"މޯލްޑިވްސް ބިޒްނަސް އެވޯޑްސް 2018"ގެ އެންމެ ކާމިޔާބު ވިޔަފާރި ކުންފުނީގެ އެވޯޑު އެލައިޑް އިންޝުއަރެންސް ހޯދައިފިއެވެ.
މޯލްޑިވްސް ބިޒްނަސް އެވޯޑުގެ ވަނަތައް އިއުލާނުކޮށްފައިވަނީ، އެކަމަށްޓަކައި ޕެރަޑައިސް އައިލެންޑް ރިސޯޓްގައި މިރޭ ބޭއްވި ހަފްލާގައެވެ.
"މޯލްޑިވްސް ބިޒްނަސް އެވޯޑްސް 2018"ގެ އެންމެ ކާމިޔާބު ވިޔަފާރި ކުންފުންޏަކަށް އެލައިޑް އިންޝުއަރެންސް ހޮވިފައިވާއިރު، ލައިފް ޓައިމް އެޗީވްމަންޓް އެވޯޑު ދީފައިވަނީ، ވިލާގެ ޗެއާމަން ޤާސިމް އިބްރާހިމަށެވެ.
"މޯލްޑިވްސް ބިޒްނަސް އެވޯޑްސް 2018"ގެ ފާހަގަކޮށްލެވޭ ވަނަތަކަށް ބަލާއިރު، އެންމެ ޒުވާން ވިޔަފާރި ވެރިޔާގެ އެވޯޑު އަލީ ހާރިސް ހޯދިއިރު، އަންހެން ވިޔަފާރިވެރިޔާގެ އެވޯޑު ހޯދީ ރާއިދާ ޝަފީޤެވެ. އަދި އަހަރުގެ އެންމެ ފާހަގަކޮށްލެވޭ ވިޔަފާރިވެރިޔާގެ އެވޯޑު ހޯދީ މުޙައްމަދު އަލީ ޖަނާހުއެވެ.
އިތުރު ވަނަތަކަށް ބަލާއިރު، އިންޑަސްޓްރީ އެކްސެލެންސްގެ ދާއިރާއިން 12 އެވޯޑެއް ވަނީ ދީފައެވެ. އޭގެތެރޭގައި ބޭންކިންގ އެންޑް ފައިނޭންސް ދާއިރާއިން އެކްސެލެންސް އިން ފައިނޭންސް އެވޯޑް ޙާސިލްކޮށްފައިވަނީ ހައުސިން ޑިވެލޮޕްމަންޓް ފައިނޭންސް ކޯޕަރޭޝަންއެވެ.
އިންޝުއަރެންސްގެ ދާއިރާއިން އެކްސެލެންސް އިން ފައިނޭންސް އެވޯޑް ޙާސިލްކޮށްފައިވަނީ އެލައިޑް އިންޝުއަރެންސްއެވެ. ހޮޓެލް އެންޑް ގެސްޓްހައުސް ދާއިރާއިން އެކްސެލެންސް އިން ހޮސްޕިޓަލިޓީ އެވޯޑް ލިބުނީ ރެވެރީސް ގެސްޓްހައުސްއެވެ. ޓުއަރ އޮޕަރޭޓާރސް ބައިން މި އެވޯޑް ޙާސިލްކޮށްފައިވަނީ އިނަރ މޯލްޑިވްސްއެވެ.
މީގެއިތުރުން އެންސެލެންސް އިން ފިޝަރީޒް އެންޑް އެގްރިކަލްޗަރ އަށް ހޮވިފައިވަނީ އެންސިސް ފިޝަރީޒްއެވެ. އެމްޑަބްލިއުއެސްސީ އެކްސެލެންސް އިން ޔުޓިލިޓީސް އެވޯޑް ޙާސިލްކުރިއިރު، ސޭސް ކޮންސްޓްރަކްޝަން ވަނީ އެކްސެލެންސް އިން ކޮންސްޓަރަކްޝަން އެންޑް ރިއަލް އެސްޓޭޓް އެވޯޑް ޙާސިލްކޮށްފައެވެ.
