ދުވާފަރުގައި ދިރިއުޅޭ ކަނދޮޅުދޫ ރައްޔިތުންގެ ރަށްވެހިކަން ދުވާފަރަށް ބަދަލުކޮށް، އެރަށުގެ ގެތައް ވަރަށްއަވަހަށް ރައްޔިތުންނަށް ރަޖިސްޓްރީކޮށްދޭނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.
ރ.ދުވާފަރުގައި ބޭއްވި ދިވެހިންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްކެވި ވާހަކަފުޅުގައި، ވަނީ، ސުނާމީ ކާރިޘާގައި ރާއްޖެއިން ނިޔާވި 82 މީހުނާއި ވީނުވީއެއް ނޭނގި ގެއްލުނު 26 މީހުންގެ ހަނދާން އައުކުރައްވާފައެވެ. އަދި ރައީސްގެ އަމިއްލަފުޅުތަޖުރިބާ ޢާއްމުރައްޔިތުންނާ ޙިއްސާކުރައްވާފައެވެ. ސުނާމީ ކާރިޘާގައި ރާއްޖޭގައި މީހުން ދިރިއުޅެމުން އައި 199 ރަށުގެ ތެރެއިން 190 ރަށަށް އެކިވަރުގެ ގެއްލުންތައް ލިބުނުކަން ފާހަގަކުރައްވަމުން ވިދާޅުވީ، އަލުން އާރާސްތުކުރުން ދަތިވާ މިންވަރަށް ހަލާކުވި ފަސް ރަށެއްގެ މީހުން އެހެން ރަށްރަށުގައި ވަޒަންވެރިކުރުވާފައިވާކަމަށެވެ. ގެދޮރު ސުންނާފަތިވި ފަނަރަ ހާހަށްވުރެ ގިނަ މީހުން، އެތައް އަހަރު ދުވަހެއްވަންދެން އެކި ރަށްރަށުގައި ވަގުތީ ހިޔާތަކުގައި ދިރިއުޅުނުކަން ރައީސް ފާހަގަކުރެއްވިއެވެ.
"ސުނާމީއަކީ، އިޤްތިޞާދީ ގޮތުންނާއި އިޖްތިމާޢީ ގޮތުން، ރާއްޖެ ފުން ވަޅުގަނޑަކަށް ގަންބައިލި ހާދިސާއެއް. އެއީ ޢާއިލާތައް ވިއްސިވިހާލިކޮށް، އެކުވެރީން ދެތަން ކުރުވި، ހިތި ތަޖުރިބާއެއް. މައިންބަފައިންނާއި ދަރީން، އަބަދަށްޓަކައި ވަކިކުރުވި ވޭނީ ހިތާމައެއް. މުދަލާއި ގެދޮރު ސުންނާފަތިކުރި، ފޫނުބެދޭނެ ގެއްލުންތަކެއް. އެކާރިސާއަކީ އަޅުގަނޑުމެންނާ ކުރިމަތިވި ވަރުގަދަ އިމްތިޙާނެއް. އެއިމްތިޙާނުގައި ލިބުނު ކާމިޔާބީގެ ސިއްރަކީ، އަޅުގަނޑުމެންގެ ޢަޤީދާގެ ވަރުގަދަކަމާއި ސާފު އީމާންތެރިކަން. އެކާރިސާގެ ބިރުވެރިކަމުން ހިތްތަކަށް ހަމަޖެހުން ހޯދައިދިނީ، މާތް ﷲގެ އޯގާވަންތަކަމާ މެދު، އަޅުގަނޑުމެންގެ ހިތްތަކުގައި އޮތް ޔަޤީންކަން." ރައީސް ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙް ވިދާޅުވީ ސުނާމީގައި ދިވެހީން ދައްކުވައިދިން އެއްބައިވަންތަކަން ބައިނަލްއަޤްވާމީ މުޖްތަމަޢު ބަލައިގަތީ ނަމޫނާއެއްގެ ގޮތުގައިކަމަށާއި، ރަށްރަށް ވީރާނާވެ ގެދޮރު ސުންނާފަތިވެގެން ދިޔައިރުވެސް އެހެން ޤައުމުތަކުން ފެނުނުފަދަ ހަމަނުޖެހުންތަކާއި ތަޅާފޮޅުމާއި ބައިބައިވުމެއް ދިވެހީންގެ ތެރެއިން ފެނިގެން ގޮސްފައިނުވާކަމަށެވެ.
"އަމިއްލަ ފުރާނަ ނުރައްކަލަށް ހުށަހެޅިގެން ދިޔަ ހިނދުގައިވެސް، އަޅުގަނޑުމެން އިސްކަން ދިނީ، އަނެކާގެ ފުރާނަ ސަލާމަތްކުރުމަށް. އަމިއްލަ ހައިހޫނުކަމަށް ކެތްތެރިވެ، އަވަސްވެގަތީ އަނެކާގެ ހައިހޫނުކަން ފިލުވައިދިނުމަށް. އަތުގައި ހުރި އަންނައުނާއި މުދަލާއި ފައިސާ، އެ ދުވަހު ހޭދަކުރީ ޙާލުގައި ޖެހުނު އަޚުންނާއި އުޚްތުންނަށް." ރައީސް ވިދާޅުވިއެވެ.
