ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަންނަ މަހުގެ ކުރީ ކޮޅު ޔުނައިޓެޑް ޢަރަބް އެމިރޭޓްސްއަށް ވަޑައިގަންނަވާގޮތަށް ނިންމަވައިފިއެވެ.
ފޮރިންގ މިނިސްޓަރ ޢަބްދުﷲ ޝާހިދު ވިދާޅުވީ ރައީސް ޞާލިޙް ޔޫއޭއީގެ އަބޫދާބީއަށް ވަޑައިގަންނަވާނީ އަންނަ މަހުގެ ކުރީކޮޅުކަމަށެވެ. އެ ދަތުރުފުޅުގެ ތަފްސީލް ފަހުން ހާމަކުރައްވާނެކަމަށް މިނިސްޓަރ ވިދާޅުވިއެވެ.
މިނިސްޓާރ ވިދާޅުވީ، ރައީސް ޞަލިޙްގެ ސަރުކާރުން އެއްވެސް ޤައުމަކަށް އޮންނަ ގުޅުން ހީނަރުވާފަދަ އެއްވެސް ކަމެއް ނުކުރައްވާނެކަމަށެވެ. އެގޮތުން ޗައިނާ، ޔޫއޭއީ، އަދި ސައުދިއަރަބިއްޔާ ފަދަ ޤައުމުތަކާ އޮންނަ ގުޅުން މިހާރަށް ވުރެ ބޮޑަށް ހަރުދަނާކުރާނެކަމަށް މިނިސްޓަރ ވިދާޅުވިއެވެ.
ރައީސް ޞަލިޙް އަންނަ މަހު އަބޫދާބީއަށް ވަޑައިގަންނަވާގޮތަށް ނިންމަވާފައިވާއިރު، ރައީސްކަމާ ހަވާލުވެވަޑައިގަތުމަށްފަހު މިމަހުގެ 16އިން 18އަށް ވަނީ އިންޑިއާއަށް ދަތުރުފުޅެއް ކުރައްވާފައެވެ.
އިންޑިއާއަށް ކުރެއްވި ދަތުރުފުޅުގައި ދެ ޤައުމުގެ ގުޅުން ބަދަހިކުރުމަށް ހަތަރު ދާއިރާއަކުން އެއްބަސްވުން އެކުލަވާލާފައިވެއެވެ.