ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ބޭންކް އެކައުންޓްތައް ފްރީޒްކުރި މައްސަލަ ހައިކޯޓްގައި އިސްތިއުނާފްކޮށްފިއެވެ.
ރައީސް ޔާމީންގެ އެކައުންޓްތަކުން 100 މިލިއަނަށްވުރެ ގިނަ ރުފިޔާ ފުލުހުން ވަނީ ކޯޓް އަމުރެއްގެ ދަށުން ފްރީޒްކޮށްފައެވެ. ރައީސް ޔާމީން ޤަވާއިދާ ޚިލާފަށް މާލީ މުޢާމަލާތްތަކެއްކުރިކަމަށް ތުހުމަތުކުރެވޭ މައްސަލައެއް ފުލުހުން ބަލަންފަށާފައިވަނީ ރިޔާސީ އިންތިޚާބު ތެރޭގައި ރައީސް ޔާމީންގެ ބޭންކް އެކައުންޓަކަށް ގިނައަދަދެއްގެ ފައިސާތަކެއް ޖަމާކުރި މައްސަލަ އެމްއެމްއޭއިން ފުލުހުންނަށް ހުށަހެޅުމުންނެވެ.
ޕީޕީއެމް އޮފީހުގައި ނޫސްވެރިންނަށް މަޢުލޫމާތު ދެއްވަމުން ރައީސް ޔާމީންގެ ޤާނޫނީ ޓީމްގެ ފަރާތުން ވާހަކަފުޅުދައްކަވަމުން ޕީޕީއެމްގެ ނާއިބުރައީސް އަލްއުސްތާޛާ ޢާއިޝަތު އާޒިމާ ޝަކޫރު ވިދާޅުވީ، ރައީސް ޔާމީންގެ އެކައުންޓްތައް ފްރީޒްކުރި މައްސަލަ ހައިކޯޓްގައި އިސްތިއުނާފްކޮށްފައިވާކަމަށެވެ.
މި މައްސަލައިގައި ރައީސް ޔާމީންގެ ޤާނޫނީ ޓީމަށް ފާހަގަކުރެއްވު ކަންކަން ޙިއްޞާކުރައްވަމުން އާޒިމާ ވިދާޅުވީ، އެކައުންޓްތައް ފްރީޒްކުރުމަށް ކްރިމިނަލް ކޯޓުން ނެރެފައިވާ އަމުރުތަކަކީ، ޖިނާއީ އިޖުރާތުގެ ޤާނޫނާއި، ޤާނޫނުއަސާސީން ކަށަވަރުކޮށްދޭ ޙައްޤުތަކާ ފުށޫއަރާގޮތަށް ނެރެފައިވާ އުމުރުތަކެއްކަމަށެވެ. އާޒިމާ ވިދާޅުވީ ރައީސް ޔާމީންގެ އެކައުންޓްތައް ފްރީޒްކުރަންވީ ސަބަބެއް އޮތްކަމަށް ޤަބޫލު ނުކުރައްވާކަމަށާއި، އެކައުންޓުގައި ހުރި ފައިސާއާ ގުޅޭގޮތުން ފުލުހުން ރައިސް ޔާމީނާ ސުވާލުކޮށްފައި ނުވާކަމަށެވެ.
""ކޯޓު އަމުރުތަކަށް ބަލާއިރު އެ އަމުރުތަކުން އެނގެން އެބައޮތް ރައީސް ޔާމީންގެ ހުރިހާ އެކައުންޓްތައް ކޯޓަށް ހުށަހެޅުއްވިކަމަށް. ކޯޓަށް ހުށަހަޅުއްވާފައި ކޯޓު އަމުރު ނެރުއްވާފައޮތީ. އަޅުގަނޑު ދަންނަވާނީ މިއީ ސީޔާސި ބޭނުމަސް ސަރުކާރުކޮށްފައިވާ ކަމެކޭ. ހުރިޙާ އެކައުންޓެއް ފްރިޒްކުރަންޖެހޭވަރުގެ ކަމެއް އޮތްކަމަކަށް ޤަބޫލެއް ނުކުރެވޭ."ޕީޕީއެމްގެ ނާއިބުރައީސް އަލްއުސްތާޛާ ޢާއިޝަތު އާޒިމާ ޝަކޫރު
މިމައްސަލައިގެ އިތުރުން ރައީސް ޔާމީންގެ މައްޗަށް ތުހުމަތުކުރާ އެމްއެމްޕީއާރުގެ ޚިޔާނާތުގެ މައްސަލައާއި، މަނީލޯންޑްރިންގއާއި ޓެރަރިޒަމަށް ފަންޑުކުރިކަމަށް ތުހުމަތުކުރާ ސަބަބުވެސް ފުލުހުން ސާފުކޮށްދީފައިނުވާކަމަށް އާޒިމާ ވިދާޅުވިއެވެ.
ރައީސް ޔާމީން ވަނީ އެމަނިކުފާނަށް ނިސްބަތްވާ އެކައުންޓުގައި ހުންނާނީ ޞައްޙަ ޖާއިޒު ފައިސާ ކަމަށާއި ޤާނޫނާއި ޚިލާފު އެއްވެސް ފައިސާއެއް އެކައުންޓުގައި ނުހުންނާނެކަމަށް ވިދާޅުވެފައެވެ.