ހަފްތާ ބަންދުގައި ބޭއްވުމަށް ތައްޔާރުވަމުންދާ ހަފްތާރެސް މާކެޓު އަންނަ ހުކުރުދުވަހު ފަށާނެކަމަށް މިނިސްޓްރީ އޮފް ޔޫތު، ސްޕޯޓް އެންޑް ކޮމިއުނިޓީ އެމްޕަވަރމަންޓުން ބުނެފިއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ޔޫތު މިނިސްޓްރީގެ އޮފިޝަލަކު ވިދާޅުވީ، ކުލަގަދަ ރަސްމިއްޔާތަކާއިއެކު ހަފްތާރެސްގެ ފުރަތަމަ ހަރަކާތް މި ހަފްތާގައި ފަށާނެކަމަށެވެ. އެގޮތުން މި ހަރަކާތް ކުރިއަށްގެންދާނީ ވީކްއެންޑް މާކެޓަކާއި، މިއުޒިކް ޓެލެންޓް ޝޯއަކާއި އެއްކޮށްނެވެ. މާކެޓް ކުރިއަށްގެންދިއުމަށް ހަމަޖެހިފައިވަނީ، ހުކުރު ދުވަހު ހަވީރު 16:00 އިން ރޭގަނޑު 12:00 އަށް ރަސްފަންނު ސަރަހައްދުގައެވެ.
ޔޫތު މިނިސްޓްރީން ބުނީ މި ހަފްތާގެ ހަފްތާރެސް މާކެޓުގައި 64 ސްޓޯލް ހުންނާނެކަމަށެވެ. ސްޓޯލް ދިނުމުގައި ބޮޑަށް އިސްކަންދީފައި ހުންނާނީ އަލަށް ވިޔަފާރީގެ ދާއިރާއަށް ވަންނަ ޒުވާނުންނަށާއި، ކަނބަލުންނާއި ޚާއްސަ އެހީއަށް ބޭނުންވާ ފަރާތްތަކަށްކަމަށް އެ މިނިސްޓްރީން ބުނެއެވެ.
ކޮންމެ ހަފްތާއަކުވެސް ސްޓޯލް ދޫކުރަނީ މިކަމަށްއެދި ޝައުޤުވެރިކަން ފާޅުކުރާ ފަރާތްތަކުގެ ކިއު ތަރުތީބަށް ބަލާފައެވެ. މި ހަފްތާގެ މާކެޓަށް ސްޓޯލް ދޫކުރުން މާދަމާގެ ނިޔަލަށް ވެލާނާގޭ އަދި ޒުވާނުންގެ މަރުކަޒުން ކުރިއަށްދާނެކަމަށް ޔޫތު މިނިސްޓްރީން ބުނެއެވެ.
ހަފްތާ ބަންދުގައި ބޭއްވުމަށް ހަމަޖެހިފައިވާ މި ބާޒާރަކީ ތަފާތު މާހައުލެއްގައި ގިނަ ރައްޔިތުން އެއްތަނަކުން ބައްދަލުވެ، ވަގުތު ހޭދަކޮށްލުމަށް މަގުފަހިކޮށްދިނުންކަމަށް ޔޫތް މިނިސްޓްރީން ބުނެއެވެ. ހަފްތާ ބަންދުގައި ވީކްއެންޑް މާކެޓެއް ބޭއްވުމަކީ ރައީސް އިބްރާހިމް މުޙައްމަދު ޞާލިޙުގެ ރިޔާސީ ވައުދެކެވެ.