އިމިގްރޭޝަން ކޮންޓްރޯލަރގެ މަޤާމުގައި ހުންނެވި މުޙައްމަދު އަންވަރު އިސްތިއުފާ ދެއްވައިފިއެވެ. އަންވަރު މަޤާމުން އިސްތިއުފާ ދެއްވާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ވަނީ އިސްތިއުފާގެ ސިޓީއެއް މިއަދު ފޮނުވާފައެވެ. ސަރުކާރު ބަދަލުވި ދުވަހުން ފެށިގެން އަންވަރު އޮފީހަށް ނުނިކުންނަވައެވެ. އަދި އިމިގްރޭޝަން ހިންގުމުގެ މަސައްކަތް މިވަގުތު ކުރައްވަމުން ގެންދަވަނީ އެސިސްޓަންޓް ކޮނޓްރޯލަރ ޢަބްދުﷲ ވަހީދުއެވެ.
އަންނަވަރު ސޮއިކުރައްވާ މިިދިޔަ މަހު ނެރުއްވި މެމޯއެއްގައި ވަނީ އިމިގްރޭޝަންގެ ހުރިހާ މުވައްޒަފުންނަށް ޝަކުރު އަދާކޮށްފައެވެ. އަދި އެއްވެސް މުވަޒައްފެއްގެ ހައްޤަށް އުނިކަން ލިބޭ ގޮތަށް މަސައްކަތް ކުރައްވާފައި ނުވާނެކަމަށްވެސް އެ މެމޯގައި އަންވަރު ވިދާޅުވެފައިވެއެވެ. އަދި އެފަދަ ގޮތަކަށް އެއްވެސް މުވައްޒަފަކަށް އިހްސާސްކުރެވޭނަމަ އެކަމަށް މައާފަށްވެސް އެދިވަޑައިގަންނަވާކަމަށްވެސް އަންވަރު ވިދާޅުވެފައިވެއެވެ.
ކުރީގެ ރައީސް ޢަބްދުﷲ ޔާމީން، އިމިގްރޭޝަން ކޮންޓްރޯލާއަކަށް އަންވަރު ޢައްޔަނުކުރައްވާފައިވަނީ، 2015 ވަނަ އަހަރުގެ ޖެނުއަރީ 25 ގައެވެ.
އަންވަރު މަޤާމުން އިސްތިއުފާ ދެއްވާފައިވާއިރު، އެ މަޤާމަށް ދެން ޢައްޔަނުކުރަނީ ޖުމްހޫރީ ޕާޓިގެ ޑެޕިއުޓީ ލީޑަރު އަދި ކުރީގެ ޑެޕިއުޓީ ކޮމިޝަނަރ އޮފް ޕޮލިސް މުޙައްމަދު ފަޔާޒު ކަމަށް ވަނީ އަޑުފެތުރިފައެވެ. ނަމަވެސް ރައީސް އޮފީހުން މިކަމާ ގުޅިގެން ވަކި އެއްޗެއް އަދި ހާމަކޮށްފައެއްނުވެއެވެ.