ގިނަ އަދަދެއްގެ ފިލްމާއި ވީޑިއޯ ބަލާލެވޭ އެމޭޒަން ޕްރައިމް ވީޑިއޯ، އުރީދޫގެ ކަސްޓަމަރުންނަށް ތަޢާރަފްކޮށްފިއެވެ.
އެމޭޒަން ޕްރައިމް ވީޑިއޯއަކީ މަޝްހޫރު ފިލްމުތަކާއި ޓީވީ އެޕިސޯޑްތައް އަދި ދުނިޔޭގެ އެކި ކަންކޮޅުތަކުގެ ޓީވީ ޗެނަލްތައް ހިމެނޭ މުނިފޫހިފިލުވައިދޭ ކޮންޓެންޓް އެކުލެވިފައިވާ އޮން-ޑިމާންޑް ވީޑިއޯ ޚިދުމަތެކެވެ.
މި ޙިދުމަތް ތަޢާރަފްކޮށްދެއްވީ ހުޅުމާލޭ ސެންޓްރަލް ޕާކުގައި ބޭއްވި ރަސްމިއްޔާތެއްގައި އުރީދޫގެ ސީއީއޯ ނަޖީބް ޙާން އާއި މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލުއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރ މަލީޙް ވިދާޅުވީ، އުރީދޫ ފަދަ ކުންފުނިތަކުން ބޭރުގެ ކުންފުނިތަކާ ގުޅިގެން ޓެކްނޮލޮޖީގެ އައު އުފެއްދުންތައް ރާއްޖެއަށް ތަޢާރަފްކުރުމަކީ މި ދާއިރާއަށް ލިބިގެންދާ ކުރިއެރުމެއްކަމަށާއި މިއީ ބޭރު ދުނިޔެއާއި ރާއްޖެ ގުޅުވާލުމަށް ލިބޭނެ ފުރުސަތެއްކަމަށެވެ. އަދި ޓެލެކޮމިއުނިކޭޝަން ދާއިރާއިން ރާއްޖޭގައި އޮތީ ވަރަށް މިނިވަންކަމާއިއެކު ވިޔަފާރިކުރެވޭނެ މާހައުލެއްކަމަށާއި، މިކަމުގައި މިނިސްޓްރީގެ ފަރާތުން ފުރިހަމަ އެއްބާރުލުން ލިބިގެންދާނެކަމަށް މިނިސްޓަރ ވިދާޅުވިއެވެ.
އައު އަހަރާއި ގުޅިގެން އުރީދޫން ތައާރަފްކުރި އެމޭޒަން ޕްރައިމް ވީޑިއޯގެ ޚިދުމަތް، އުރީދޫގެ މޯބައިލް އަދި ފިކްސްޑް ބްރޯޑްބޭންޑް ކަސްޓަމަރުންނަށް ލިބޭނެއެވެ. އަދި ކުރިއަށް އޮތް 7 ދުވަސް ވަންދެން ހިލޭ ސަބްސްކްރައިބް ކުރެވޭނެކަމަށް އުރީދޫއިން ބުނެއެވެ. އެއަށްފަހު ފުރަތަމަ 6 މަސްދުވަހު 49 ރުފިޔާއަށް މި ޙިދުމަތް ލިބޭނެއެވެ. އަދި 6 މަސްފަހުން ޕްރައިމް ވީޑިއޯ މެމްބަރޝިޕް ޚިދުމަތް ބޭނުންކުރެއްވުމަށް 5ޖީބީގެ ޑޭޓާއާއެކު މަހަކު 191 ރުފިޔާގެ އޮފަރއެއްވެސް އުރީދޫގެ ކަސްޓަމަރުންނަށް ލިބޭނެކަމަށް އުރީދޫން ބުނެއެވެ.