ދިވެހިންގެ އެއްބައިވަންތަކަމުގެ ދުވަސް ފާހަގަކުރަނީ، 2004 ވަނަ އަހަރުގެ ޑިސެމްބަރު މަހުގެ 26 ވަނަދުވަހު ރާއްޖެއަށް ކުރިމަތިވި ސުނާމީ ކާރިސާގެ ހަނދާން އާކޮށް ދިވެހިން އެދުވަހު ދެއްކި އެއްބައިވަންތަކާމުގެ ރީތި ނަމޫނާގެ ހަނދާން އާކުރާ ދުވަހުގެ ގޮތުގައެވެ. ސުނާމީ ކާރިސާއަށް މިއަދު 14 އަހަރު ފުރޭއިރު، އެ ދުވަހުގެ މަންޒަރުތަކާއި އަޑުތައް ދިވެހިންގެ ހަނދާނުގައި އަދިވެސް އެބަހުއްޓެވެ.
2004 ވަނަ އަހަރުގެ ޑިސެމްބަރ މަހުގެ 26 ވަނަ ދުވަހު ރާއްޖެއަށް އެރި ސުނާމީގެ ބިޔަ ރާޅުތަކަކީ ދިވެހި އެތައް އާއިލާއެއްގެ ދިރިއުޅުން މުޅިން ސުއްނާފަތިކޮށްލި ބިރުވެރި ރާޅުތަކެކެވެ. މި ބިރުވެރި ކާރިސާގައި ދިވެހިންގެ ތެރެއިން 82 މީހަކު މަރުވެ، 26 މީހަކު ވަނީ ގެއްލިފައެވެ. 23 ރަށަކަށް ބޮޑެތި ގެއްލުންތަކެއް ލިބުންއިރު، އޭގެ ތެރެއިން 4 ރަށެއް އެއްކޮށް ސުންނާފަތިވިއެވެ. 15 ހާސް މީހުންގެ ގެދޮރުގެއްލި، 13 ރަށަކުން މީހުން ހުސްކޮށް، އެހެން ރަށްރަށަށް ބަދަލުކުރަން ޖެހުނެވެ. ރާއްޖޭގައި މީހުން ދިރިއުޅޭ 9 ރަށެއް ފިޔަވައި އެހެން ހުރިހާ ރަށަކަށް ސުނާމީގެ އަސަރު ކުރިއެވެ.
އެތައް ދުވަހެއްގެ ބުރަ މަސައްކަތުން އާރާސްތުކުރި މުޅި ދިރިއުޅުން ބަލަބަލަ ތިއްބައި ސުނާމީގެ ބިޔަ ރާޅުގެ ތެރޭގައި ސުންނާފަތިވެ މުޅި ދިރިއުޅުން އަލުން ފަށަން އެތައް އާއިލާއަކަށް މަޖުބޫރުވިއެވެ. ޢުމްރާނީ އެތައް ވަޞީލަތްތަކެއް ބިމާ ހަމަވެ، އިޤްތިޞާދީގޮތުންވެސް ޤައުމަށް ފޫނުބެދޭވަރުގެ ގެއްލުންތަކެއް ލިބުނެވެ. ތަރައްޤީގައި އެތައް އަހަރެއް ފަހަތައްޖެހި، މުޅި ޤައުމު އެއްކޮށް ހުއްޓުމަކަށް އައެވެ.
