ކުރީގެ ސަރުކާރުން މާލޭގެ ދަފްތަރުގައި މީހުން ރަޖިސްޓްރީ ކޮށްފައި އޮތްގޮތުން ކުރިއަށް އޮތް މަޖިލީހުގެ އިންތިޚާބުގައި މާލޭގެ ދާއިރާގެ ވޯޓާސްލިސްޓަށް އޮޅުންތަކެއް އައުން އެކަށީގެންވާކަމަށް އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވެއްޖެއެވެ.
ޕީއެސްއެމް ނިއުސްއާއި ވާހަކަ ދައްކަވަމުން އީސީގެ ރައީސް ޝަރީފް ވިދާޅުވީ، ހައުސިންގ މިނިސްޓްރން މާލޭގެ ދަފްތަރުގައި ޖެހުމަށް ހުޅުވާލި ފުރުސަތުގައި ދަފްތަރުގައި ޖެހިފައިތިބި ހުރިހާ އެންމެން ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގައި ރަޖިސްޓްރީވެފައި ކޮށްފައިނެތްކަމަށެވެ. އެހެންކަމުން މާލޭ ދަފްތަރުގެ ސައްޙަ ލިސްޓެއް އެކޮމިޝަނަށް އަދިވެސް ލިބިފައިނުވާކަމަށް ޝަރީފް ވިދާޅުވިއެވެ.
އެ ކޮމިޝަނުން ކަނޑައަޅާ ވަކި ތާރީޚަކަށްފަހު ޑީއެންއާރުގައި ރަޖިސްޓްރީ ނުކުރާ ފަރާތްތަކަށް ވޯޓުލެވޭނީ ކުރީގެ ދާއިމީއެޑްރެހުގައިކަމަށެވެ. ވޯޓްލުމުގައި ބަލަނީ އައިޑީކަޑަށްކަމުން، ޑީއެންއާރުގައި ރަޖިސްޓްރީވެފައިވެފައި ނެތި ދަފްތަރުގައި ތިބި މީހުންނަށް ވޯޓުލެވޭނީ ކުރީގެ ދާއިމީ އެޑްރެހުގައިކަމަށް ކަނޑައަޅާ އިޢުލާނުކުރާނެކަމަށް ޝަރީފް ވިދާޅުވިއެވެ.
"ހައުސިންގ މިނިސްޓްރީގެ ދަފްތަރުގައި ރަޖިސްޓޤރީވެފައިތިބި ހުރިހާ އެންމެނެއް ޑީއެންއާރގައި ރަޖިސްޓްރީކޯށްފައެއްނެތް. އެހެންވީމަ އަޅަުގަނޑުމެން މިހާރު އާންމުކޮށް އިޢުލާނުމިކުރަނީ އަންނަ ހަފްތާގެ ތެރޭގައި މިވެނި ތާރީޚަކަށްފަހު ރަޖިސްޓްރީނުކޯށްތިބި ފަރަތްތައް އެމީހުންނަށް ކުރީގެ ދާއިމީ އެޑްރެހުގައޭ ވޯޓްލެވޭނީ."
ޝަރީފް ވިދާޅުވިއެވެ.
މިކަމާއި ގުޅިގެން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން އިލެކްޝަންސް ކޮމިޝަންގެ ޑިރެކްޓަރ ޙަސަން ޒަކަރިއްޔާ ވިދާޅުވީ، އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ވޯޓުލުމުގެ ހައްޤުލިބިގެންވާ މީހުންގެ ލިސްޓަށް ދިމާވާނެ އެންމެ ބޮޑު މައްސަލައަކަށްވާނީ ރަށްވެހިކަން ބަދަލުކުރުންކަމަށެވެ.
ހަސަން ޒަކަރިއްޔާ ވިދާޅުވީ، ކުރީގެ ސަރުކާރުގެ ބޯހިޔާވަހިކަމުގެ މަޝްރޫޢާއި ގުޅިގެން ދަފްތަރުގައި ރަޖިސްޓރީވުމަށް ހުޅުވާލުމުގެ ސަބަބުން މާލޭ ދަފްތަރަށް ވަރަށް ބޮޑުތަން އިތުރުވެފައިވާކަމަށާއި، މާލޭގެ ދާއިރަތަކަށް ބޮޑެތި ބަދަލުތަކެއް އައިސްފައިވާކަމަށެވެ. މަޖިލީހުގެ އިންތިޚާބުގައި ދާއިރާތައް ކަނޑައަޅަނީ އާބާދީއަށް އަންނަ ބަދަލުތަކާއި ގުޅިގެންކަން ފާހަގަކުރައްވަމުން ހަސަން ވިދާޅުވީ، މާލޭ ދަފްތަރުގައި ޖެހިފައިވާ މީހުންގެ ޢަދަދު އިތުރުވުމަކީ، މާލެއަށް ދެ ދާއިރާ އިތުރުވާން ދިމާވި ސަބަބެއްކަމަށް ބެލެވިދާނެކަމަށެވެ.
މިހާރު ހިނގަމުންދާ ރައްޔިތުންގެ މަޖިލީހުގައި މާލޭގެ ތޭރަ ދާއިރާ އޮތްނަމަވެސް އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބަށް މާލެއަށް ދެ ދާއިރާ އިތުރުކޮށް ފަނަރަ ދާއިރާ ހިމެނޭކަމަށް އިލެކްޝަންސް ކޮމިޝަނުން ވަނީ ބުނެފައިވެއެވެ.
"ދެލައްކަ ފަސްދޮޅަސް ދެހާސް މީހުން ޢަދަދެއް ނިމިދިޔަ ރިޔާސީ އިންތިޚާބުގައި ވޯޓުލުމުގެ ހައްގު ލިބިގެންވަނީ. އަންނަ އިންތިޚާބަށް އިތުރުވިޔަސް ވަނީ ދެތިން ހާސް. ދެން އިންތީޚާބީ ދާއިރާތރަކުގެ ޤާނޫނަށް ބަލާއިރު ދާއިރާތައް ކަނޑައަޅަނީ އާބދާދީއށް އަންނަ ބަދަލުން. މާލޭގެ ދަފްތަރު އަދި މާލޭގެ ރަށްވެހިންގެ އާބާދީ ވަރަށް ބޮޑުތަން އިތުރުވެފައިވަނީ. ދަފްތަރަށް އަބަދުވެސް ވަރަށް ބޮޑުތަން އިތުރުވޭ. މާލެއަށް ގޮނޑިތައް އިތުރުވުން ދަފްތަރަށް އައި ބަދަލުގެ ފުރުސަތު އެބައޮތް."
ޙަސަން ޒަކަރިއްޔާ ވިދާޅުވިއެވެ.
އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބު އޭޕްރީލް ހަވަނަ ދުވަހު ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ. އަދި އަންނަ ޖެނުއަރީ މަހުގެ އަށާވީސް ވަނަ ދުވަހު އިންތިޚާބަށް ކުރިމަތިލުމުގެ ފުރުސަތު ހުޅުވާލާނެކަން އެ ކޮމިޝަނުން ވަނީ ހާމަކޮށްފައެވެ. 19 ވަނަ ރައްޔިތުންގެ މަޖިލީހުގައި 87 ދާއިރާ ހިމެނެއެވެ.