ލޯކަލް ގަވަރުމަންޓް އޮތޯރިޓީ، އެލްޖީއޭގެ ރައީސްކަމަށް ހޯމް މިނިސްޓަރ އައްޝައިޚް އިމްރާން ޢަބްދުﷲ ހަމަޖައްސަވައިފިއެވެ.
ގާނޫނު އަސާސީގެ 140 ވަނަ މާއްދާގައި ބަޔާންކޮށްފައިވާގޮތުން ޤާނޫނުއަސާސީއާއި ޤާނޫނުގެ ދަށުން އުފައްދާ މިނިވަން މުސްތަޤިއްލު މުއައްސަސާތައް ފިޔަވައި، އެހެން އިދާރާތަކާއި މުއައްސަސާއާކާ މަސްއޫލުވާނެ ވަޒީރަކު ހުންނަންޖެހެއެވެ. އެގޮތުން ހޯމް މިނިސްޓަރ އިމްރާން ޢަބްދުﷲ އެލްޖީއޭގެ ބޯޑަށް ރައީސުލްޖުމްހޫރިއްޔާ އައްޔަންކުރައްވާފައިވަނީ ޤާނޫނުއަސާސީގެ 140 ވަނަ މާއްދާގައިވާގޮތުގެ މަތިން އެ އޮތޯރިޓީއާ މަސްއޫލުވާނެ ވަޒީރެއްގެގޮތުގައެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 63 ވަނަ މާއްދާގެ (ހ) ގެ ދަށުން، އެލްޖީއޭގެ ރައީސަކީ އެބޯޑަށް ރައީސުލްޖުމްހޫރިއްޔާ އައްޔަންކުރާ ވަޒީރުންގެ މަޖިލީހުގެ މެންބަރެވެ. އެހެންކަމުން ހޯމް މިނިސްޓަރ އެލްޖީއޭގެ މެންބަރުކަމަށް އައްޔަންކުރުމާއެކު އެމަނިކުފާނަކީ އެއޮތޯރިޓީގެ ބޯޑުގެ ރައީސެވެ.
އެލްޖީއޭގެ ބޯޑުގައި ތިއްބަވާނީ މިނިސްޓަރާއެކު ފަސް މެންބަރުންނެވެ. އެއީ ރައީސް އައްޔަން ކުރައްވާ މިނިސްޓަރަކާއި، ޖެންޑާ އިކުއަލިޓީ ދާއިރާގެ އަންހެން ބޭފުޅަކާއި، މަދަނީ ޖަމިއްޔާއެއްގެ މެމްބަރަކާއި، ގަވަރނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ތަޖްރިބާ ލިބިފައިވާ ބޭފުޅަކާއި، އެލްޖީއޭގެ ޗީފް އެގްޒެކެޓިވް އޮފިސަރެވެ.