ސުނާމީ ކާރިޘާގައި ދިވެހީން ސާބިތުކޮށްދިން އެއްބައިވަންތަކަން އެންމެގާތުން ތަޖުރިބާކުރި ބަޔަކަށް ދުވާފަރުގެ ރައްޔިތުން ވާނެކަމށް ރައީސް ވިދާޅުވިއެވެ. ކަނދޮޅުދޫ ސުންނާފަތިވުމުން އެރަށުގެ ރައްޔިތުންނަށް ހިޔާވަހިކަމާއި އެހީތެރިކަން ފޯރުކޮށްދިނީ އުނގޫފާރު، އަލިފުށި، ހުޅުދުއްފާރު އަދި މީދޫ މަޑުއްވަރީގެ ރައްޔިތުންކަމަށްވސް ރައީސް ވިދާޅުވިއެވެ.
ސުނާމީއަށް ފަހު، ދުވާފަރުގެ އާބާދީ ވަރަށް ބޮޑުތަން އިތުރުވެފައިވާކަމަށާއި، ބިން ފުރި ގޯތިދެވޭނެ ގޮތެއް ނެތުމަކީ އެރަށަށް ދިމާވެފައިވާ އެންމެ ބޮޑު މައްސަލަކަމަށް އެމަނިކުފާނު ވިދާޅުވިއެވެ.
އަދި އެރަށުގެ ޢާއިލާތަކާ ޙަވާލުކޮށްފައިވާ ގޯތިތައް އަދިވެސް ރަޖިސްޓްރީ ކުރެވިފައިނުވާކަން ފާހަގަކުރައްވައި، އެރަށުގެ ރައްޔިތުންގެ ރަށްވެހިކަމާ ގޯތިތަކުގެ ރަޖޖިސްޓްރީ އެރަށުގެ ރައްޔިތުންގެމައްޗަށް ބަދަލުކުރުމުގެ މަސައްކަތް ވަރަށް އަވަހަށް ފަށްޓަވާނެކަމަށް ރައިސް ވިދާޅުވިއެވެ. އަދި އެއީ އެމަނިކުފާނުގެ ރިޔާސީ ވަޢުދެއްކަންވެސް ރައީސް ފާހަގަކުރެއްވިއެވެ.
"މިއީ، ދުރާލައި ޕްލޭންކޮށްގެން އާބާދުކުރި ރަށަކަށް ވިޔަސް، މިހާރު މިއީ ބިން ފުރިފައި އޮތް ރަށެއް. އިތުރަށް ގޯތި ދެވޭނެ ބިމެއް އަދި ފްލެޓް އަޅާނެ ބިމެއް ވެސް ނެތް. އެކަން ޙައްލު ކުރުމަށް މިސަރުކާރުން ގެންގުޅޭ ވިސްނުމަކީ، ބިން ހިއްކައިގެން ބޯހިޔާވަހިކޮށް ފޯރުކޮށްދިނުން. އިރާދަކުރެއްވިއްޔާ އެކަން ކުރެވޭނެ. މިރަށަށް އެންމެ ދަތިވާ އަނެއް ކަމަކީ، އެކަށީގެންވާ ޞިއްޙީ ޚިދުމަތް ލިބެން ނެތުން. އަޅުގަނޑުމެންގެ އަމާޒަކީ، މިރަށުގެ ޞިއްޙީ މަރުކަޒުގައި ލެބޯޓްރީއެއް ހަދައި، ޞިއްޙީ މަރުކަޒުގެ ޚިދުމަތް 24 ގަޑިއިރަށް ބަދަލުކުރުން" ރައީސް ވިދާޅުވިއެވެ.
ދުވާފަރަކީވެސް މަސްވެރިކަންކުރާ މަސްވެރި ރަށެއްކަމަށާއި، ސަރުކާރުގެ ސިޔާސަތުގެ ތެރެއިން "މަސްދޯނި އެކައުންޓް" ހުޅުވުމުން، މަސްވެރިންވެސް ބޭންކިން ނިޒާމްގެ ތެރެއަށް ވަދެގެންދާނެކަމަށް އެމަނިކުފާނު ވިދާޅުވި. އެއީ މަސްވެރިންނަށް ލިބޭ ފައިސާ، ރަށުގައިތިބެގެން ބޭންކަށް ޖަމާކޮށް ނެގުމަށް ލިބޭ ފަހި ފުރުސަތެއްކަމަށާ، އެހެން މުވައްޒަފުންނެކޭ އެއްފަދައިން، ލޯނާއި ކްރެޑިޓް ސްކީމުތަކުން މަސްވެރިންނަށް ވެސް ފުރުޞަތު ލިބިގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