ރާއްޖެއާއި ޖަޕާނާ ދެޤައުމުގެ ގުޅުން އިތުރަށް ބަދަހިކުރުމަށް މަޝްވަރާކުރުމަށްޓަކައި ފޮރިންގ މިނިސްޓަރ ޢަބްދުﷲ ޝާހިދު ޖަޕާނަށް ވަޑައިގެންފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހުގައި އިންޑިއާއަށް ކުރެއްވި 3 ދުވަހުގެ ދަތުރުފުޅަށްފަހު ފޮރިންގ މިނިސްޓަރ ޢަބްދުﷲ ޝާހިދު ޖަޕާނަށް ވަޑައިގެންނެވިއިރު އެމަނިކުފާނާއެކު ފިނޭންސް މިނިސްޓަރ އިބްރާހީމް އަމީރާއި، އިކޮނޮމިކް މިނިސްޓަރ ފައްޔާޒް އިސްމާޢީލް ވަޑައިގަތެވެ.
3 މިނިސްޓަރުންގެ މި ދަތުރުފުޅަކީ ރާއްޖެއާއި ޖަޕާނާ ދެޤައުމުގެ ދެމެދުގައި އުފެދިފައިވާ ގާތް ގުޅުން އިތުރަށް ބަދަހިކުރުމަށާއި، ރާއްޖެއަށް އިތުރު ދާއިރާތަކުން އެހީ ހޯދުމަށް ކުރައްވާ ދަތުރުފުޅެއްކަމަށް ފޮރިންގ މިނިސްޓަރ ވިދާޅުވެފައިވެއެވެ. މި ދަތުރުފުޅުގައި ޖަޕާނުގެ މަތީ ފަންތީގެ ބޭފުޅުނާއި ރާއްޖޭގެ މިނިސްޓަރުން ބައްދަލުކުރެއްވުމަށް ވަނީ ހަމަޖެހިފައެވެ. ދިވެހިރާއްޖޭއާއި ޖަޕާނާ ދެމެދު ސިޔާސީ ގުޅުން ޤާއިމްކޮށްފައިވަނީ 1967 ވަނަ އަހަރުއެވެ.
ރާއްޖެއަށް އެހީ ބޭނުންވާ ދާއިރާތަކުން އެހީތެރިކަން ހޯއްދެވުމަށާއި، ގުޅުން ވަރުގަދަ ކުރުމަށް އިންޑިއާ، ޖަޕާން، ޗައިނާ، ޔޫއޭއީގެ އިތުރުން ސައުދިއަރަބިއްޔާއަށް ވަޑައިގަތުމަށް ނިންމާފައިވާކަން ފޮރިންގ މިނިސްޓަރ ޢަބްދުﷲ ޝާހިދު ވަނީ ހާމަކުރައްވާފައެވެ.
ފޮރިންގ މިނިސްޓަރުކަމާ ޢަބްދުﷲ ޝާހިދު ހަވާލުވެވަޑައިގަތުމަށްފަހު އިންޑިއާއަށް ދެ ދަތުރުފުޅު އަދި އަބޫދާބީއަސް ދަތުރުފުޅެއް ކުރައްވާފައިވެއެވެ. އަދި އަންނަ އަހަރުގެ ކުރީކޮޅު ރައީސް އިބްރާހީމް މުޙައްމަދު ޞާލިޙް އަބޫދާބީއަށް ދަތުރުފުޅެއް ކުރައްވަން ހަމަޖެހިފައިވާކަމަށް މިނިސްޓަރ ޝާހިދު ވިދާޅުވެފައިވެއެވެ.