ރާއްޖެއާއި އިންޑިއާ ދެޤައުމުގެ ދެމެދު ވެވުނު ހަތަރު އެއްބަސްވުމުގެ ހުރިހާ ފައިދާއެއް ކުރާނީ ދިވެހިންނަށްކަމަށާ، ވިސާގެ ފައިދާ ނޫން އެހެން ފައިދާއެއް އިންޑިއާއަށް ނޯންނާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އިންޑިއާއަށް ކުރެއްވި ރަސްމީ ދަތުރުފުޅާ ގުޅޭގޮތުން މީޑިއާއަށް މަޢުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙް މަޤާމާ ޙަވާލުވެވަޑައިގެންނެވި ފަހުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވަނީ އިންޑިއާ އާއި ރާއްޖެއާ ދެޤައުމުގެ ދެމެދުގައި ވެވުނު ހަތަރު އެއްބަސްވުމުގެ ތެރޭގައި ރާއްޖޭގެ މިނިވަންކަމާއި އިސްތިޤްލާލަށް ނުރަނގަޅު އަސަރެއް ކޮށްފާނެ އެއްވެސް އެއްބަސްވުމެއް ނޯންނާނެކަމުގެ ޔަޤީންކަން ދެއްވާފައެވެ.
ރައީސްވަނީ އިންޑިއާއިން ރާއްޖެއަށް ދިން ކްރެޑިޓް ފެސިލިޓީގެ ތަފްސީލްވެސް މިއަދު ހާމަކުރައްވާފައެވެ. އޭގެ ތެރެއިން 200 ބިލިއަން ޑޮލަރަކީ ބަޖެޓް ސަޕޯޓަށް ދިން ފައިސާކަމަށާއި، 50 މިލިއަން ޑޮލަރަކީ ހިލޭއެހީކަމަށް ރައީސް ވިދާޅުވިއެވެ. އަދި 150 މިލިއަން ޑޮލަރަކީ އިންޑިއާއިން އިންވެސްޓްކުރާ ޓީ-ބިލްކަން އެމަނިކުފާނު ފާހަގަކުރެއްވިއެވ. ރައީސްގެ ވާހަކަފުޅުގައި ކުރީގެ ސަރުކާރުތަކުން ޓީ-ބިލް ވިއްކާފައިވަނީ ބޮޑެތި އިންޓްރެސްޓް ރޭޓްގައިކަން ފާހަގަކުރެއްވިއެވެ.
އޭގެ ތެރޭގައި ފަސް ޕަސެންޓާއި އަށް ޕަސެންޓާ ދޭތެރޭގެ އިންޓްރެސްޓް ރޭޓް ހުރިކަން ފާހަގަކުރެއްވިއެވެ. ނަމަވެސް މި ސަރުކާރުން ވީ އެއްބަސްވުމުގައިވާ ޓީ ބިލާއި ބޮންޑަކީ 1.5 އިންޓްރެސްޓް ރޭޓްކަމަށް ރައީސް ވިދާޅުވިއެވެ. ބާކީ 400 ޑޮލަރަކީ ރާއްޖޭގެ ބޭރު ފައިސާ ރިޒާވް ދެމެހެއްޓުމަށް އިންޑިއާއިން ދިން ކަރަންސީ ސޯވްޕެއްކަމަށް ވިދާޅުވިއެވެ. އަދި 800 މިލިއަން ޑޮލަރު ރާއްޖޭގެ އިންވެސްޓްމެންޓްތަކަށް ޚަރަދުކުރުމަށް ނިންމާފައިވާކަމަށާއި، އެ މަޝްރޫޢުތައްވެސް ހިންގޭނީ ދިވެހި ކުންފުނިތަކުގެ ބައިވެރިވުމައެކުކަމަށް އެއްބަސްވުމުގައި ވާނެކަމަށްވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
ރައީސް ޞަލިޙް ވިދާޅުވީ، އިންޑިއާއިން ނެގި ކްރެޑިޓް ފެސިލިޓީގެ ސަބަބުން ރާއްޖެ ދަރަނިވެރިވެގެން ނުދާނެކަމަށެވެ. ރައީސްގެ ވާހަކަފުޅުގައި ވެރިކަމާ ހަވާލުވެވަޑިގެންނެވިއިރު ދައުލަތުގެ މާލީ ދަތިކަން އިންތިހާއަށް ހުރިކަން ފާހަގަކުރައްވައި، އިންޑިއާއިން ވެދިން އެހީގެ ސަބަބުން ދައުލަތަށް އެއްވެސް ދައްޗެއް ނުވާނެކަމަށް ރައީސް ވިދާޅުވިއެވެ.
