އަންނަ ރައްޔިތުންގެ މަޖިލީހުގެ އިންތިޚާބުގައި ޖުމްހޫރީ ޕާޓީގެ ޓިކެޓްގައި ހުރިހާ ދާއިރާއަކަށް ކުރިމަތިލުމުގެ ފުރުސަތު އެޕާޓީން ހުޅުވާލައިފިއެވެ. ޖުމްހުރީ ޕާޓިން މިގޮތަށް ނިންމީ އެ ޕާޓީން އިއްޔެ ބޭއްވި ކައުންސިލް ބައްދަލުވުމުންނެވެ.
ޖޭޕީން ބުނީ އަންނަ މަޖިލިސް އިންތިޚާބުގައި ވާދަކުރަން ބޭނުންވާ ފަރާރްތަކުން އަންނަ މަހުގެ 25 ވަނަދުވަހުގެ ކުރިން އެޕާޓީއަށް ހުށައެޅުމަށް ފުރުސަތު މިހާރު ހުޅުވާލާފައިވާކަމަށެވެ.
މަޖިލިސް އިންތިޚާބަށް ކުރިމަތިލުމަށް ޖޭޕީގެ ކައުންސިލުން ނިންމި ނަމަވެސް ފާޓީން ވާދަކުރާނެ ހުރިހާ ދައިރާއެއް އަަދި ކަނޑައަޅާފައިނުވާކަމަށް ޖޭޕީން ބުނެއެވެ. އަދި އިންތިހާބަށް ކުރިމަތިލާ ފަރާތްތަކަށް ޓިކެޓް ދޭނެ އުސޫލެއްވެސް އެ ޕާޓީން އަދި އާއްމުކޮށްފައެއް ނުވެއެވެ.
ޖޭޕީން ބުނީ ރައްޔިތުންގެ މަޖިލީހުގެ ގޮނޑި ގެއްލުނުކަމަށް ކަނޑައަޅާ، ނަމަވެސް ފަހުން ގޮނޑި ނުގެއްލޭކަމަށް ނިންމި ބާރަ މެންބަރުންގެ ތެރެއިން، އެޕާޓީ އާއި ގުޅިވަޑައިގެންނެވި މެމްބަރުންނަށް ޕްރައިމަރީއަކާ ނުލާ ޓިކެޓް ދިނުމަށް ޕާޓީގެ ލީޑަރު ނިންމާފައިވާކަމަށެވެ. އެހެންނަމަވެސް އެނޫން އެއްވެސް ފަރާތަކަށް ޓިކެޓު ކަށަވަރުކޮށްދީފައި ނުވާކަމަށްވެސް ޖޭޕީން ބުނެއެވެ.
ސަރުކާރު ކޯލިޝަންގައި ހިމެނޭ އެމްޑީޕީއާއި، ޖުމްހޫރީ ޕާޓީއާއި، އަދާލަތު ޕާޓީ އަދި ރައީސް މައުމޫންގެ ރިފޯމް މޫވްމަންޓުގެ ފަރާތުން އަންނަ މަޖިލީހުގެ އިންތިޚާބަށް ކުރިމަތިލުމާ ގުޅޭގޮތުން ޚިޔާލުތަފާތުވުން އުފެދިފައިވާއިރު އަދި ހަތަރު ލީޑަރުންނަށް ކޯލިޝަންގެ ފަރާތުން ވާދަކުރުމާމެދު ގޮތެއް ނިންމިފައެއް ނުވެއެވެ. އެމްޑީޕީން ވަނީ މަޖިލީހުގެ 87 ދާއިރާގެ ތެރެއިން 86 ދާއިރާއަށް ވާދަކުރާނެކަން އިޢުލާނުކޮށްފައެވެ.