ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އަލަށް އުފައްދަވާ ސިޔާސީ ޕާޓީ "ޕީޕަލްސް ނޭޝަނަލް ކޮންގްރެސް" އުފެއްދުމުގެ ހުއްދައަށްއެދި އިލެކްޝަންސް ކޮމިޝަނަށް ހުށަހަޅައިފިއެވެ. އައު ސިޔާސީ ޕާޓީ އުފެއްދުމަށް ރައީސް ޔާމީންގެ ފަރާތުން އިލެކްޝަންސް ކޮމިޝަނަށް ހުށަހަޅާފައިވަނީ، ޕީޕީއެމްގެ ނާއިބު ރައީސް އަދި ފޮނަދޫ ދާއިރާގެ މެންބަރު ޢަބްދުއްރަހީމް ޢަބްދުﷲ އެވެ.
ޕީއެސްއެމް ނިއުސްއަށް މައުލޫމާތުދެއްވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، ޕީޕަލްސް ނޭޝަނަލް ކޮންގްރެސްގެ ނަމުގައި ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށަހެޅި ލިއުންތަކަށްބަލައި، އެއްވެސް މައްސަލައެއް ނެތްނަމަ މި ހަފްތާގެތެރޭގައި ޕާޓީ އުފެއްދުމުގެ ހުއްދަދެއްވާނެކަމަށެވެ. އަދި ހުށަހެޅި ލިޔެކިއުންތަކުގައި މައްސަލައެއް އޮތްނަމަ އެކަން އިސްލާހުކުރުމަށްފަހު ވަކި މުއްދަތެއްގެ ތެރޭގައި ހުށަހެޅުމަށް ފުރުސަތު ދެއްވާނެކަމަށް ޝަރީފް ވިދާޅުވިއެވެ. ޝަރީފް ވިދާޅުވީ އައު ސިޔާސީ ޕާޓީ އުފެއްދުމަށްޓަކައި އިލެކްޝަންސް ކޮމިޝަންގެ ފަރާތުން ދޭންޖެހޭ ހުރިހާ އެއްބާރުލުމެއް ދޭނެކަމަށާއި، ކޮމިޝަންގެ ފަރާތުން ލުއިފަސޭހަކޮށްދެވެންހުރި ކަންކަން ޕާޓީ އުފައްދާ ފަރާތަށް ލުއިފަސޭހަ ކޮށްދޭނެކަމަށެވެ.
""މިސާލަކަށް މައްސަލައެއް ޖެހިއްޖެނަމަ އެބޭފުޅުންނަށް ދަންވާނީ އަލުން ހުށަހެޅުމަށް. މައްސަލައެއް ނެތިއްޔާ މިހަފްތާގެ ތެރޭގައި ހުއްދަ ދޭނަން."އިލެކްޝަންސް ކޮމިޝަންގެ ރައީސް އަޙްމަދު ޝަރީފް
ކުރީގެ ރައީސް ޔާމީން އައު ސިޔާސީ ޕާޓިއެއް އުފެއްދުމަށް އިލެކްޝަންސް ކޮމިޝަނަށް ހުށަހަޅާފައި ވަނީ، ޕީޕީއެމް ހިންގުން އަލުން ކުރީގެ ރައީސް މައުމޫނާ ހަވާލުކުރުމަށް ކޯޓަށް މައްސަލަ ހުށަހަޅާފައިވަނިކޮށެވެ. ޕީޕީއެމްގެ ހިންގުން ރައީސް ޔާމީނާ ޙަވާލުކުރީ، އެޕާޓީގެ ރައީސަކަށް ކުރީގެ ރައީސް މައުމޫން ހުންނަވަނިކޮށް ސިވިލް ކޯޓުން 2016 ވަނަ އަހަރު ކުރި ހުކުމަކުންނެވެ. ފަހުން ރައީސް މައުމޫން ވަނީ އެޕާޓީގެ މެންބަރުކަމުން ވަކިކޮށްފައެވެ.
