އަންނަ އަހަރުގެ ފެބުރުއަރީ މަސް ނިމުމުގެ ކުރިން ރާއްޖޭގެ 20 ރަށެއްގައި ފެނާއި ނަރުދަމާ ޤާއިމުކުރުމުގެ މަސައްކަތް ފަށްޓަވާނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރައީސުލްޖުމްހޫރިއްޔާގެ އަރިހުގައި މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައެވެ. މިނިސްޓަރ ވިދާޅުވީ، މިސަރުކާރުން އައު 3 ޓާޝަރީ ހޮސްޕިޓަލް ތަރައްޤިކޮށް މާލޭ ވިޔަފާރި ބަނދަރު ތިލަފުއްޓަށް ބަދަލުކުރައްވާނެ ކަމަށެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިންޑިއާއަށް ކުރައްވާ ދަތުރުފުޅުގެ ތެރެއިން އިންޑިއާއިން ވަނީ ރާއްޖެއަށް 1.4 ބިލިއަން ޑޮލަރުގެ ކްރެޑިޓް ފެސިލިޓީއެއް ދެއްވުމަށް ނިންމަވާފައެވެ. އެ ކްރެޑިޓް ފެސިލިޓީގެ ތެރެއިން 800 މިލިއަން ޑޮލަރު ހޭދަކުރައްވާނީ ރާއްޖޭގެ ތަރައްޤީގެ މަޝްރޫޢުތަކަށްކަމަށް ދިވެހި ސަރުކާރުން ވަނީ ހާމަކުރައްވާފައެވެ.
މިކަމާގުޅޭގޮތުން ނިއުދިއްލީގައި ހުންނަވައި ޕީއެސްއެމް ނިއުސްއަށް މަޢުލޫމާތު ދެއްވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ، ސަރުކާރުން ޚާއްޞަ އިސްކަމެއް ދެއްވާ މަޝްރޫޢުތަކެއް އެބަހުރިކަމަށެވެ. އޭގެ ތެރޭގައި ފެނާއި ނަރުދަމާއާއި، ޓާޝަރީ ހޮސްޕިޓަލްތަކާއި، ތިލަފުށީ ވިޔަފާރި ބަނދަރު ފިނޭންސް މިނިސްޓަރ ފާހަގކުރެއްވިއެވެ. އެގޮތުން ސަރުކާރުން އެންމެ އިސްކަންދެއްވާ މަޝްރޫޢުތަކުގެ ތެރެއިން އަންނަ އަހަރުގެ ޖެނުއަރީ ފަހުކޮޅު ނުވަތަ ފެބުރުއަރީ ކުރީކޮޅު ރާއްޖޭގެ 20 ރަށެއްގައި ފެނާއި ނަރުދަމާ ޤާއިމްކުރުމުގެ މަސައްކަތް ފަށްޓަވާނެކަމަށް މިނިސްޓަރު ވިދާޅުވިއެވެ.
ފިނޭންސް މިނިސްޓަރުގެ ވާހަކަފުޅުގައި ޓާޝަރީ ފެންވަރުގެ 3 ހޮސްޕިޓަލް ހެދު މަށް ސަރުކާރުން ނިންމަވާފައިވާކަމަށްވެސް ވިދާޅުވިއެވެ. އަދި އެއީ ކުރީގެ ސަރުކާރުން މަސައްކަތް ފަށްޓަވާފައިވާ ޓަޝަރީ ހޮސްޕިޓަލްތަކުގެ އިތުރުން މިސަރުކާރުން މުޅިން އަލަށް ހައްދަވާ 3 ޓާޝަރީ ހޮސްޕިޓަލްކަން މިނިސްޓަރ ފާހަގަކުރެއްވިއެވެ.
"ބޮޑަށް މި ބަލަނީ މިހާރު ބަޖެޓްގައި ހިމެނިފައިވާ ފެނާއި ނަރުދަމާގެ ކަންތައްތައް ނިންމާލުމަށް. އަންނަ އަހަރު ކުރީކޮޅު ޖެނުއަރީ ފަހުކޮޅު ނޫނީ ފެބުރުއަރީ ފަހުކޮޅު މަސައްކަތް ފެށޭނެ. މީގެ އިތުރުން އެބަ ވައުދުވަން ތިން ޓާޝަރީ ހޮސްޕިޓަލެއް. އަޅުގަނޑުމެން ބަލަމުން މިދަނީ މުޅިން އަލަށް ތިން ޓާޝަރީ ހޮސްޕިޓަލް ހެދުމަށް. އޭގެ މަސައްކަތްތައް ޕްލޭނިންގ މިނިސްޓްރީއާއި އިކޮނިމިކް މިނިސްޓްރީން މިހާރު ވޯކްއައުޓް އެބަކުރޭ."
މިނިސްޓަރ ވިދާޅުވިއެވެ.
މީގެ އިތުރުން މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަސައްކަތްވެސް މިހާރު ކުރިއަށްދާކަމަށް ފިނޭންސް މިނިސްޓަރ ވިދާޅުވިއެވެ. އެ މަޝްރޫޢުގެ ޕްރޮޕޯސަލް ހެދުމުގެ މަސައްކަތް ސަރުކާރުން ކުރިއަށް ގެންދާކަމަށާއި، އެއީ ވީހާވެސް އަވަހަށް އެންމެ އިސްކަންދީގެ ކުރިއަށް ގެންދާ މަޝްރޫޢުތަކުގެ ތެރޭގައި ހިމެނޭ މުހިންމު މަޝްރޫއެއްކަމަށްވެސް މިނިސްޓަރ ވިދާޅުވިއެވެ.
"ޕޯޓް ޕްރޮޕޯސަލް ހެދުމުގެ މަސައްކަތް އެބަކުރިއަށްދޭ ވަރަށް ފާސްޓް ސްޕީޑެއްގައި އިކޮނޮމިކް މިނިސްޓްރީން. އެއީ އަޅުގަނޑުމެން ޕްރިއޯރިޓީ ޕްރޮޖެކްތެއް. ބޭނުންވަނީ މިހާރު މާލެއަށް އޮތް ބުރަ ކުޑަކޮށްލުމަށްޓަކައި. އެކަމަށް އަޅުގަނޑުމެންނަށް ފެންނަނީ މާލޭ ކޮމާޝަލް ޕޯޓް ތިލަފުށްޓަށް ބަދަލުކޮށް ވަރަށް ބޮޑު ހައްލެއް މާލެއަށް ލިބިގެންދާނެކަމަށް. މިހާރުވެސް ޕޯޓް އޯވަރ ކެޕޭސިޓިގައި މިހާރު ރަންކުރަމުން އެގެންދަނީ. އެހެންވެ އަޅުގަނޑުމެން ބޭނުންވަނީ ވީހާވެސް އަވަހަސް އެކަމަށް ހައްލެއް ގެންނަން."
މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލީހްގެ ރިޔާސީ ވަޢުދުފުޅާ އެއްގޮތަށް ފަސް އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ފެނާއި ނަރުދަމާ ޤާއިމްކުރެވޭނެކަމަށް ވިދާޅުވެފައެވެ.