އެކްސެލެންސް އިން ހޯލްސެއިލް އެންޑް ރީޓެއިލް އެވޯޑް ލިބުނީ އެޓޯލް މާކެޓަށެވެ. އެކްސެލެންސް އިން އިންފޮމޭޝަން ކޮމިއުނިކޭޝަން ދާއިރާއިން ބިޒްނަސް އެވޯޑް ޙާސިލްކުރީ އުރީދޫ މޯލްޑިވްސްއެވެ. ޓޯޓަލް ޓްރާންސްޕޯރޓް ސޮލިއުޝަން، އެކްސެލެންސް އިން ޓްރާންސްޕޯރޓް އެންޑް ލޮޖިސްޓިކްސް އަށް ހޮވުނުއިރު، މެޑިކާ ވަނީ އެކްސެލެންސް އިން ހެލްތް ކެއަރ އެވޯޑް ގެންގޮސްފައެވެ. އަދި އިންޑަސްޓްރީ އެކްސެލެންސްގެ ދާއިރާއިން އެކްސެލެންސް އިން ޕްރޮފެޝަނަލް ޝަރވިސަސް އަށް ހޮވުނީ އެމްއެޗްޕީއޭ އެލްއެލްޕީއެވެ.
އެންޓަޕްރައިސް އެކްސެލެންސް އެވޯޑް 5 ފަރާތެއް ވަނީ ހޯދާފައެވެ. ޕަބްލިކް އެންޓަޕްރައިޒް އޮފް ދަ އިޔަރ ދިރާގަށް ލިބިފައިވާއިރު، އިނޮވޭޓިވް ބިޒްނަސް އޮފް ދަ އިޔަރ ލިބިފައިވަނީ އެލައިޑް އިންޝުއަރެންސްއަށެވެ. އެލައިޑް ޕްރެޒެންޓްސް އެންޕްލޯޔަރ އޮފް ދަ އިޔަރ އެމްޑަބްލިއުއެސްސީ ކާމިޔާބުކުރިއިރު، ފޮރިން ޑައިރެކްޓް އިންވެސްޓްމަންޓް އޮފް ދަ އިޔަރ އުރީދޫ މޯލްޑިވްސް އަށް ވަނީ ލިބިފައެވެ. މީގެއިތުރުން ދިރާގު ޕްރެސެންޓްސް މޯލްޑިވްސް ސްމޯލް މީޑިއަމް އެންޓަޕްރައިޒް އޮފް ދަ އިޔަރ އަށް ހޮވިފައިވަނީ އެންބަރ ފަޔަރ އެންޑް ސޭފްޓީއެވެ.
މޯލްޑިވްސް ބިޒްނަސް އެވޯޑަކީ ރާއްޖޭގެ އަމިއްލަ މާކެޓިން އެންޑް ޕީ.އާރު ކުންފުންޏެއްކަމަށްވާ ބްލޭޒަން އިންކުން ދޭ އެވޯޑެއް. މޯލްޑިވްސް ބިޒްނަސް އެވޯޑަކީ ރާއްޖޭގެ އިޤްތިސާދުގައި ހިމެނޭ އެކި އިންޑަސްޓްރީތަކުން ފާހަގަކޮށްލެވޭ ވިޔަފާރިތަކަށްދޭ އެވޯޑެކެވެ.
މި އެވޯޑުގެ ބޭނުމަކީ އެ ވިޔަފާރިތަކުން ޤައުމުގެ އިޤްތިސާދަށް އަންނަ ހެޔޮބަދަލާއި، ރާއްޖޭގެ ވިޔަފާރީގެ ދާއިރާ ތަރައްޤީކުރުމަށް ކުރަމުންދާ މަސައްކަތް ފާހަގަކޮށް، އެހެން ވިޔަފާރިތައް ތަރައްޤީވުމަށް ހިތްވަރު ދިނުންކަމަށް ބްލޭޒަން އިންކްއިން މައުލޫމާތުދެއެވެ.
މޯލްޑިވްސް ބިޒްނަސް އެވޯޑްގައި 20 އެވޯޑެއް ވަނީ ދީފައެވެ