ރާއްޖޭގެ ތަރައްޤީއަށް ޖަޕާނުން އެހީތެރިކަން ފޯރުކޮށްދިނުމާއި ގޫޅޭގޮތުން ދެޤައުމުގެ ދެމެދުގައި މަޝްވަރާކޮށްފިއެވެ.
މި މަޝްވްރާތައް ކުރިއަށް ގެންގޮސްފައިވަނީ ރާއްޖޭގެ ފޮރިންގ މިނިސްޓަރ ޖަޕާނަށް މިހާރު ކުރައްވަމުންގެންދަވާ ދަތުރުފުޅުގައެވެ. މިދަތުރުފުޅުގައި ރާއްޖޭގެ ފޮރިންގ މިނިސްޓަރުގެ އަރިހުގައި އިކޮނޮމިކް މިނިސްޓަރ ފައްޔާޒް އިސްމާޢީލާއި، ފިނޭންސް މިނިސްޓަރ އިބްރާހީމް އަމީރު ބައިވެރިވެވަޑއިގަންނަވައެވެ. ތިން ވަޒީރުން ވަނީ ޖަޕާނުގެ އެންވަޔަރަމަންޓް މިނިސްޓަރ ޔޮޝިއަކި ހަރާޑާ ބައްދަލުކުރައްވާފައެވެ.
ޖަޕާނުގެ އެންވަޔަރަމަންޓް މިނިސްޓްރީގައި ކުރިއަށްދިޔަ މި ބައްދަލުވުމުގައި މޫސުމަށް އަންނަ ބަދަލުތަކާ ދެކޮޅަށް ދެ ޤައުމު ގުޅިގެން މަސައްކަތްކުރުމަށް ވަނީ މަޝްވަރާކުރައްވާފައެވެ. މީގެ އިތުރުންވެސް ރާއްޖޭގެ ތިމާވެއްޓަށް ކުރާ އަސަރުތަކާއި، އެދާއިރާއިން ރާއްޖޭގައި ހިންގޭނެ ބައެއް މަޝްރޫޢުތަކާ ގުޅޭގޮތުންވެސް ރާއްޖޭގެ ވަފުދާއި ޖަޕާނުގެ އެންވަޔަރަމަންޓް މިނިސްޓަރ ވަނީ މަޝްވަރާކުރައްވާފައެވެ. އަދި ރާއްޖެއަށް އެ ދާއިރާތަކުން އެހީތެރިކަން ފޯރުކޮށްދޭނެކަމުގެ ޔަޤީންކަން ޖަޕާނުން ދެއްވިކަމަށް ފޮރިންގ މިނިސްޓަރ ޢަބްދުﷲ ޝަހިދު ވަނީ ވިދާޅުވެފައެވެ.
މީގެ އިތުރުން ފޮރިންގ މިނިސްޓަރ ޢަބްދުﷲ ޝަހިދު ދެއްކެވި ވާހަކަފުޅުގައި ވަނީ ޖަޕާނަކީ އަބަދުވެސް ރާއްޖެއަށް އެހީތެރިކަން ފޯރުކޮށްދޭ ޤައުމެއްކަން ފާހަގަކުރައްވައި، ކުރިއަށް އޮތްތަނުގައިވެސް ޖަޕާނުގެ އެހީތެރިކަން ރާއްޖެއަށް ލިބޭނެކަމަށް އުއްމީދުކުރައްވާކަމަށް ވިދާޅުވެފައެވެ. ޖަޕާނުގެ އެންވަޔަރަންމަޓް މިނިސްޓަރު ވަނީ ރާއްޖެއާ ޖަޕާނާ ދެޤައުމުގެ ދެމެދުގައި އޮތް ޒަމާންވީ ރަހްމަތްތެރިކަމުގެ ގުޅުން ފާހަގަކުރައްވައި ރާއްޖޭގެ ތަރައްޤީއަށް އެއްބާރުލުން ދެއްވާނެކަމުގެ ޔަޤީންކަން ދެއްވާފައެވެ.
ރާއްޖޭގެ ތިން ވަޒީރަކު ޖަޕާނަށް ކުރައްވާ ދަތުރުފުޅުގައި ވަނީ އެޤައުމުގެ ފޮރިންގ މިނިސްޓަރ ޓާރޯ ކޯނޯއާވެސް ބައްދަލުކުރައްވައި ޚާރިޖީ ދާއިރާއިން ދެޤައުމުގެ ގުޅުން ވަރުގަދަކުރުމަށް މަޝްވަރާކުރައްވާފައެވެ.
ރާއްޖެއާ ޖަޕާނާ ދެމެދު ސިޔާސީ ގުޅުން ޤާއިމްކޮށްފައިވަނީ 1967ވަނަ އަހަރުއެވެ. ޖަޕާނަކީ ރާއްޖެއަށް އެކިދާއިރާތަކުން އެހީ ދެމުން އަންނަ ޤައުމެކެވެ.