އަންނަ އަހަރަށް ލަފާކޮށް މަޖިލީހުން ފާސްކުރި ބަޖެޓާއެކު ދުނިޔެއަށް އަންނަ އީޤްތިޞާދީ ދަތިކަމަކުން މެނުވީ އެއްވެސް ދަތިކަމެއް ދައުލަތަށް ކުރިމަތިވާނެކަމަށް ނުބެލެވޭކަމަށްވެސް ރައީސް ޞަލިޙް ވިދާޅުވިއެވެ.
"ލޯނު އަދާކުރާކަށް ބޭނުމެއް ނުކުރާނަން. އަޅުގަނޑުމެން ޗައިނާ ސަރުކާރާ އެކީގަ ވާހަކަ ދައްކަމުން އެބަދަން. އެ ބޭފުޅުން ތިބީ މިހާރު ވެސް ދޫކޮށްފައިވާ ލޯނުތަކާއި އެމްއޯޔޫތަކާ ގުޅިގެން އެކީގައި މަސައްކަތްކޮށް އެއަށް ރަނގަޅު ގޮތް ހޯދައިދިނުމަށް. އަޅުގަނޑަކަށް ނުފެނޭ ޗައިނާއާއެކީގަ މިއޮތް ގުޅުމަށް ހުރަސް އެޅޭ ތަނެއް."
ރައީސުލްޖުމްހޫރިއްޔާ ވިދާޅުވިއެވެ.
މި ނޫސްވެރިންގެ ބައްދަލުވުމުގައި ޕީއެސްއެމް ނިއުސްއިން ދެންނެވި ސުވާލަކަށް ޖަވާބުދެއްވަމުން ރައީސުލްޖުމްހޫރިއްޔާ ވިދާޅުވީ، ރާއްޖެއާއި އިންޑިއާ ދެޤައުމުގެ ދެމެދުގައި ވެވުނު އެއްބަސްވުންތަކުގެ ފައިދާ އޮތީ ދިވެހިންނަށްކަމަށެވެ. އެ އެއްބަސްވުންތަކުގައި އިންޑިއާއަށް ހަމައެކަނި ފަހިވެފައި އޮންނާނީ އިންޑިއާގެ ރައްޔިތުންނަށް ވޯރކް ވީސާގެ ކަންތައްކަމަށް ވިދާޅުވިއެވެ. އެ އެއްބަސްވުމުން އިންޑިއާގެ މަސައްކަތްތްރިންނަށް ރާއްޖެ އައުމުގައި ދައްޗެއް ނޯންނާނެމަށްވެސް ރައީސް ވިދާޅުވިއެވެ.
"މިހާރު އިންޑިއާ ރައްޔިތަކަށްވީތީ ރާއްޖެއަކަށް މަސައްކަތު ނާދެވޭ. އެ އަޅުގަނޑުމެން ދޫކޮށްލާނަން. ވިސާ އިނގޭތޯ. އެހެންކަމުން އިންޑިއާއިން މަސައްކަތްކުރާ ކުންފުނިތަކަށް، ޕްރޮފެޝަނަލުން، ޑޮކްޓަރުން، ނަރުހުން، ޓީޗަރުން އަދިވެސް އެކައުންޓެންޓުން މިހެންގޮސް މިދާއިރާތަކަށް ބޭނުންވާމީހުންނަށް އައުމުގެ ދައްޗެއް ނޯންނާނެ. އެއީ އިންޑިއާއެކު ވީ އެއްބަސްވުމަކީ"
ރައީސް ވިދާޅުވިއެވެ.
އިންޑިއާއިއެކު ވީ އެއްބަސްވުންތަކުގެ ދަށުން ދިވެހިންނަނަށް ވަނީ ވީސާގައި ބޮޑެތިލުއިތަކެއް ދިނުމަށް އިންޑިއާއިން އެއްބަސްވެފައެވެ. އަދި އެކި ދާއިރާތަކުން މީހުން ބިނާކުރުމާއި ފަންނީ އެހީތެރިކަން ފޯރުކޮށްދިނުމަށް އެއްބަސް ވެފައިވެއެވެ.