ރައީސް ޔާމީނަށް ރިޔާސީ އިންތިޚާބުގައި ލިބިވަޑައިގަތް ނާކާމިޔާބީއާއެކު ޕީޕީއެމުން ޚާއްޞަގޮތުން ބޭއްވި ކޮންގްރެސްއެއްގައި އެޕާޓީގެ ރައީސަކަށް ރައީސް ޔާމީންވަނީ އިންތިޚާބުކޮށްފައެވެ. އިލެކްޝަންސް ކޮމިޝަނުން ޕީޕީއެމްގެ ކޮންގްރެސް ބަލައިނުގަތުމަށް ނިންމި ނަމަވެސް ޕީޕީއެމުން ބޭއްވި ކޮންގްރެސް ޞައްޙަކަމަށް ހައިކޯޓުން ޙުކުމް ކުރުމާގުޅިގެން، ރައީސް ޔާމީނަކީ ޕީޕީއެމްގެ ރައީސްގެ ގޮތުގައި އިލެކްޝަންސް ކޮމިޝަނުން ވަނީ ބަލައިގެންފައެވެ. އަދި ޕީޕީއެމްގެ ކޮންގްރެސް މައްސަލަ މިހާރު އޮތީ ސުޕްރީމް ކޯޓް މަރުޙަލާގައެވެ.
ޕީޕީއެމްގެ ހިންގުން ރައީސް މައުމޫނާ ހަވާލުކުރުމަށް ހުށަހެޅި މައްސަލައާއި، ޕީޕީއެމްގެ ކޮންގްރެސް މައްސަލައިގައި ސުޕްރީމް ކޯޓުން ގޮތެއް ކަނޑައަޅާފައި ނުވާތީ އައު ސިޔާސީ ޕާޓީއެއް އުފައްދަވަން އުޅޭކަން ކުރީގެ ރައީސް ޔާމީން ވަނީ އިޢުލާންކުރައްވާފައެވެ.
ޕީޕަލްސް ނޭޝަނަލް ކޮންގްރެސްގެ ނަމުގައި ޕާޓީއެއް އުފެއްދުމަށް ރައީސް ޔާމީން ހުށަހަޅުއްވާފައިވާއިރު، އެމަނިކުފާނުގެ ކުރީގެ ނާއިބު ރައީސް އަޙްމަދު އަދީބު އިސްކޮށް ހުންނަވައިގެން މޯލްޑިވްސް ތާރޑްވޭ ޑިމޮކްރަޓްސްގެ ނަމުގައި ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަނުން ވަނީ ދީފައެވެ. އަދި އެޕާޓީ އުފެއްދުމަށް ބާއްވަންޖެހޭ ޖަލްސާ މިރޭ ބޭއްވުމަށް ވަނީ ނިންމާފައެވެ.
ރިޔާސީ އިންތިޚާބުގެ ފަހުން އައު ފަސް ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށަހަޅާފައިވެއެވެ. އިލެކްޝަންސް ކޮމިޝަންގެ ރައީސް ވިދާޅުވީ ސިޔާސީ ޕާޓީ އުފެއްދުމަކީ ޤާނޫނީގޮތުން ރައްޔިތުންނަށް ލިބިދީފައިވާ ޙައްޤެއްކަމުން އެކަން ކޮންޓްރޯލްކުރުމަށް މަސައްކަތް ނުކުރާނެކަމަށެވެ. އިލެކްޝަންސް ކޮމިޝަންގެ ދަފްތަރުގައި 6 ސިޔާސީ ޕާޓީއެއް އޮތްއިރު، އިތުރު 2 ސިޔާސީ ޕާޓީއެއް އުފެއްދުމަށް އިލެކްޝަންސް ކޮމިޝަނުން ވަނީ ހުއްދަ ދީފައެވެ.