްބާރުލުން ލިބޭނެކަމަށް ރައީސް ވިދާޅުވިއެވެ. އަދި ގެސްޓްހައުސް ވިޔަފާރިއަށް މާލީ އެހީތެރިކަން ދިނުމަށް ލޯކަލް ޓޫރިޒަމް މިހާރުން މިހާރަށް ފުޅަކުރުމަށް ސަރުކާރުން ނިންމާފައިވާ ސަރަހައްދުތަކަށް ޚާއްޞަ އަހަމިއްޔަތުކަމެއް ސަރުކާރުން ދެއްވާނެކަމަށް ރައީސް ވިދާޅުވިއެވެ.
ގެސްޓްހައުސް ވިޔަފާރިއަކީ ރަށުގެ ޢަންމު، އަސާސީ ޚިދުމަތްތަކާ ގުޅިފައިވާ ވިޔަފާރިއެއްކަން ފާހަގަކުރައްވަމުން ރައީސް އިބްރާހީމް މުޙައްމަދު ޞަލިޙް ވިދާޅުވީ، ނަރުދަމާއާއި ރައްކާތެރިގޮތުގައި ކުނި ނައްތާލެވޭނެ ނިޒާމެއް ނެތުމަކީ ގެސްޓްހައުސް ވިޔަފާރި ތަރައްޤީކުރުމަށް އޮތް އެންމެ ބޮޑު އެއް ހުރަސްކަމަށެވެ. އަދި ރަނގަޅު ފެންވަރުގެ ބަނދަރާއި، ރަނގަޅު ސިއްހީ ޚިދުމަތް ލިބުމަކީވެސް މުހިންމު ކަންކަމުގެ ގޮތުގައި ރައީސް ފާހަގކުރެއްވިއެވެ. އެހެންކަމުން ރަށްރަށް ތަރައްޤީކޮށްގެން މެނުވީ ގެސްޓްހައުސް ވިޔަފާރި ތަރައްޤީކުރެވެން ނެތްކަމަށް ރައީސް ވިދާޅުވިއެވެ.
"ރަށުގެ ތަރައްޤީއަކީ ގެސްޓްހައުސް ވިޔަފާރި ޝާމިލްވެފައިވާ ވަށައިޖެހިފައިވާ ފުރިހަމަ ނިޒާމަކަށް ހަދަން އެބަޖެހޭ. ގެސްޓްހައުސް ހިންގުމުގެ ހުއްދަ ދިނުމާއެކު އެވިޔަފާރި އެންމެ ފުރަތަމަ ފަށައިގަތް ރަށްރަށް މިހާރު އެހުރީ ރިސޯޓް ފެންވަރަށް ކުރިއަރާ، ފައްކާވެފައި. އެ ރަށްރަށުގެ އިޖުތިމާޢީ އަދި އުމްރާނީ ތަރައްޤީ އެތައްތަނެއް މައްޗަށްޖެހި ފަރުދީ ތަނަވަސްކަން އެތައް ގުނައެއް މިހާރުވަނީ އިތުރުވެފައި."
ރައީސް ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސުލްހުމްހޫރިއްޔާ ވިދާޅުވިގޮތުގައި ގެސްޓް ހައުސް ވިޔަފާރި ތަޢާރަފްވުމާ ހަމައަށް، ރާއްޖޭގެ ޓޫރިޒަމް އޮތީ، ހަމައެކަނި މުއްސަނދީންގެ މަންޒިލެއްގެ ގޮތުގައިކަމަށާއި، ސަރުކާރުގެ ސިޔާސަތަކީ، ފަތުރުވެރިކަމުގެ ނަފާ، ސީދާ ރައްޔިތު މީހާގެ ޖީބަށް ފޯރާނެ ގޮތަކަށް، މިޞިނާޢަތުގެ ކަންކަން ތަރުތީބުކުރުންކަމަށެވެ. އަދި، އެކަމަށްޓަކައި ޤަވާޢިދުތައް އިޞްލާޙް ކުރުމުގެ މަސައްކަތް ޓޫރިޒަމް މިނިސްޓްރީން މިހާރު ފަށާފައިވާކަމަށާއި، ނިމިގެންދިޔަ ސިމްޕޯޒިއަމުން ވެސް އެކަންކަމަށް މަގުފަހިވެގެންދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރާއްޖޭގެ ފަތުރުވެރިކަން ހަރުދަނާކޮށް، ގެސްޓްހައުސް ވިޔަފާރި ވެސް ހިމެނޭ ގޮތަށް، ޓޫރިޒަމްގެ އެކި ދާއިރާތައް އިސްތިހާރުކުރުން އިތުރުކުރުމަކީ، މިސަރުކާރުގެ ފުރަތަމަ 100 ދުވަހުގެ ތެރޭގައި ކުރަން ރާވާފައިވާ ކަމެއްކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވިގޮތުގައި، ދުނިޔޭގެ ފަތުރުވެރިކަމުގެ ބާޒާރަށް ރާއްޖެ އިސްތިހާރު ކުރަންވީ، ހަމައެކަނި މުއްސަނދީންގެ މަންޒިލެއްގެ ގޮތުގައި ނޫންކަމަށާ، އަދި ރާއްޖޭގައި ހުރި މެދުފަންތީގެ ފުރުޞަތުތަކާއި، ހެޔޮ އަގުގައި ޗުއްޓީ ހޭދަކުރުމުގެ ވާހަކަވެސް، ގިނަގިނައިން ދައްކަންވެއްޖެކަމުގައި ރައީސުލްޖުމްހޫރިއްޔާ ވިދާޅުވިއެވެ.
އެކި އަތޮޅުތަކުގައި ގެސްޓް ހައުސް ވިޔަފާރި ތަރައްޤީވެ ފުޅާވަމުން އަންނައިރު، މިވިޔަފާރި ހިނގަނީ އެންމެ ރަނގަޅަށް ރެގިއުލޭޓް ކުރެވިގެން ނޫންކަމަށާއި، އެއަމާޒަށް ވާޞިލުވެވޭނީ، ފަތުރުވެރިކަންވެސް ލާމަރުކަޒީ ކުރެވި، ގެސްޓް ހައުސް ވިޔަފާރީގެ މައި އިންޖީނަކީ ކައުންސިލްތައް ކަމުގައި ހަދައިގެންކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.