ބުރިޖު ހައިވޭގެ މަގުބައްތިތައް ޓެސްޓްކުރުމަށްޓަކައި މިރޭ ދިއްލާނެކަމަށް ހައުސިންގ ޑިވަލޮޕްމަންޓް ކޯޕަރޭޝަނުން ބުނެފިއެވެ.
ސިނަމާލެ ބުރިޖު އާއްމު ދަތުރުފަތުރަށް ރަސްމީކޮށް ހުޅުވާލުމާއެކު ހުޅުލެއާއި، ހުޅުމާލެއާއި ދެމެދު ތަރައްޤީކޮށްފައިވާ ލިންކް ރޯޑުވެސް ވަނީ އާއްމުކޮށް ހުޅުވާލާފައެވެ. ނަމަވެސް ލިންކް ރޯޑުގެ ޕޭވްމަންޓާއި، މަގުބައްތިތައް ހަރުކުރުމުގެ މަސައްކަތް އެއްކޮށް ނިމިފައިނުވާތީ، އެ މަގު މިހާތަނަށް ބޭނުންކުރަމުންއައީ މަގުބަތިތައް ނުދިއްލައެވެ.
ޕީއެސްއެމް ނިއުސްއަށް މަޢުލޫމާތުދެމުން އެޗްޑީސީގެ އޮފިޝަލަކު ވިދާޅުވީ ހުޅުލެ-ހުޅުމާލޭ ލިންކް ރޯޑުގައި ޖުމްލަ 315 މަގުބައްތި ހަރުކޮށްފައިވާކަމަށާއި، މި ބައްތިތަކަށް ކަރަންޓް ފޯރުކޮށްދޭނީ ސްޓެލްކޯއިން ކަމަށެވެ. އަދި މި ބައްތިތައް ޓެސްޓްކުރުމުގެ ގޮތުން މިއަދު އިރުއޮއްސި 6 ޖަހާއިރު ވަގުތީގޮތުން ދިއްލުމަށް ހަމަޖެހިފައިވާކަމަށާއި، މުޅި ރޭ އެ ބައްތިތައް ދިއްލާފައި ބަހައްޓާނެކަމަށެވެ. މިރޭ ލައިޓްތައް ޓެސްޓް ކުރުމަށްފަހު މި ހަފްތާގެ ތެރޭގައި ލިންކް ރޯޑު ދާއިމީކޮށް ދިއްލޭވަރު ވާނެކަމަށްވެސް އެޗް.ޑީ.ސީން ބުނެއެވެ.
ސިނަމާލެ ބްރިޖާއެކު މާލެއާއި، ހުޅުލެއާއި، ހުޅުމާލޭގެ އެއްގަމު ދަތުރުފަތުރުގެ ނިޒާމް އެއް ވިއުގައަކުން ގުޅާލުމަށްޓަކައި ބައިނަލްއަޤްވާމީ މިންގަނޑުތަކަށް ފެތޭނެހެން 4 ކިލޯމީޓަރުގެ ލިންކް ރޯޑެއް ސަރުކާރުން ވަނީ ތަރައްޤީކޮށްފައެވެ. 4 ލޭނަށް ފަރުމާކޮށްފައިވާ މި ލިންކް ރޯޑުގެ މަސައްކަތް ޑިޒައިން އެންޑް ބިލްޑް އުސޫލުން ކޮށްފައިވަނީ ޗައިނާގެ ކުންފުންޏެއްކަމަށްވާ ހުނާން ކޮންސްޓްރަކްޝަން އިންޖިނިއަރިން ގްރޫޕުންނެވެ.