މި ހިތާމަވެރި ކާރިސާ ދިވެހިން މިއަދު ފާހަގަ ކުރަނީ ފަހުގެ ތާރީޚެއްގައި އެއްބައިވަންތަކަމުގެ ރީތި ނަމޫނާ ދިވެހިންދެއްކި ދުވަހުގެ ގޮތުގައެވެ. 26 ޑިސެމްބަރ 2004 ވަނަ ދުވަހު ދިވެހިންގެ ފަރާތުން ފެނިގެންދިޔައީ އެކުވެރިކަމާއި، އެއްބައިވަންތަކުގެ އާދަޔާ ޚިލާފު ނަމޫނާއެވެ. ބަޔަކު އެހީދޭނެ އިރެއްގެ އިންތިޒާރުގައި ތިބުމުގެ ބަދަލުގައި، އެކަކު އަނެކަކަށް ވަގުތުން ވަގުތަށް ދެވެންއޮތް އެހީއެއް ދޭންފެށިއެވެ. ބޮޑެތި ގެއްލުންތައްވި ރަށްރަށަށް މަސްދޯނިތަކާއި، ބޯޓްތަކުގައި އެހީގެ ތަކެތި ހިފައިގެން ދަތުރުކުރިއެވެ. ސުންނާފަތިވެފައިވާ ގޭގެއާއި، އެހީބޭނުންވާ މީހުންނަށް އެހީތެރިވާންފެށީ މަޖުބޫރުކަމެއްނެތި ހިތުން ރުހުމުންނެވެ. މިއަދު މި ދުވަހުގެ ހަންދާން އަޅުގަނޑުމެން މި އާކުރަނީ ދިވެހިން ދެއްކި އެއްބައިވަންތަކަމުގެ ރީތި ނަމޫނާގެ ހަނދާން އާކުރަމުންނެވެ.
ސުނާމީ ކާރިސާގައި ދިވެހިން ދައްކުވައިދިން އެއްބައިވަންތަކަމުގެ ރީތި ނަމޫނާ ފާހަގަކޮށް، އެހަނދާން އާކުރުމުގެ ގޮތުން 2005 ވަނަ އަހަރުން ފެށިގެން ކޮންމެ އަހަރެއްގެވެސް ޑިސެމްބަރުމަހުގެ 26 ވަނަ ދުވަސް ފާހަގަކުރަމުން އަންނަނީ ދިވެހިންގެ އެއްބައިވަންތަކަމުގެ ދުވަހުގެ ގޮތުގައެވެ. މިފަދަ ދުވަހެއް ޤައުމީ ފެންވަރެއްގައި ފާހަގަކުރުމުގެ އެންމެ ބޮޑު މަޤްޞަދަކީ ސުނާމީގައި އަޅުގަނޑުމެންނާ ވަކިވެގެންދިޔަ ލޮބުވެތި އަޚުންނާއި، އުޚްތުންގެ ހަނދާންތައް އައު ކުރުމުގެ އިތުރުން، ދިވެހިން އެދުވަހު ސާބިތުކޮށްދިން އެކުވެރިކަމާއި، އެއްބައިވަންތަކަމާއި، އެއްބައެއްވަންތަކުގެ މަތިވެރި ރޫޙު ދިރުވައި އާލާކުރުމެވެ.
ދިވެހިންނަކީ ޒަމާނުއްސުރެވެސް އެކުވެރި، ބަދަހިގުޅުމެއް ބާއްވަމުން އަންނަބައެކެވެ. ރާއްޖެއަށް ދިމާވާ ކޮންމެކަމެއްގައި އެއްބައިވަންތައްކަމުގެ ރީތި ނަމޫނާ ދިވެހިން ދައްކައެވެ. ކުޑަ ޤައުމެއްނަމަވެސް، މިނިވަން މި ދައުލަތުގެ ސިޔާސަތާއި މިނިވަންކަމުގެ އަސްލަކީ ދިވެހިންގެ ދީނާއި، ދިވެހިންގެ މެދުގައި މިއޮތް އެއްބައިވަންތަކާއި، އަޚްވަންތަކަމުގެ ރޫޙެވެ. މި އެއްބައިވަންތަކަމާއި އަޚްވަންތަކަމުގެ މިސާލު ކޮންމެ ދުވަހަކު ދައްކާބައެއްކަމުގައި އަޅުގަނޑުމެން ވަމާތޯއެވެ.